ଭଞ୍ଜନଗର,୧୦।୧(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗରସ୍ଥିତ ଘୁମୁସର ଉତ୍ତର ବନଖଣ୍ଡରେ ବିଗତ କିଛିମାସ ହେବ ମଣିଷ ହାତୀ ଲଢ଼େଇ ବଢୁଛି। କେଉଁଠି ଫସଲ ପାଇଁ ଏହି ଲଢ଼େଇ ହେଉଥିବା ବେଳେ ଆଉ କେଉଁଠି ହାତୀର ଦାନ୍ତ ପାଇଁ ଶିକାରୀ ଓ ହାତୀ ମଧ୍ୟରେ ଲଢ଼େଇ ହେଉଛି। ଯାହାକୁ ନେଇ ପରିବେଶବିଦ୍ ମାନେ ଚିନ୍ତା ପ୍ରକଟ କରିଛନ୍ତି। ଆଗାମୀ ଦିନରେ ଏହି ବିବାଦ ବଢିବା ସମ୍ଭାବନା ରହିଛି। ଜଙ୍ଗଲରେ ମିଳୁଥିବା ନିୟମିତ ଖାଦ୍ୟ ଆଉ ହାତୀଙ୍କୁ ପସନ୍ଦ ନାହିଁ। ତେଣେ ସେମାନେ ଅନେକ ସମୟରେ ଖାଦ୍ୟ ଅନେୱଷଣରେ ଜଙ୍ଗଲ ବାହାରକୁ ଚାଲି ଆସୁଛନ୍ତି। ଏହି ସମୟରେ ମଣିଷ ଓ ହାତୀ ମଧ୍ୟରେ ଲଢ଼େଇ ହେବା ସହ ଉଭୟ ବିପଦରେ ପଡ଼ୁଛନ୍ତି। ଦୁଇଦିନ ପୂର୍ବେ ଜଗନ୍ନାଥପ୍ରସାଦ ରେଞ୍ଜରେ ହାତୀ ଆକ୍ରମଣରେ ଜଣେ ମହିଳା ମୃତ୍ୟୁବରଣ କରିଥିଲେ। ଏହା ପୁର୍ବରୁ ଶିକାରୀ ଆକ୍ରମଣରେ ଗୋଟିଏ ହାତୀ ମୁଜାଗଡ ରେଞ୍ଜରେ ମୃତ୍ୟୁବରଣ କରିଛିି। ଏହିଭଳି ପରିସ୍ଥିତିରେ ତାରସିଂ ପୋଲିସ ଶୁକ୍ରବାର ରାତିରେ ଖୁରୁଡୁଗୋଛା ଜଙ୍ଗଲରୁ ଜଣେ ଶିକାରୀଙ୍କୁ ଗିରଫ କରିଛନ୍ତି । ସେ ହେଲେ ବିଶ୍ୱନାଥ ବାଗ। ତାଙ୍କ ଠାରୁ ଦୁଇଟି ଚୋରା ବନ୍ଧୁକ ଜବତ କରାଯାଇଛି। ବାଗ ବନ୍ୟପ୍ରାଣୀ ଶିକାରୀ ପାଇଁ ଜଙ୍ଗଲ ଭିତରେ ଘୁରି ବୁଲୁଥିବା ବେଳେ କୌଣସି ସୂତ୍ରରୁ ପୋଲିସ ସୂଚନା ପାଇ ଅଭିଯୁକ୍ତଙ୍କୁ ଗିରଫ କରିଥିଲେ। ଶନିବାର ଅପରାହ୍ନରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଅନେକ ସମୟରେ ଶିକାରୀମାନେ ଜଙ୍ଗଲରେ ଅବାଧରେ ଘୁରି ବୁଲୁଥିବା ଅଭିଯୋଗ ହେଉଛି।
ଅନ୍ୟପଟେ ହାତୀମାନେ ଖାଦ୍ୟ ଅନ୍ବେଷଣରେ ଜଙ୍ଗଲରୁ ବାହାରି ଶୁକ୍ରବାର ରାତିରେ ଦୁବସ୍ଥିତ ସୁଶାନ୍ତ ପ୍ରଧାନଙ୍କ
କୃଷି ଫାମ୍ରେ ଲକ୍ଷାଧିକ ଟଙ୍କାର ଫସଲ କ୍ଷତି କରିଛନ୍ତି। ସୁଶାନ୍ତ ଲଗାଇଥିବା ୭୦୦ ପାମ ଗଛକୁ ହାତୀପଲ ପଶି ସମ୍ପୂର୍ଣ୍ଣ ନଷ୍ଟ କରିଦେଇଛନ୍ତି। ଏଥିସହ ଗୋଦାମ ଘରେ ଥିବା ୨୦ରୁ ଊର୍ଦ୍ଧ୍ୱ ମାଛ ଦାନା ପ୍ୟାକେଟକୁ ବୋହି ନେଇ ପୋଖରୀରେ ପକାଇ ଦେଇଛନ୍ତି। ଏଥିସହ ପାଣି ପାଇପ ଉପାଡ଼ି ନଷ୍ଟ କରିଦେଇଛନ୍ତି। ଯାହାକୁ ନେଇ ଚାଷୀ ସୁଶାନ୍ତ ପ୍ରଧାନ ହତୋତ୍ସାହିତ ହୋଇପଡିଛନ୍ତି। ଏଥିସହ ସୋସିଆଲ ମିଡିଆରେ ଚାଷୀ ମାନଙ୍କ ପ୍ରତି କିଭଳି ଜଙ୍ଗଲ ଓ ବିଦ୍ୟୁତ୍ ବିଭାଗ ପକ୍ଷରୁ ଅବହେଳା କରାଯାଉଛି ସେନେଇ ନିଜର ଅସନ୍ତୋଷ ବ୍ୟକ୍ତ କରିଛନ୍ତି। ହାତୀ ଯେଉଁ ଆଡ଼େ ଯାଉଛନ୍ତି ସେହି ଅଞ୍ଚଳରେ ବିଦ୍ୟୁତ୍ ସେବାକୁ ରାତି ତମାମ କାଟିଦିଆଯାଉଛି । ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଆଗକୁ ସମସ୍ତ ବୋର୍ଡ ପରୀକ୍ଷା। ଏହିଭଳି ଯଦି ବିଦ୍ୟୁତ୍ କାଟ ହେବ ତେବେ ଏହାଦ୍ବାରା ଛାତ୍ରୀଛାତ୍ର ମାନଙ୍କ ଭବିଷ୍ୟତ ପ୍ରଭାବିତ ହେବାର ସମ୍ଭାବନା ରହିଛି। ତେଣୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାର ଆବଶ୍ୟକତା ରହିଛି।
