ଦାରିଙ୍ଗବାଡ଼ି, ୨୫।୮ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ଅନ୍ତର୍ଗତ ସିକନବାଡ଼ି ଗ୍ରାମରେ ଜମି ବିବାଦ ଓ ଗୁଣିଗାରେଡ଼ି ସନ୍ଦେହକୁ ନେଇ ମିଶ୍ର ପ୍ରଧାନଙ୍କୁ ନିର୍ମମ ଭାବେ ହତ୍ୟା କରାଯିବା ଘଟଣାରେ ପୋଲିସ ବୁଧବାର ଆଉ ୨ ଜଣ ମହିଳାଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଦୁଇ ମହିଳା ହେଲେ ସିକନବାଡ଼ି ଗ୍ରାମର ବିସ୍ତାଜିନି ପ୍ରଧାନ ଓ ନଳିତା ପ୍ରଧାନ। ଏହି ଦୁଇ ମହିଳାଙ୍କ ଗିରଫ ପରେ ଘଟଣାରେ ମୋଟ ଗିରଫଦାରୀ ସଂଖ୍ୟା ୧୦ରେ ପହଞ୍ଚିଥିବା ନେଇ ଥାନାଧିକାରୀ (ଆଇଆଇସି) ସଂଗ୍ରାମ କେଶରୀ ଜେନା ସୂଚନା ଦେଇଛନ୍ତି।
ସୂଚନା ଯୋଗ୍ୟ ଯେ, ମୃତ ମିଶ୍ର ପ୍ରଧାନଙ୍କ ସହ ତାଙ୍କର ୨ ପୁତୁରାଙ୍କର ଦୀର୍ଘ ଦିନରୁ ଜମିଜମା ବିବାଦ ଲାଗିରହିଥିଲା। ଏହାକୁ ନେଇ ମିଶ୍ର ନିଜ ପୁତୁରାମାନଙ୍କୁ ବାରମ୍ବାର ଧମକଚମକ ଦେଇ ଆସୁଥିଲେ। ଏଥିସହିତ ସେ ଗୁଣିଗାରେଡ଼ି କରୁଥିବା ନେଇ ମଧ୍ୟ ଗ୍ରାମବାସୀଙ୍କ ମନରେ ସନ୍ଦେହ ବୃଦ୍ଧି ପାଇଥିଲା। ଏହାକୁ ନେଇ ଗାଁରେ ଏକ ବୈଠକ ବସିବା ପରେ ଗ୍ରାମର ଏକାଧିକ ଲୋକ ମିଶ୍ରଙ୍କୁ ଜଙ୍ଗଲ ଭିତରକୁ ନେଇ ପିଟି ପିଟି ହତ୍ୟା କରିଥିଲେ। ପରେ ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ମୃତଦେହକୁ ପୋଡ଼ି ଦେଇଥିଲେ।
କୌଣସି ସୂତ୍ରରୁ ଖବର ପାଇ ଦାରିଙ୍ଗବାଡ଼ି ପୋଲିସ ମାମଲା (କେସ୍ ନଂ. ୨୧୨/୨୬) ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ପୂର୍ବରୁ ଅଗଷ୍ଟ ୧୭ ତାରିଖରେ ୨ ଜଣଙ୍କୁ, ମଙ୍ଗଳବାର ୬ ଜଣଙ୍କୁ ଏବଂ ବୁଧବାର/ଗୁରୁବାର ଆଉ ୨ ଜଣ ମହିଳାଙ୍କୁ ଗିରଫ କରିଛି। ଏହି ହତ୍ୟାକାଣ୍ଡରେ ଅନ୍ୟ କାହାର ସମ୍ପୃକ୍ତି ଅଛି କି ନାହିଁ, ସେ ନେଇ ପୋଲିସ ଅଧିକ ତଦନ୍ତ ଜାରି ରଖିଛି।
