ରାୟଗଡ଼ା,୧୦।୨(ଆଶିଷ ରଞ୍ଜନ ପଣ୍ଡା)-ନାବାଳିକାଙ୍କୁ ବଳାତ୍କାର ଓ ନିର୍ଯାତନା ଅଭିଯୋଗ ମାମଲାରେ ମାଓବାଦୀ ନେତା ଆଜାଦ୍ ଓରଫ୍ ଦୁନା କେଶବ ରାଓ ମଙ୍ଗଳବାର ରାୟଗଡ଼ା ପୋକ୍ସୋ କୋର୍ଟରେ ହାଜର ହୋଇଥିଲେ। ଆଜାଦ୍ କୋର୍ଟରେ ହାଜର ହେବା ପରେ ତାଙ୍କ ଉପରେ ଚାର୍ଜଫ୍ରେମ୍ ହୋଇଥିଲା ା ଆଜାଦ୍ ଏହି ମାମଲାରେ ସମ୍ପୃକ୍ତି ନ ଥିବା ଏବଂ ଉକ୍ତ ମାମଲାରୁ ତାଙ୍କୁ ମୁକ୍ତକରିବା ପାଇଁ ତାଙ୍କ ଓକିଲ ନବ କୁମାର କଣ୍ଟା କୋର୍ଟରେ ପିଟିଶନ ଦାଖଲ କରିଛନ୍ତି। ଅତିରିକ୍ତ ଜିଲା ଦୌରାଜଜ୍ ତଥା ପୋକ୍ସୋ ଅଧିକାରିଣୀ ଶ୍ୱେତା ମିଶ୍ର ପିଟିଶନ ଖାରଜକରି ଆଜାଦଙ୍କୁ ଜେଲ ହାଜତକୁ ପଠାଇ ଦେଇଥିବା ଜଣାପଡ଼ିଛି।
ଆଜାଦ୍ଙ୍କ ଓକିଲ କଣ୍ଟାଙ୍କଠାରୁ ମିଳିଥିବା ସୂଚନା ମୁତାବକ, ୨୦୧୩ ଏପ୍ରିଲ ୨୫ରେ ବିଷମକଟକ ଥାନାରେ ଦାଏର ହୋଇଥିବା ଜଣେ ନାବାଳିକାଙ୍କ ଏତଲା ପ୍ରକାରେ ସମ୍ପୃକ୍ତ ନାବାଳିକାଙ୍କୁ ଆଜାଦ୍, ନିଖିଲ, ସାଗର, ମିଟୁ, ସାଧୁ ଓ ସୁବାସଙ୍କ ସମେତ ଅନ୍ୟ ମାଓବାଦୀମାନେ ତାଙ୍କୁ ବନ୍ଧୁକ ଦେଖାଇ ଅପହରଣ କରିନେଇ ଗଣବଳାତ୍କାର କରିଥିଲେ। ପରେ ଆଜାଦ୍, ନିଖିଲ ଓ ଅନ୍ୟମାନେ ନାବାଳିକାଙ୍କୁ ଚନ୍ଦ୍ରପୁର, ଫୁଲବାଣୀ, ଗଜପତି, କର୍ଲାଘାଟି ଓ ନିୟମଗିରି ଜଙ୍ଗଲରେ ଜବରଦସ୍ତି ରଖିଥିଲେ। ତେବେ ଏତଲା ଦେବାର ପ୍ରାୟ ୧୫ଦିନ ପୂର୍ବରୁ ନାବାଳିକା ଜଣକ କୌଶଳକ୍ରମେ ସେମାନଙ୍କ କବଳରୁ ଖସିଆସି ନିଜ ଗାଁରେ ଲୁଚି ରହିଥିଲେ ଏବଂ ପରେ ସାହସ କରି ଥାନାରେ ଏତଲା ଦେଇଥିବା ଉଲ୍ଲେଖ ରହିଛି। ଅଭିଯୋଗକୁ ଭିତ୍ତିକରି ବିଷମକଟକ ପୋଲିସ କେସ୍ ନଂ. ୪୩/୨୦୧୩ରେ ମାମଲା ରୁଜୁ କରିଥିଲେ। ତେବେ ଏହି ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି ଆଜାଦ୍ଙ୍କ ଓକିଲ କଣ୍ଟା କହିଛନ୍ତି। କଣ୍ଟାଙ୍କ ନିକଟରେ ରହିଥିବା ତଥ୍ୟ ଅନୁସାରେ ଆଜାଦ୍ ୨୦୧୧ ମେ ୧୮ରେ ହାଇଦ୍ରାବାଦ ପୋଲିସ ଡିଜିପିଙ୍କ ନିକଟରେ ଆତ୍ମସମର୍ପଣ କରିଥିଲେ । ମେ ୨୯ ତାରିଖରେ ଆଜାଦ୍ଙ୍କ ମାଆଙ୍କ ଦ୍ୱାରା ପଲାସା ତତ୍କାଳୀନ ବିଧାୟକ ଜୁଟ୍ଟୁ ଜଗନାୟକୁଲୁଙ୍କ ଉପସ୍ଥିତିରେ ଶ୍ରୀକାକୁଲମ ଜିଲା କାଶୀବୁଗା ଏସ୍ଡିପିଓ କାର୍ଯ୍ୟାଳୟରେ ଆନ୍ଧ୍ରପ୍ରଦେଶ ପୋଲିସ ଆଜାଦ୍ଙ୍କୁ ଓଡ଼ିଶା ପୋଲିସକୁ ହସ୍ତାନ୍ତର କରିଥିଲା। ତେଣୁ ୨୦୧୧ରୁ ଆଜାଦ୍ ଜେଲରେ ରହିଥିବା ବେଳେ ୨୦୧୨ରେ ଏଭଳି ଅପରାଧ କରିଥିବା ନେଇ ହୋଇଥିବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି ଓକିଲ କଣ୍ଟା କହିଛନ୍ତି । ଆଜାଦ୍ଙ୍କ ପକ୍ଷରୁ ଏହି ମାମଲାକୁ ଆଇନଜୀବୀ ନବ କୁମାର କଣ୍ଟା ଏବଂ ବିଶ୍ୱନାଥ ଗନ୍ତାୟତ ପରିଚାଳନା କରୁଛନ୍ତି।
