ନିରାକାରପୁର,୧୯।୩ (ଡି.ଏନ୍.ଏ.): ଚାଷୀଙ୍କ ଉନ୍ନତି ପାଇଁ ଖୋର୍ଦ୍ଧା ଜିଲା ରାମେଶ୍ୱର ପଞ୍ଚାୟତ ଗଡ଼ଠାରେ ମନ୍ଦାକିନୀ ନଦୀରେ ୧୯୮୧ ଡିସେମ୍ବର ୨୧ରେ ଏକ ବ୍ୟାରେଜ୍ ନିର୍ମାଣ କରାଯାଇଥିଲା। ଫଳରେ ଜିଲାର ଟାଙ୍ଗୀ ଓ ଖୋର୍ଦ୍ଧା ବ୍ଲକ ଏବଂ ପୁରୀ ଜିଲା କଣାସ ବ୍ଲକର ପ୍ରାୟ ୩୭ରୁ ଊର୍ଦ୍ଧ୍ୱ ରାଜସ୍ବ ଗ୍ରାମର ଚାଷୀମାନେ ଉପକୃତ ହୋଇପାରିବେ। ମାତ୍ର ଜିଲା ପ୍ରଶାସନ ଓ ବିଭାଗୀୟ ଅଧିକାରୀଙ୍କ ଅବହେଳାରୁ ଏହି ବ୍ୟାରେଜ୍ ଏବେ ଚାଷ ସେବାରେ ଲାଗୁ ନ ଥିବା ଜଣାପଡ଼ିଛି।
ଖରିଫ ଋତୁରେ ବିଭାଗ ପକ୍ଷରୁ ନଦୀରେ ପାଣିକୁ ଠୁଳ କରି ନ ରଖାଯିବାରୁ ଖରିଫ ଋତୁରେ ୨୦୦୦ରୁ ଊର୍ଦ୍ଧ୍ୱ ଓ ରବି ଋତୁରେ ୪୦୦ ହେକ୍ଟରରୁ ଊର୍ଦ୍ଧ୍ୱ ଜମି ଜଳସେଚିତ ହେବାରୁ ବଞ୍ଚିିତ ହେଉଛି। ଅଧିକାରୀଙ୍କ ଅଣଦେଖା ଯୋଗୁ ଏହି ବ୍ୟାରେଜ୍ ସଂଲଗ୍ନ କେନାଲଗୁଡିକ ଅସ୍ତିତ୍ୱ ହରାଇବାକୁ ବସିଛି। କେନାଲ ବନ୍ଧର ରକ୍ଷଣାବେକ୍ଷଣ ଅଭାବ ଯୋଗୁ ବର୍ଷାଦିନେ କ୍ଷତି ହେଉଛି। ପ୍ରତିବର୍ଷ କେନାଲ ସଫେଇ ଏବଂ ଚେକ୍ ଡ୍ୟାମ ନଁାରେ ବିଭାଗ ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ମାତ୍ର ଏଥିରେ ଚାଷୀମାନେ ଉପକୃତ ହୋଇପାରୁ ନାହାନ୍ତି। ପୂର୍ବରୁ ଏହି ଅଞ୍ଚଳରେ ଖରିଫ ଫସଲ ପରେ ଟାଇଚୁଙ୍ଗ୍ ଧାନ ସମେତ ବିଭିନ୍ନ କିସମର ପନିପରିବା ଉତ୍ପାଦନ ହେଉଥିଲା। ଫଳରେ ଚାଷୀମାନେ ସେମାନଙ୍କର ପରିବାର ପ୍ରତିପୋଷଣ କରୁୁଥିଲେ। କେନାଲର ଦୁରବସ୍ଥା ଯୋଗୁ ପ୍ରାୟ ୨୦/୨୫ବର୍ଷ ହେବ ୬୦ ପ୍ରତିଶତରୁ ଊର୍ଦ୍ଧ୍ୱ ଚାଷୀ ଚାଷ କାମ ଛାଡ଼ି ଶ୍ରମିକ ଭାବେ ଖଟୁଛନ୍ତି। ଏହାର ତଦନ୍ତ କରାଗଲେ ବହୁ ଗୁମର ପଦାକୁ ଆସନ୍ତା ବୋଲି ଚାଷୀମାନେ କହିିଛନ୍ତି। ଏଥିପ୍ରତି ଜିଲା ପ୍ରଶାସନ ଓ ଉଚ୍ଚ ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେବାକୁ ଚାଷୀଙ୍କ ପକ୍ଷରୁ ଦାବି କରାଯାଇଛି।
