ବାଲେଶ୍ୱର ଅଫିସ,୨୫।୧: ବାଲେଶ୍ୱର ଜିଲା ଜଳେଶ୍ବର ଥାନା ନାମ୍ପୋ ଫାଣ୍ଡି ଅଧୀନ ସରିସା ଗ୍ରାମର ଜଣେ ଯୁବକ ସୋମବାର ଘରେ ଏକ ଚିଠି ରଖି ଚାଲିଯାଇଛନ୍ତି । ଚିଠିକୁ ନେଇ ପରିବାର ଲୋକେ ବ୍ୟସ୍ତ ହୋଇପଡ଼ିଥିବା ବେଳେ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି।
ସୂଚନାଯୋଗ୍ୟ, ସରିସା ଗ୍ରାମର ଉତ୍ତମ କୁମାର ପଣ୍ଡା (୩୫) ହରିୟାଣାରେ ଏକ ଔଷଧ କମ୍ପାନୀରେ ଲାବୋରେଟାରୀ ଆସିଷ୍ଟାଣ୍ଟ ଭାବେ ଭଲ ଦରମାରେ କାର୍ଯ୍ୟ କରନ୍ତି । ସେ ବିବାହିତ ହୋଇଥିବା ବେଳେ ତାଙ୍କର ଏକ ବର୍ଷର ଝିଅ ମଧ୍ୟ ଅଛନ୍ତିି । ତେବେ ସେ ଦୁଇଦିନ ତଳେ ଗାଁକୁ ଛୁଟିରେ ଆସିଥିବା ବେଳେ ସ୍ତ୍ରୀଓ ଝିଅ ଶ୍ୱଶୁର ଘରେ ରହିଛନ୍ତି। ସୋମବାର ସେ କାହାକୁ କିଛି ନ କହି ଘରୁ ଚାଲିି ଯାଇଥିଲେ । ବିଳମ୍ବିତ ରାତି ପର୍ଯ୍ୟନ୍ତ ଘରକୁ ନ ଫେରିବାରୁ ପରିବାର ଲୋକେ ତାଙ୍କୁ ଫୋନ କରିଥିଲେ। ହେଲେ ଫୋନ ଘରେ ବାଜିଥିଲା। ଫୋନ ନିକଟରେ ଏକ ଚିଠି ଥିବା ପରିବାର ଲୋକେ ଦେଖିବାକୁ ପାଇଥିଲେ। ଚିଠିରେ ଉଲ୍ଲେଖ ଥିଲା, ଘରକୁ ଆସିଥିଲି ମୋ ମା’ ଓ ଛୁଆକୁ ଦେଖିବା ପାଇଁ । ଏଲି ତୁମେ ମୋତେ ଭୁଲ ବୁଝିବ ନାହିଁ । ମୋତେ ଏତେ ବଡ଼ ରୋଗ ହୋଇଛି ବୋଲି ଜାଣିଥିଲେ କେବେ ବି ବିବାହ କରି ନ ଥାନ୍ତି ମୋତେ କ୍ଷମା କରିଦେବ। ମୋ ରୋଗ ଏବେ ଚତୁର୍ଥ ଷ୍ଟେଜରେ ରହିଛି। ଯାହା କେବେ ଠିକ୍ ହେବନାହିଁ । ଯେତିକି ଟଙ୍କା ମୋ ଚିକିତ୍ସାରେ ଖର୍ଚ୍ଚ ହୋଇଥାନ୍ତା ସେତିକି ଟଙ୍କାରେ ମୋ ଝିଅ ପାଠ ପଢ଼ି ପାରିବା। ବାପା , ମା’ , କାକା , କାକି , ସ୍ତ୍ରୀ , ଝିଅ , ଭଉଣୀ , ଶାଶୂ , ଶ୍ବଶୁର କେହି ତାଙ୍କୁ ଭୁଲ ନ ବୁଝିବାକୁ ଚିଠିରେ ଲେଖିଛନ୍ତି। ତାଙ୍କୁ କେହି ଖୋଜିବାକୁ ଚେଷ୍ଟା ନ କରିବାକୁ ମଧ୍ୟ ଚିଠିରେ ଅନୁରୋଧ କରିଛନ୍ତି । ଚିଠି ପାଇବା ପରେ ଉତ୍ତମଙ୍କ ପରିବାର ଲୋକେ ଦୁଃଖର ଭାଙ୍ଗି ପଡ଼ିଛନ୍ତି । ଜଳେଶ୍ବର ସମେତ ବିଭିନ୍ନ ସ୍ଥାନରେ ଖୋଜାଖୋଜି ଚାଲିଛିି । ଉତ୍ତମ ଏବେ କେଉଁଠି, ତାଙ୍କୁ କେଉଁ ରୋଗ ହୋଇଛି, ଏ ସମ୍ପର୍କରେ ସେ ପରିବାର ଲୋକଙ୍କୁ କାହିଁକି ପୂର୍ବରୁ ସୂଚନା ଦେଇ ନାହାନ୍ତି ଏହି ସବୁ ପ୍ରଶ୍ନ ପରିବାର ଲୋକଙ୍କୁ ବିବ୍ରତ କରିଛି । ଏ ସମ୍ପର୍କରେ ବାପା ନମ୍ପୋ ଫାଣ୍ଡିରେ ଏକ ଲିଖିତ ଅଭିଯୋଗ ଦେଇଛନ୍ତି ।
