ନୋଏଡା, ୩୦।୬- କରୋନାରେ ମୃତ୍ୟୁବରଣ କରିଥିବା ଜଣେ ଯୁବକଙ୍କ ପରିବାରକୁ ମେଡିକାଲ ପକ୍ଷରୁ ଚିକିତ୍ସା ଖର୍ଚ୍ଚ ବାବଦକୁ ୧୪ ଲକ୍ଷ ଟଙ୍କା ବିଲ୍ ଦିଆଯାଇଛି। ନୋଏଡାର ଗୌତମ ବୁଦ୍ଧ ନଗର ଅଞ୍ଚଳରେ ଏଭଳି ଏକ ଘଟଣା ଏବେ ସାମ୍ନାକୁ ଆସିଛି। କରୋନାରେ ଆକ୍ରାନ୍ତ ହେବାପରେ ଜଣେ ଯୁବକଙ୍କୁ ପରିବାର ଲୋକ ଜୁନ ୭ରେ ଚିକିତ୍ସା ପାଇଁ ସ୍ଥାନୀୟ ଏକ ବେସରକାରୀ ମେଡିକାଲକୁ ନେଇଯାଇଥିଲେ। ଭେଣ୍ଟିଲେଟରରେ ୧୫ ଦିନ ଓ ମୋଟ୍ ଉପରେ ମେଡିକାଲରେ ୨୦ ଦିନ ରହିବା ପରେ ଶେଷରେ ବ୍ୟକ୍ତି ଜଣକ ମୃତ୍ୟୁବରଣ କରିଥିଲେ। ଏହାପରେ ମେଡିକାଲ ପକ୍ଷରୁ ଚିକିତ୍ସା ଖର୍ଚ୍ଚ ବାବଦକୁ ପରିବାରକୁ ୧୪ ଲକ୍ଷ ଟଙ୍କାର ବିଲ୍ ଧରାଇ ଦିଆଯାଇଥିଲା। ତେବେ ବ୍ୟକ୍ତିଙ୍କ ଇନସୁରାନ୍ସ ବାବଦକୁ ୪ ଲକ୍ଷ ଟଙ୍କା କଟିଯିବା ପରେ ସଂଶୋଧିକ ବିଲ୍ ୧୦ ଲକ୍ଷ ଟଙ୍କା ଆସିଥିଲା। ଏହାପରେ ପରିବାର ଲୋକେ ୨୫ ହଜାର ଟଙ୍କା ପ୍ରଦାନ କରି ଏକ ଷ୍ଟାମ୍ପ୍ ପେପରରେ ଆଇନଗତ ଘୋଷଣାନାମା କରିବା ପରେ ମୃତ ଦେହ ମେଡିକାଲ ପକ୍ଷରୁ ହସ୍ତାନ୍ତର କରାଯାଇଥିଲା। ପରେ ପରିବାର ଲୋକ ମେଡିକାଲ ବିଲ୍ ନେଇ ଜିଲା ସ୍ବାସ୍ଥ୍ୟ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି। ଏହି ଘଟଣା ଉପରେ ଅନୁଧ୍ୟାନ କରାଯିବ ବୋଲି ଜିଲା ସ୍ବାସ୍ଥ୍ୟ ଅଧିକାରୀ କହିଛନ୍ତି।
