ବରଗଡ଼ ଅଫିସ୍, ୨୫ା୯: ସମ୍ବଲପୁରୀ ବସ୍ତ୍ର ତିଆରି ପାଇଁ ବରଗଡ଼ ଜିଲାର ଏକ ସ୍ବତନ୍ତ୍ର ପରିଚୟ ରହିଛି। ଦେଶ ତଥା ଦେଶ ବାହାରେ ଏଠାରେ ପ୍ରସ୍ତୁତ ସମ୍ବଲପୁରୀ ଶାଢ଼ିଠାରୁ ଆରମ୍ଭ କରି ଅନ୍ୟ ପୋଷାକ, ପରିଚ୍ଛଦର ଚାହିଦା ମଧ୍ୟ ଅଧିକ । ତେବେ ଏହାର ମୂଳରେ ରହିଛନ୍ତି ଜିଲାର ବୁଣାକାର। ବୁଣାକାରଙ୍କ ବିକାଶ ତଥା ସେମାନଙ୍କୁ ଉତ୍ସାହିତ କରିବା ପାଇଁ ସରକାରଙ୍କ ପକ୍ଷରୁ ଅନେକ ଯୋଜନା ମଧ୍ୟ ହାତକୁ ନିଆଯାଇଛି ।
ସୂତାଠାରୁ ମଙ୍ଗା, ଅରଟ, ସୋଲାର ଲଣ୍ଠନ, ଇନଭର୍ଟର ଆଦି ବୁଣାକାରଙ୍କୁ ଯୋଗାଇବା ସରକାରଙ୍କ ମାର୍ଗଦର୍ଶିକାରେ ରହିଛି । କିନ୍ତୁ ଏହାର ସୁଫଳ ଏପର୍ଯ୍ୟନ୍ତ ଅନେକ ବୁଣାକାରଙ୍କ ପାଇଁ ଅପହଞ୍ଚ ହୋଇପଡ଼ିଛି । ବରଗଡ଼ ଜିଲା ବିଜେପୁର ବ୍ଲକ ଯୋଖିପାଲି ଗ୍ରାମରେ ରହିଥିବା ବୁଣାକାରଙ୍କ କ୍ଷେତ୍ରରେ ଏହା ଦେଖିବାକୁ ମିଳିଛି । ଗ୍ରାମରେ ପ୍ରାୟ ୩୦ ବୁଣାକାର ପରିବାର ରହୁଛନ୍ତି ।
ସମ୍ବଲପୁରୀ କପଡ଼ା ବୁଣି ସେମାନେ ପରିବାର ଗୁଜୁରାଣ ମେଣ୍ଟାଉଛନ୍ତି । ମାତ୍ର ଅଦ୍ୟାବଧି ସେମାନଙ୍କୁ କୌଣସି ସରକାରୀ ସହାୟତା ମିଳି ନ ଥିବା ବୁଣାକାରମାନେ କହିଛନ୍ତି । ସେହିପରି କରୋନା କଟକଣା ଯୋଗୁ ସେମାନଙ୍କ ପ୍ରସ୍ତୁତ ସମ୍ବଲପୁରୀ କପଡ଼ା ବିକ୍ରିବଟା ମଧ୍ୟ ଠପ୍ ହୋଇଯାଇଛି ।
ଫଳରେ ଗୋଟିଏ ପଟେ ସରକାରୀ ସହାୟତାରୁ ବଞ୍ଚିତ ଏବଂ ଅନ୍ୟପଟେ କରୋନା କଟକଣାରୁ ରୋଜଗାର ହରାଇ ଏହି ଗ୍ରାମର ବୁଣାକାରଙ୍କୁ ଦୁର୍ବିସହ ଜୀବନ ଅତିବାହିତ କରିବାକୁ ପଡ଼ୁଛି ।
ମିଳୁନି ସହାୟତା, ହରାଇଛୁ ରୋଜଗାର
କପଡ଼ା ବୁଣିବା ଛଡ଼ା ଆମର ଆଉ କିଛି ରୋଜଗାର ନାହିଁ ।
କପଡ଼ା ବୁଣି ଯାହା ମିଳେ, ସେଥିରୁ ପରିବାର ଚଳେ । ଏହା ଆମର କୌଳିକ ବୃତ୍ତି, ମାତ୍ର କିଛି ସରକାରୀ ସହାୟତା ମିଳିନାହିଁ ।
ସରକାରଙ୍କ ଯୋଜନାରେ ଦୀର୍ଘ ୩ ବର୍ଷ ହେଲା ସୋଲାର୍ ଇନଭର୍ଟର ପାଇଁ ଆବେଦନ କରି ଆସୁଛି । ମାତ୍ର ଏପର୍ଯ୍ୟନ୍ତ ତାହା ପାଇ ପାରିନାହିଁ । ଅନେକ ସମୟରେ ବିଦ୍ୟୁତ ବିଭ୍ରାଟ ଦେଖାଯାଉଛି । ଫଳରେ ଅନ୍ଧାର ମଧ୍ୟରେ କପଡ଼ା ବୁଣିବା ସମ୍ଭବ ହେଉନାହିଁ ା ଏଥିଯୋଗୁ ରୋଜଗାର ହରାଇବାକୁ ପଡ଼ୁଛି । -ବାଳକ ମହାନନ୍ଦ
ଆବେଦନ କରିଛୁ, ସହାୟତା ଅପହଞ୍ଚ
ସରକାରୀ ସହାୟତା ଆଶାରେ ବିଭିନ୍ନ ଅଫିସକୁ ଧାଁ ଦୌଡ଼ କରୁଛୁ ।
ସହାୟତା ପାଇଁ ଆବେଦନ କରିଛୁ । ହେଲେ ତାହା ଅରଣ୍ୟ ରୋଦନ ଭଳି ହୋଇଯାଇଛି । ରୋଜଗାର ପାଇଁ ନିଜେ ମଙ୍ଗା, ଅରଟ କିଣିଛୁ । ଭଙ୍ଗା ଦଦରା ମଙ୍ଗାଶାଳରେ କପଡ଼ା ବୁଣୁଛୁ । ବର୍ଷା ହେଲେ ସେହି ମଙ୍ଗାଶାଳରେ କପଡ଼ା ବୁଣିବା ବନ୍ଦ ହୋଇଯାଉଛି ।
ସେହିପରି ବୁଣିଥିବା କପଡ଼ାକୁ ଲକ୍ଡାଉନ୍ ହେବା ପରଠାରୁ ଗତ କିଛିମାସ ହେଲା ବିକ୍ରିବଟା କରି ପାରୁନାହୁଁ । ପରିବାର ପୋଷଣ କରିବା କଷ୍ଟସାଧ୍ୟ ହୋଇପଡ଼ିଛି । -କୀର୍ତ୍ତିଚନ୍ଦ୍ର କୁମ୍ଭାର
