ନୂଆଦିଲ୍ଲୀ,୨୮।୮: ଗତ ୧୦ ତାରିଖରେ ରାଜଧାନୀର ସୁଖଦେବ ବିହାରର ଡ୍ରେନରୁ ଏକ ଟ୍ରଲି ବ୍ୟାଗରୁ ମିଳିଥିଲା ଜଣେ ପୁରୁଷଙ୍କ ମୃତଦେହ। ପାଣିରେ ରହି ରହି ମୃତଦେହ ପଚି ଯାଇଥିବାରୁ ମୃତକଙ୍କ ପରିଚୟ ଜାଣିବା ପୋଲିସ ପାଇଁ କଷ୍ଟକର ହୋଇ ପଡ଼ିଥିଲା। ମୃତକଙ୍କ ଡାହାଣହାତରେ ଥିଲା ଏକ ଟାଟୁ, ଯେଉଁଥିରେ ଉଲ୍ଲେଖ ଥିଲା ‘ନବୀନ’। ଘଟଣା ସ୍ଥଳରୁ ହତ୍ୟା ସମ୍ପର୍କୀତ କୌଣସି ତଥ୍ୟ ନ ମିଳିବାରୁ ତାଙ୍କୁ ଅନ୍ୟତ୍ର ହତ୍ୟା କରାଯାଇଥିବା ସନ୍ଦେହ ପ୍ରକାଶ ପାଇଥିଲା।
ମୃତକଙ୍କ ପରିଚୟ ଜାଣିବା ପାଇଁ ପୋଲିସ ପକ୍ଷରୁ ଆଖ ପାଖ ଥାନାକୁ ମୃତଦେହ ଓ ହାତରେ ଥିବା ଟାଟୁ ଫଟୋ ପଠାଯାଇଥିଲା। ପରେ ନବୀନ ନାମକ ଜଣେ ବ୍ୟକ୍ତି ନିଖୋଜ ଥିବା ପୋଲିସ ଜାଣିବାକୁ ପାଇଥିଲା। ତୁରନ୍ତ ଅଭିଯୋଗକାରୀ ମୁସ୍କାନ ତଥା ନବୀନଙ୍କ ସ୍ତ୍ରୀ ପାଖରେ ପହଞ୍ଚିଥିଲା ପୋଲିସ।
ପ୍ରାରମ୍ଭିକ ତଦନ୍ତ ବେଳେ ପୋଲିସକୁ ବିଭ୍ରାନ୍ତ କରିବାକୁ ଉଦ୍ୟମ କରିଥିଲେ ମୁସ୍କାନ। କିନ୍ତୁ ନବୀନଙ୍କ ହତ୍ୟା ପଛରେ ତାଙ୍କ ହାତ ଥିବା ପୋଲିସ ତଦନ୍ତରୁ ଜାଣିବାକୁ ପାଇଥିଲା। ପଚରାଉଚୁରା ବେଳେ ମୁସ୍କାନ ତାଙ୍କ ପ୍ରେମିକ ଜମାଲଙ୍କ ସହ ମିଶି ସ୍ବାମୀ ନବୀନଙ୍କୁ ଛୁରି ଭୁଷି ହତ୍ୟା କରିଥିବା ସ୍ବୀକାର କରିଥିଲେ। ଏହି ହତ୍ୟାକାଣ୍ଡରେ ଜଡ଼ିତ ଅନ୍ୟ ୫ ଅଭିଯୁକ୍ତଙ୍କୁ ପୋଲିସ ଗିରଫ କରିଛି।
