ଦାରିଙ୍ଗବାଡ଼ି,୧ା୩ (ଅରୁଣ ସାହୁ): ଦାରିଙ୍ଗବାଡ଼ି ଥାନା ପକାରୀ ଜଙ୍ଗଲରେ ମାଓବାଦୀ ଅନ୍ବେଷଙ୍କୁ ସାଥୀ ମାଓବାଦୀ ହତ୍ୟା ଘଟଣା ପରେ ରବିବାର ଦାରିଙ୍ଗବାଡ଼ି ପୋଲିସ ବ୍ରହ୍ମପୁର ଏମ୍କେସିଜି ପରୀକ୍ଷା ଗାରରେ ଅନ୍ବେଷଙ୍କ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ଆଇଆଇଆସି ସଂଗ୍ରାମ କେଶରୀ ଜେନା ସୂଚନା ଦେଇ କହିଛନ୍ତି ଯେ, ମାଓବାଦୀ ଅନ୍ବେଷଙ୍କ ମୃତଦେହ ଜବତ ପରେ ବ୍ୟବଚ୍ଛେଦ ପାଇଁ ବ୍ରହ୍ମପୁର ପଠାଯାଇଥିଲା। ସେଠାରେ ବ୍ୟବଚ୍ଛେଦ କାର୍ଯ୍ୟ ପରେ ମୃତଦେହକୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଅନ୍ବେଷଙ୍କ ବାପା, ଭଉଣୀ ଏବଂ ପୁତୁରା ଓ ଭଣଜା ମୃତଦେହ ନେବାକୁ ଆସିଥିଲେ।
ସୂଚନାଯୋଗ୍ୟ ଯେ, କନ୍ଧମାଳ ଜିଲା ସଂଗଠନ ଦାୟିତ୍ୱରେ ଥିବା ମୋଷ୍ଟ ୱାଣ୍ଟେଡ ଶୁକ୍ରୁ ତାଙ୍କ ସାଥୀ ମାଓବାଦୀ ଅନ୍ବେଷଙ୍କୁ ହତ୍ୟା କରି ପୋତି ଦେଇଥିଲେ। ଘଟଣାଟି ଜାନୁୟାରୀ ୨୯ରେ ଘଟିଥିଲେ ମଧ୍ୟ ପୋଲିସ ଫେବୃୟାରୀ ୨୪ରେ ଅନ୍ବେଷଙ୍କ ମୃତଦେହ ମାଟିତଳୁ ଜବତ କରିଥିଲା। ଏସ୍ପିଙ୍କ କହିବା ଅନୁଯାୟୀ କେକେବିଏନ୍ ଡିଭିଜନାଲ କମିଟି ସଦସ୍ୟ ଅନ୍ବେଷ ଏବଂ ତାଙ୍କର କେତେଜଣ ସହଯୋଗୀ ପୋଲିସ ନିକଟରେ ଆତ୍ମସମର୍ପଣ କରିବାକୁ ଉଦ୍ୟମ କରୁଥିଲେ ଏହାକୁ ଷ୍ଟେଟ କମିଟି ସଦସ୍ୟ ଶୁକ୍ରୁ ବିରୋଧ କରୁଥିଲେ। ଏହାକୁ ନେଇ ଶୁକ୍ରୁ ଏବଂ ଅନ୍ବେଷଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା।
ପରେ ଶୁକ୍ରୁ ଓ ଅନ୍ୟ ସାଥୀମାନେ ଅନ୍ବେଷଙ୍କୁ ହତ୍ୟା କରି ପୋତି ଦେଇଥିଲେ। ସେହିଦିନ ଠାରୁ ପୋଲିସ ମଧ୍ୟ ଶୁକ୍ରୁଙ୍କ ସମ୍ପର୍କରେ ଜାଣିବାକୁ ପାଇଲା ଯେ, ମାଓବାଦୀମାନେ ସରକାରଙ୍କ ଘୋଷଣା ଅନୁସାରେ ମୁଖ୍ୟ ସ୍ରୋତରେ ସାମିଲ ହେବାକୁ ଚାହୁଁଥିବା ବେଳେ ଆତ୍ମସମର୍ପଣ କରିବାକୁ ଚାହୁଁଥିବା ମାଓବାଦୀଙ୍କୁ ଶୁକ୍ରୁ ଓ ତାର ସହଯୋଗୀ ସାଥୀ ଶିଳା ଓ ନକୁଳଙ୍କ ସମେତ ଅନ୍ୟମାନେ ବାଟ ଓଗାଳୁଛନ୍ତି। ତେଣୁ ଏବେ ରାଜ୍ୟ ପୋଲିସ ମହାନିର୍ଦ୍ଦେଶକ ଶୁକ୍ରୁଙ୍କୁ ଚରମ ବାଣୀ ଶୁଣାଇବା ସହ କୋମ୍ବିଂ ଅପରେଶନକୁ ଜୋରଦାର କରିବା ସହ ଦାରିଙ୍ଗବାଡ଼ି ଜଙ୍ଗଲରେ ଶୁକ୍ରୁ ଓ ତାର ଅନ୍ୟ ସାଥୀମାନେ ଲୁଚିଥିବା ଅନୁମାନ କରାଯାଇ ଅପରେଶନ ଶୁକ୍ରୁକୁ ଶକ୍ତିଶାଳୀ କରାଯାଇଛି। ଅଧିକା ସୁରକ୍ଷାକର୍ମୀ, ସନ୍ଧାନୀ କୁକୁରର ସହାୟତା ସହ ଥର୍ମାଲ ସେନ୍ସର ଡ୍ରୋନ୍କୁ ବ୍ୟବହାର କରାଯାଇ ସର୍ଚ୍ଚ ଅପରେଶନକୁ ଜୋରଦାର କରାଯାଇଥିବା ଜଣାପଡ଼ିଛି।
