ଭେଟ୍ଲାପାଲେମ୍,୨୮ା୨: ଆନ୍ଧ୍ରପ୍ରଦେଶର କାକିନାଡା ଜିଲାରେ ଥିବା ଏକ ବାଣ କାରଖାନାରେ ଶନିବାର ଭୟଙ୍କର ବିସ୍ପୋରଣ ଘଟିଛି। ବିସ୍ପୋରଣରେ ୧୮ ଜଣଙ୍କ ମୃତ୍ୟୁ ଘଟିବା ସହ ୬ଜଣ ଗୁରୁତର ହୋଇଛନ୍ତି। ସମରଲକୋଟା ମଣ୍ଡଳ ଅଧୀନ ଭେଟ୍ଲାପାଲେମ୍ ଗାଁରେ ହୋଇଥିବା ଏହି ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ, ମୃତଦେହଗୁଡ଼ିକ ଛିଟିକି ଯାଇ ନିକଟବର୍ତ୍ତୀ ଧାନ କ୍ଷେତରେ ପଡ଼ିଥିବା ପୋଲିସ କହିଛି।
ଘଟଣାସ୍ଥଳରେ ଆନ୍ଧ୍ରପ୍ରଦେଶ ଗୃହମନ୍ତ୍ରୀ ବଙ୍ଗାଲାପୁଡ଼ି ଅନିଥା ପହଞ୍ଚି ସ୍ଥିତି ଅନୁଧ୍ୟାନ କରୁଛନ୍ତି। ନିଆଁ କିପରି ଲାଗିଲା ଓ ବିସ୍ଫୋରଣ କିପରି ହେଲା ଜାଣିବା ପାଇଁ ତଦନ୍ତ ଜାରି ରହିଛି। କାକିନାଡା ସରକାରୀ ଜେନେରାଲ ହସ୍ପିଟାଲକୁ ୭ ଜଣ ଆସି ଚିକିତ୍ସିତ ହେଉଛନ୍ତି। ସେମାନଙ୍କ ଶରୀରର ୯୦ରୁ ୧୦୦ ଭାଗ ପୋଡ଼ିଯାଇଥିବା ହସ୍ପିଟାଲ ସୁପରିଟେଣ୍ଡେଣ୍ଟ ସୂଚନା ଦେଇଛନ୍ତି। ଏନେଇ ମୃତ୍ୟୁ ସଂଖ୍ୟା ବଢିପାରେ ବୋଲି ଜଣାପଡିଛି। ବିସ୍ଫୋରଣରେ ଅନେକ କର୍ମଚାରୀ ପ୍ରାଣ ହରାଇଥିବାରୁ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ଦୁଃଖ ପ୍ରକାଶ କରିଛନ୍ତି।
