ନୂଆଦିଲ୍ଲୀ, ୧୪।୫ : ଏଣିକି ପ୍ରତିବର୍ଷ ମେ’ ୨୧ରେ ପାଳିତ ହେବ ଆତଙ୍କବାଦ ନିରୋଧୀ ଦିବସ। ଏନେଇ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ସମସ୍ତ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳକୁ ଚିଠି ଲେଖାଯାଇଛି। ଆତଙ୍କବାଦ କାର୍ଯ୍ୟ କଳାପ ବିରୋଧରେ କେନ୍ଦ୍ର ସରକାର ପ୍ରତିବର୍ଷ ଏହି ଦିବସ ପାଳନ କରିବାକୁ ଯାଉଛନ୍ତି। ଏହି ଚିଠିକୁ ସମସ୍ତ ରାଜ୍ୟ ମୁଖ୍ୟ ସଚିବ, ସମସ୍ତ ମନ୍ତ୍ରଣାଳୟ ଏବଂ ବିଭାଗର ସଚିବମାନଙ୍କୁ ଲେଖାଯାଇଛି।
ଏହି ଦିନ ପାଳନ କରିବାର ଉଦ୍ଦେଶ୍ୟ ହେଉଛି ଯୁବକମାନଙ୍କୁ ଆତଙ୍କବାଦ ଏବଂ ହିଂସା ଠାରୁ ଦୂରେଇ ରଖିବା। ଆତଙ୍କବାଦକୁ ଦୂର କରିବା ପାଇଁ କେନ୍ଦ୍ର ସରକାର କେଉଁ ଯୋଜନା ଚଳାଇଛନ୍ତି ସେମାନଙ୍କୁ କୁହାଯିବ। ଏହା ବ୍ୟତୀତ, ସେମାନଙ୍କୁ କୁହାଯିବ ଯେ ସେମାନଙ୍କର ଗୋଟିଏ ଭୁଲ କିପରି ଜାତୀୟ ସମସ୍ୟା ହୋଇପାରେ । କେନ୍ଦ୍ର ସରକାରଙ୍କ ଅନୁସାରେ ଯଦି ଯୁବକମାନେ ସଠିକ ପଥ ଅନୁସରଣ କରିବେ ତେବେ ଆତଙ୍କବାଦ ଆପେ ଆପେ ଶେଷ ହୋଇଯିବ।
ସମସ୍ତ କାର୍ଯ୍ୟାଳୟ, ସର୍ବସାଧାରଣ ସ୍ଥାନରେ ମଧ୍ୟ ଆତଙ୍କବାଦ ବିରୋଧୀ ଶପଥ ଗ୍ରହଣ କରାଯିବ ବୋଲି ଚିଠିରେ ଦର୍ଶାଯାଇଛି। ଏହା ବ୍ୟତୀତ ଡିଜିଟାଲ ଏବଂ ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ଆତଙ୍କବାଦ ବିରୋଧୀ ବାର୍ତ୍ତା ପ୍ରସାର କରାଯିବ। ଚିଠିରେ କୁହାଯାଇଛି ଯେ, ଶନିବାର, ମେ ୨୧ ତାରିଖ କେନ୍ଦ୍ର ସରକାରଙ୍କ କାର୍ଯ୍ୟାଳୟରେ ଛୁଟିଦିନ ହେବ।
ଏଭଳି ପରିସ୍ଥିତିରେ ମେ ୨୦ରେ ଶପଥ ଗ୍ରହଣ କରାଯାଇପାରେ। ତଥାପି, ରାଜ୍ୟ ସରକାରୀ କାର୍ଯ୍ୟାଳୟରେ କିମ୍ବା ଯେଉଁଠାରେ ଶନିବାର ଛୁଟିଦିନ ନ ଥାଏ, ସେଠାରେ କେବଳ ମେ ୨୧ ରେ ଶପଥ ଗ୍ରହଣ କରାଯିବ ବୋଲି ଚିଠିରେ ଉଲ୍ଲେଖ କରାଯାଇଛି।
