କର୍ଲାମୁଣ୍ଡା, ୧୩।୧୧ (ପ୍ରଦୀପ କୁମାର ସାହୁ): କଳାହାଣ୍ଡି ଜିଲାର ଅଗ୍ରଣୀ ଅନୁଷ୍ଠାନ ମହାବୀର ସାଂସ୍କୃତିକ ଅନୁଷ୍ଠାନ ପକ୍ଷରୁ ଭବାନୀପାଟଣାଠାରେ ୬୨ତମ ମହାବୀର ମହୋତ୍ସବ ଆୟୋଜିତ ହୋଇଯାଇଛି। ଏହି ଅବସରରେ ଲୋକନାଟକ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ନାଟ୍ୟକାର ଚିତ୍ରସେନ ଦାଶଙ୍କୁ ‘ମହାବୀର ସମ୍ମାନ’ରେ ସମ୍ମାନିତ କରାଯାଇଛି।
ଚିତ୍ରସେନ ଦାଶ ଦୀର୍ଘଦିନ ଧରି ଲୋକନାଟକ ଓ ଗୀତିନାଟ୍ୟ ରଚନା କରି ଗ୍ରାମାଞ୍ଚଳରେ ଲୋକକଳାର ପ୍ରଚାର ଓ ପ୍ରସାରରେ ଅବଦାନ ରଖିଆସୁଛନ୍ତି। ତାଙ୍କ ରଚିତ ‘ଲକ୍ଷ୍ମୀ ସୁଆଙ୍ଗ’, ‘କୃଷ୍ଣଲୀଳା’, ‘ନାଗାର୍ଜୁନ’, ‘ତ୍ରିନାଥ ମେଳା’, ‘ଶନିଶ୍ଚର ମେଳା’, ‘ଜଳନ୍ଧର ବଧ’, ‘ପଶାଖେଳ’, ‘ଉତ୍ତରାବାଳି ବିବାହ’, ‘ପତି ପାଦ ଧରି କାନ୍ଦୁଛି ସତୀ’ ଓ ‘ରାହୁ ଗିଳିଦେଲା ପୁନେଇଁ ଜହ୍ନ’ ଆଦି ନାଟକ ବିଭିନ୍ନ ଗ୍ରାମରେ ଶତାଧିକ ଥର ମଞ୍ଚସ୍ଥ ହୋଇ ଦର୍ଶକଙ୍କ ଉଚ୍ଚ ପ୍ରଶଂସା ସାଉଁଟିଛି।
ମହାବୀର ସାଂସ୍କୃତିକ ଅନୁଷ୍ଠାନ ଭଳି ଏକ ଅଗ୍ରଣୀ ଅନୁଷ୍ଠାନ ପକ୍ଷରୁ ତାଙ୍କ ପ୍ରତିଭା ଓ କଳାସାଧନାକୁ ସମ୍ମାନ ଜଣାଇବା ଲୋକକଳାର ସୁରକ୍ଷା ଓ ପ୍ରସାର ଦିଗରେ ନୂତନ ପ୍ରେରଣା ଯୋଗାଇଛି।
ଏହି ଉତ୍ସବରେ ବିଶିଷ୍ଟ ଶିକ୍ଷାବିତ୍ ଡ. ଅଜୟ କୁମାର ମିଶ୍ର ସଭାପତିତ୍ୱ କରିଥିବାବେଳେ ଅତିଥି ଭାବେ କଳାହାଣ୍ଡିର ଅତିରିକ୍ତ ଜିଲାପାଳ ତନ୍ମୟ କୁମାର ଦରୱାନ ଓ ଜିଲା ସଂସ୍କୃତି ଅଧିକାରୀ ବିବେକାନନ୍ଦ ମହାନନ୍ଦ ଯୋଗଦେଇଥିଲେ ସୂଚନାଯୋଗ୍ୟ, ଚିତ୍ରସେନ ଦାଶ କଳାହାଣ୍ଡି ଜିଲାର କର୍ଲାମୁଣ୍ଡା ବ୍ଲକ ଅନ୍ତର୍ଗତ ରେଗଡ଼ା ଗ୍ରାମର ବାସିନ୍ଦା।
Dharitri – Odisha’s No.1 Odia Daily
