କେନ୍ଦ୍ରାପଡ଼ା ଅଫିସ, ୧୪ା୧୨: କେନ୍ଦ୍ରାପଡ଼ା ଜିଲା ରାଜନଗର ବ୍ଲକ ଭିତରଗଡ଼ ପଞ୍ଚାୟତର ଶିଳାପୋଖରୀ ଗ୍ରାମରେ ଅନୁଷ୍ଠିତ ହୋଇଥିବା ମମତା ଦିବସ ଶିବିରରେ ମାତୃ, ଶିଶୁ ଓ ଗର୍ଭବତୀ ମହିଳାଙ୍କ ଓଜନ, ରକ୍ତ ପରୀକ୍ଷା ଓ ହିମୋଗ୍ଲୋବିନ ପରୀକ୍ଷା ଭଳି ଅନେକ ପରୀକ୍ଷା ନିମନ୍ତେ ଏହି ଶିବିର ଅନୁଷ୍ଠିତ ହୋଇଛି। ମାତ୍ର ଏହି ପଞ୍ଚାୟତରେ ଏଏନ୍ଏମ୍ ସେଣ୍ଟର ନ ଥିବାରୁ ଅଙ୍ଗନଓ୍ବାଡି କେନ୍ଦ୍ରରେ ମମତା ଦିବସ କରିବାକୁ ଚୟନ କରାଯାଇଥିଲା। କିନ୍ତୁ ଅଙ୍ଗନଓ୍ବାଡି କେନ୍ଦ୍ରର କର୍ମୀ ଏବଂ ସହାୟିକାଙ୍କ ଅନଶନ କାରଣରୁ ମମତା ଦିବସ କାର୍ଯ୍ୟକ୍ରମ ବାରଣ୍ଡାରେ ହୋଇଥିଲା।
ସୂଚନାଥାଉ କି, ଶିଶୁ ଓ ଗର୍ଭବତୀ ମହିଳାଙ୍କ ଚିକିତ୍ସା ପାଇଁ ରାଜ୍ୟ ସରକାର ମମତା ଦିବସ ଭଳି ଏକ ସୁନ୍ଦର କାର୍ଯ୍ୟକ୍ରମ ଗଁା ଗହଳିରେ କରାଇବାକୁ ପଦକ୍ଷେପ ନେଇଛନ୍ତି। ସେହିପରି ରାଜନଗର ବ୍ଲକ ଭିତରଗଡ଼ ପଞ୍ଚାୟତ ଶିଳାପୋଖରୀ ଗ୍ରାମରେ ପ୍ରତ୍ୟେକ ମାସ ଦ୍ୱିତୀୟ ମଙ୍ଗଳବାର ଅଙ୍ଗନଓ୍ବାଡି କେନ୍ଦ୍ରରେ ମମତା ଦିବସ କାର୍ଯ୍ୟକ୍ରମ ଅନୁଷ୍ଠିତ ହୋଇଆସୁଛି। ପ୍ରତ୍ୟେକ ମାସ ପରି ମଙ୍ଗଳବାର ମମତା ଦିବସ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ସରକାରଙ୍କ ନିର୍ଦ୍ଦେଶକ୍ରମେ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଜଣେ ଡାକ୍ତର ସହ ଶିଳାପୋଖରୀ ଗ୍ରାମର ଆଶା୍କର୍ମୀ ଜାନକୀ ମଣ୍ଡଳ ଏହି କାର୍ଯ୍ୟକ୍ରମରେ ଉପସ୍ଥିତ ରହିଥିଲେ। ମାତ୍ର ଦିନ ୧୦ଟା ପର୍ଯ୍ୟନ୍ତ ଅଙ୍ଗନଓ୍ବାଡି କେନ୍ଦ୍ର ବନ୍ଦ ଥିବାରୁ ଉକ୍ତ କେନ୍ଦ୍ରର ଦାୟିତ୍ୱରେ ଥିବା କର୍ମୀଙ୍କୁ ଫୋନ ଯୋଗେ ଯୋଗାଯୋଗ କରିବାରୁ ଆମେ ଅନଶନରେ ଅଛୁ କେନ୍ଦ୍ର ଖୋଲିବୁନି କି କାହାକୁ ଚାବି ଦେଇପାରିବୁ ନାହିଁ ବୋଲି ରୋକଠୋକ ମନା କରିଦେଇଥିଲେ। ଏଥିନେଇ ମମତା ଦିବସ ଅଙ୍ଗନଓ୍ବାଡି କେନ୍ଦ୍ରର ବାରଣ୍ଡାରେ ଅନୁଷ୍ଠିତ ହୋଇଥିଲା। ମାତ୍ର ସମସ୍ତ ସାମଗ୍ରୀ ଅଙ୍ଗନଓ୍ବାଡି କେନ୍ଦ୍ରରେ ଥିବା କାରଣରୁ ଆସିଥିବା ମହିଳା ଏବଂ ଶିଶୁ ଫେରିଯାଇଥିବାର ଦୃଶ୍ୟ ଦେଖିବାକୁ ମିଳିଥିଲା। ମମତା ଦିବସରେ ଚିକିତ୍ସା ହେବାକୁ ଆସୁଥିବା ମାତୃ ଏବଂ ଶିଶୁଙ୍କ ଚିକିତ୍ସା ଓ ଓଜନ ଯନ୍ତ୍ର ବନ୍ଦ ଥିବା ଅଙ୍ଗନଓ୍ବାଡି କେନ୍ଦ୍ରରେ ଥିବାରୁ ଆସିଥିବା ମାତୃ ଏବଂ ଶିଶୁଘରକୁ ଫେରିଗଲେ ବୋଲି ଶିଳାପୋଖରୀ ଗ୍ରାମର ଆଶାକ୍ରମୀ କହିଛନ୍ତି। ଏନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି। ଏନେଇ ସୁପରଭାଇଜର ରାଜନୀ ରାଉଳଙ୍କୁ ପଚାରିବାରୁ ମମତା ଦିବସ କାର୍ଯ୍ୟକ୍ରମ ପାଇଁ ଅଙ୍ଗନଓ୍ବାଡି କେନ୍ଦ୍ର ଖୋଲିବା ଅନଶନ ସହ ଏହାର କିଛି ଯାଏ ଆସ ନାହଁି। ସେ କାହିଁକି ଖୋଲି ନାହାନ୍ତି ମୁଁ ପଚାରି ବୁଝିବି ବୋଲି ସୁପରଭାଇଜର ରାଜନୀ କହିଥିଲେ।
