ଢେଙ୍କାନାଳ ଅଫିସ, ୨୬।୩: ଢେଙ୍କାନାଳ ସଦର ଥାନା କାନାରା ବ୍ୟାଙ୍କ ବାରଦା ଶାଖାର ଏଟିଏମ୍ ଲୁଟ ଘଟଣାର ମାଷ୍ଟରମାଇଣ୍ଡ୍ ଦୀପୁ ନାୟକ (୨୮) ପୋଲିସ ହାତରେ ଧରାପଡ଼ିଛନ୍ତି। ଅନୁଗୋଳ ଏବଂ ଢେଙ୍କାନାଳ ଜିଲା ପୋଲିସର ମୁଣ୍ଡବ୍ୟଥା ବଢ଼ାଇଥିବା ଦୀପୁଙ୍କ ନାମରେ ୨୮ଟି ଡକାୟତି ଏବଂ ଲୁଟ ମାମଲା ରହିଛି। ଅଭିଯୁକ୍ତଙ୍କ ଘର ଅନୁଗୋଳ ଜିଲା ତାଳଚେର ଥାନା କିଶୋରପାଳ ବିହାରପୁର ଅଞ୍ଚଳରେ। ଶନିବାର ତାଙ୍କୁ କୋର୍ଟ ଚାଲାଣ କରାଯାଇଥିବା ସଦର ଥାନା ପୋଲିସ ପକ୍ଷରୁ ସୂଚନା ଦିଆଯାଇଛି।
ପୋଲିସ ସୂଚନା ଅନୁଯାୟୀ, ଘଟଣାଦିନ ଅର୍ଥାତ୍ ଗତ ଜାନୁୟାରୀ ୨୫ରେ ଅପରାହ୍ନ ୧ଟାରୁ ସାଢ଼େ ୧ଟା ମଧ୍ୟରେ ୧୦ ଜଣ ଯୁବକ ବାରଦାସ୍ଥିତ କାନାରା ବ୍ୟାଙ୍କ ଏଟିଏମ୍ରୁ ମେଶିନ, ଅନ୍ୟାନ୍ୟ ସାମଗ୍ରୀ ନେଇ ପଳାଇଥିଲେ। ତେବେ ଟଙ୍କା ଲୁଟ୍ କରି ପାରି ନ ଥିଲେ। ଏ ନେଇ ନଂ. ୫୭/୨୩ରେ ଏକ ମାମଲା ରୁଜୁ ହୋଇଥିଲା। ଏହି ଘଟଣାରେ ସଦର ଥାନା ସଦାଶିବପୁର ଅଞ୍ଚଳର ହାଡ଼ିବନ୍ଧୁ ସେଠୀ ଓରଫ ହାଡ଼ିଆ (୨୮), ସର୍ବେଶ୍ୱର ନାୟକ ଓରଫ ମଣ୍ଟୁ (୩୩), ମୋଟଙ୍ଗା ଥାନା କୋଚିଲାମଡ଼ା ଗ୍ରାମର ଶାନ୍ତନୁ ଗଡ଼ନାୟକ (୩୫), ସଦାଶିବପୁର ଗ୍ରାମର କାହ୍ନା ନାୟକ (୨୧)ଙ୍କୁ ପୋଲିସ ଗିରଫ କରିଥିବାବେଳେ ମୁଖ୍ୟ ଅଭିଯୁକ୍ତ ଦୀପୁ ଫେରାର ଥିଲେ। ମୋଟଙ୍ଗା ଅଞ୍ଚଳରେ ଦୀପୁ ବୁଲୁଥିବା ସୂଚନା ମିଳିବା ପରେ ଏସ୍ପି ଜ୍ଞାନରଞ୍ଜନ ମହାପାତ୍ରଙ୍କ ନିର୍ଦ୍ଦେଶରେ ସଦର ଏସ୍ଡିପିଓ ସୂର୍ଯ୍ୟମଣି ପ୍ରଧାନଙ୍କ ନେତୃତ୍ୱରେ ସଦର ଥାନା ଏସ୍ଆଇ ଚନ୍ଦ୍ରକାନ୍ତ ସେଠୀ ସଦଳବଳ ଚଢ଼ାଉ କରି ତାଙ୍କୁ ଗିରଫ କରିଥିଲେ।
୨୮ ଲୁଟ, ଡକାୟତି ମାମଲାରେ ସମ୍ପୃକ୍ତ
ବାରଦା ଏଟିଏମ୍ ଲୁଟ୍ ଘଟଣାରେ ସଦର ଥାନା ପୋଲିସ ହାତରେ ଧରାପଡ଼ିଥିବା ଦୀପୁ ନାୟକ ଜଣେ ପେସାଦାର ଆନ୍ତଃଜିଲା ଅପରାଧୀ। ତାଙ୍କ ନାମରେ ଅନୁଗୋଳ ଜିଲାର ବିକ୍ରମପୁର ଥାନା, କଲିୟରି ଥାନା, ତାଳଚେର ଥାନା, ବଅଁରପାଳ ଥାନା, ଖମାର ଥାନା, ଜରପଡା ଥାନା, ପାଲଲହଡ଼ା ଥାନା, ଢେଙ୍କାନାଳ ଜିଲାର ପରଜଙ୍ଗ ଓ ସଦର ଥାନାରେ ୨୮ଟି ଲୁଟ୍ ଓ ଡକାୟତି ମାମଲା ରହିଛି। ତନ୍ମଧ୍ୟରୁ କଲିୟାରୀ ଥାନାରେ ୯ଟି, ତାଳଚେର ଥାନାରେ ୮ଟି ଏବଂ ପରଜଙ୍ଗ ଥାନାରେ ୩ଟି ମାମଲା ରହିଥିବା ଜିଲା ପୋଲିସ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି।
