ଭୁବନେଶ୍ୱର, ୬। ୨, (ତପନ ସ୍ବାଇଁ): କଟକର ବାରବାଟୀ ଷ୍ଟାଡିୟମରେ ଅନୁଷ୍ଠିତ ଓଡ଼ିଶା-ପୁଡୁଚେରୀ ରଣଜୀ ଟ୍ରଫି କ୍ରିକେଟ ମ୍ୟାଚ ଅମୀମାଂସିତଭାବେ ଶେଷ ହୋଇଛି। ଫଳରେ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ଓଡ଼ିଶା ୩ ପଏଣ୍ଟ ପାଇଛି। ପୁଡୁଚେରୀ ୧ ପଏଣ୍ଟରେ ସନ୍ତୁଷ୍ଟ ରହିଛି। ଓଡ଼ିଶା ଦ୍ୱିତୀୟ ଇନିଂସରେ ୨୦୧ ରନରେ ଅଲ୍ଆଉଟ ହେବାରୁ ପୁଡୁଚେରୀ ସମ୍ମୁଖରେ ୨୪୦ ରନର ବିଜୟ ଲକ୍ଷ୍ୟ ଧାର୍ଯ୍ୟ ହୋଇଥିଲା। ସୋମବାର ୪ର୍ଥ ତଥା ଅନ୍ତିମ ଦିବସ ଖେଳ ଶେଷ ବେଳକୁ ପୁଡୁଚେରୀ ଦ୍ୱିତୀୟ ଇନିଂସରେ ୮ ଉଇକେଟ ହରାଇ ୧୭୫ ରନ କରିଥିଲା। ଦୁଇଟି ଇନିଂସରେ ଯଥାକ୍ରମେ ୧୧୦ ଓ ୫୮* ରନ କରିବା ସହ ୫ଟି କ୍ୟାଚ ନେଇଥିବା ପୁଡୁଚେରୀ ଅଧିନାୟକ ଅରୁଣ କାର୍ତ୍ତିକ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଛନ୍ତି। ଗ୍ରୁପ୍ ‘ଡି’ରେ ଓଡ଼ିଶା ୫ ମ୍ୟାଚରୁ ୨୧ ବିଜୟ, ୨ ପରାଜୟ ଓ ୨ ଡ୍ର ସହ ୧୨ ପଏଣ୍ଟ ପାଇ ଟେବୁଲର ୫ମ ସ୍ଥାନରେ ରହିଛି। ପୁଡୁଚେରୀ ସମାନ ମ୍ୟାଚ ଖେଳିଥିବାବେଳେ ୨ଟି ଲେଖାଏ ବିଜୟ ଓ ପରାଜୟ ଏବଂ ୧ ଡ୍ର ସହ ୧୩ ପଏଣ୍ଟ ସହିତ ତୃତୀୟ ସ୍ଥାନ ଅଧିକାର କରିଛି। ଭଦୋଦରାରେ ବରୋଦାଠାରୁ ୧୪୭ ରନରେ ପରାଜୟ ସହ ଅଭିଯାନ ଆରମ୍ଭ କରିଥିବା ଓଡ଼ିଶା ଇନ୍ଦୋରରେ ଅନୁଷ୍ଠିତ ପରବର୍ତ୍ତୀ ମ୍ୟାଚକୁ ମଧ୍ୟପ୍ରଦେଶ ସହ ଡ୍ର ରଖିଥିଲା। ତେବେ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ୩ ପଏଣ୍ଟ ପାଇଥିଲା। ଡ୍ରିମ୍ସରେ ଅନୁଷ୍ଠିତ ତୃତୀୟ ମ୍ୟାଚରେ ଜମ୍ମୁ-କଶ୍ମୀରଠାରୁ ଦଳ ୨ ଉଇକେଟରେ ପରାଜିତ ହୋଇ ଶକ୍ତ ଝଟ୍କା ଖାଇଥିଲା। ମାତ୍ର ସେହି ଗ୍ରାଉଣ୍ଡରେ ଖେଳିଥିବା ୪ର୍ଥ ମ୍ୟାଚରେ ଓଡ଼ିଶା ପ୍ରତିପକ୍ଷ ହିମାଚଳ ପ୍ରଦେଶକୁ ୨୩୮ ରନରେ ହରାଇ ସିଜନର ପ୍ରଥମ ବିଜୟ ସ୍ବାଦ ଚାଖିଥିଲା।
ଓଡ଼ିଶା ୨୦୧ରେ ସୀମିତ
ତୃତୀୟ ଦିବସର ଅସମାପ୍ତ ସ୍କୋର ୧୨୨/୪ରୁ ଖେଳ ଆରମ୍ଭ କରିଥିବା ଓଡ଼ିଶା ଦ୍ୱିତୀୟ ଇନିଂସରେ ମୋଟ ୨୦୧ ରନକରି ଅଲ୍ଆଉଟ ହୋଇଯାଇଥିଲା। ବିପ୍ଳବ ପୂର୍ବ ସ୍କୋରରେ ଆଉମାତ୍ର ୩ ରନ ଯୋଗକରି ୮ ରନରେ ଆଉଟ ହୋଇଥିବାବେଳେ ଗୋବିନ୍ଦ ପୋଦ୍ଦାର ସର୍ବାଧିକ ୪୬ ରନ ସ୍କୋର କରିଥିଲେ। ଆଶୀର୍ବାଦ ସ୍ବାଇଁ ୨୬ ରନର ଉପଯୋଗୀ ଇନିଂସ ଖେଳିଥିଲେ। ମାତ୍ର ୨୫ ରନ ବ୍ୟବଧାନରେ ଓଡ଼ିଶା ଏହାର ଶେଷ ୫ ଉଇକେଟ ହରାଇଥିଲା। ପୁଡୁଚେରୀ ପକ୍ଷରୁ ସାଗର ଉଦେଶୀ ୪ଟି, ଗୌରବ ଯାଦବ ୩ଟି, ସୌରଭ ଯାଦବ ୨ଟି ଏବଂ ରବି ଯାଦବ ଗୋଟିଏ ଉଇକେଟ ନେଇଥିଲେ।
ପାରସ, ଅରୁଣ ଲଢ଼ିଲେ
୨୪୦ ରନ ବିଜୟ ଲକ୍ଷ୍ୟରେ ପୁଡୁଚେରୀ ବିନା ରନ୍ରେ ୨ଟି ଉଇକେଟ ହରାଇ ସାଂଘାତିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତେବେ ପାରସ ରନତ୍ପାର୍ଖେ ୭୨, ପାରସ ଡୋଗ୍ରା ୨୩ ଓ ଅରୁଣ କାର୍ତ୍ତିକ ୫୮* ରନର ଲଢ଼ୁଆ ଇନିଂସ ଖେଳି ପୁଡୁଚେରୀକୁ ବିପଦରୁ ରକ୍ଷା କରିଥିଲେ। ଶେଷ ଭାଗରେ ଓଡ଼ିଶା ବୋଲରମାନେ ଚମତ୍କାର ବୋଲିଂ କରି ଯଦିଓ ପୁଣି ପୁଡୁଚେରୀର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ ତେବେ ବିଜୟଠାରୁ ୨ ଉଇକେଟ ଦୂରରେ ରହି ଯାଇଥିଲା ଘରୋଇ ଦଳ। ଓଡ଼ିଶା ପକ୍ଷରୁ ରାଜେଶ ମହାନ୍ତି ଓ ବିପ୍ଳବ ସାମନ୍ତରାୟ ୨ଟି ଲେଖାଏ ଏବଂ ଦେବବ୍ରତ ପ୍ରଧାନ, ସୁନୀଲ ରାଉଳ, ହର୍ଷିତ ରାଠୋଡ ଓ ଗୋବିନ୍ଦ ପୋଦ୍ଦାର ଗୋଟିଏ ଲେଖାଏ ଉଇକେଟ ନେଇଥିଲେ। ପୋଦ୍ଦାର ମାତ୍ର ଗୋଟିଏ ଓଭର ବୋଲିଂ କରିଥିଲେ ଏବଂ ତାହାକୁ ମେଡେନ ନେବାସହ କୌଣସି ରନ ନ ଦେଇ ଗୋଟିଏ ଉଇକେଟ ପାଇଥିଲେ।
ସଂକ୍ଷିପ୍ତ ସ୍କୋର
ଓଡ଼ିଶା ପ୍ରଥମ ଇନିଂସ: ୩୨୨। ପୁଡୁଚେରୀ ପ୍ରଥମ ଇନିଂସ: ୨୮୪। ଓଡ଼ିଶା ଦ୍ୱିତୀୟ ଇନିଂସ: ୨୦୧/ଅଲ୍ଆଉଟ (ଗୋବିନ୍ଦ ପୋଦ୍ଦାର-୪୬, ଶାନ୍ତନୁ ମିଶ୍ର-୨୮, ଆଶୀର୍ବାଦ ସ୍ବାଇଁ-୨୩, ସାଗର ଉଦେଶୀ-୪/୪୫, ଗୌରବ ଯାଦବ-୩/୪୮, ସୌରଭ ଯାଦବ-୨/୪୮, ରବି ଯାଦବ-୧/୨୬)। ପୁଡୁଚେରୀ ଦ୍ୱିତୀୟ ଇନିଂସ: ୧୭୫/୮ (ପାରସ ରନତ୍ପାର୍ଖେ-୭୨, ଅରୁଣ କାର୍ତ୍ତିକ-୫୮*, ପାରସ ଡୋଗ୍ରା-୨୩, ରାଜେଶ ମହାନ୍ତି-୨/୪୧, ବିପ୍ଳବ ସାମନ୍ତରାୟ-୨/୨୮, ଦେବବ୍ରତ ପ୍ରଧାନ-୧/୩୧, ସୁନୀଲ ରାଉଳ-୧/୩୧, ହର୍ଷିତ ରାଠୋଡ-୧/୩୬, ଗୋବିନ୍ଦ ପୋଦ୍ଦାର-୧/୦)।
