ମୁମ୍ବାଇ,୧୦ା୬: କେନ୍ଦ୍ର ସରକାର ସୀମାରେ ଅପେକ୍ଷା କରନ୍ତୁ ନାହିଁ। କରୋନା ଭାଇରସ୍ ଆମର ସବୁଠୁ ବଡ଼ ଶତ୍ରୁ। ଏହାକୁ ଶେଷ କରିବାକୁ ପଡ଼ିବ। କେନ୍ଦ୍ରର ଆଭିମୁଖ୍ୟ କରୋନା ଉପରେ ସର୍ଜିକାଲ ଷ୍ଟାଇକ୍ ଭଳି ହେବା ଆବଶ୍ୟକ ବୋଲି ବୁଧବାର ବମ୍ବେ ହାଇକୋର୍ଟ ପରାମର୍ଶ ଦେଇଛନ୍ତି।
ବମ୍ବେ ହାଇକୋର୍ଟରେ ଦୁଇଜଣ ଓକିଲ ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାଏର କରିଥିଲେ। କେନ୍ଦ୍ର ସରକାର ୭୫ରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତିମାନଙ୍କ ଘର ଘର ବୁଲି ଟିକା ଦିଅନ୍ତୁ ବୋଲି ଉଭୟେ ଉକ୍ତ ପିଟିଶନରେ ଦାବି କରିଥିଲେ। ଶୁଣାଣି ବେଳେ ଏପରି ସମ୍ଭବ ନୁହେଁ ବୋଲି କେନ୍ଦ୍ର ପକ୍ଷରୁ ଯୁକ୍ତି ବଢ଼ାଯାଇଥିଲା। ମୁଖ୍ୟ ବିଚାରପତି ଦୀପଙ୍କର ଦତ୍ତା ଓ ଜଷ୍ଟିସ୍ ଜି.ଏସ୍. କୁଲକର୍ନୀଙ୍କୁ ନେଇ ଗଠିତ ଖଣ୍ଡପୀଠ ସରକାରଙ୍କ ଟିକାକରଣ କାର୍ଯ୍ୟକ୍ରମକୁ ନାପସନ୍ଦ କରିଛନ୍ତି। କହିଛନ୍ତି, ଘର ପାଖ ଟିକାକେନ୍ଦ୍ରକୁ ଜନସାଧାରଣ ଆସି ଟିକା ନେବା ଲାଗି ବ୍ୟବସ୍ଥା କରାଯାଇଛି। ଏହା ଭୂତାଣୁ ବାହକମାନଙ୍କୁ କେନ୍ଦ୍ରକୁ ଆସିବା ପାଇଁ ଅପେକ୍ଷା କଲାଭଳି। ସବୁଠୁ ବଡ଼ ଶତ୍ରୁ ଭୂତାଣୁ ନିର୍ଦ୍ଦିଷ୍ଟ ଅଞ୍ଚଳ ବା ଯେକୌଣସି ବ୍ୟକ୍ତିଙ୍କଠାରେ ଥାଇପାରେ, ଯେଉଁମାନେ ବାହାରକୁ ଆସିବାକୁ ଅସମର୍ଥ। ତେଣୁ ସ୍ବାସ୍ଥ୍ୟ କର୍ମଚାରୀମାନଙ୍କୁ ଉକ୍ତ ଅଞ୍ଚଳରେ ପଶି ସର୍ଜିକାଲ ଷ୍ଟ୍ରାଇକ କରିବାକୁ ହେବ ବୋଲି ମୁଖ୍ୟ ବିଚାରପତି କହିଥିଲେ। ସରକାର ଜନସାଧାରଣଙ୍କ କଲ୍ୟାଣ ଲାଗି ନିଷ୍ପତ୍ତି ନେଇଛନ୍ତି, କିନ୍ତୁ ଏହା ବିଳମ୍ବିତ ହେବାରୁ ବହୁ ଜୀବନହାନି ଘଟିଲା ବୋଲି ଜଷ୍ଟିସ୍ ଦତ୍ତ କହିଥିଲେ। ୭୫ ବର୍ଷରୁ ଊର୍ଦ୍ଧ୍ୱ ବରିଷ୍ଠ ନାଗରିକ, ଭିନ୍ନକ୍ଷମ, ହ୍ବିଲ୍ଚେୟାର ଉପରେ ନିର୍ଭର କରୁଥିବା କିମ୍ବା ରୋଗଶଯ୍ୟାରେ ଥିବା ଲୋକଙ୍କ ଲାଗି ସରକାର ଘରକୁ ଘର ଟିକାକରଣ କାର୍ଯ୍ୟକ୍ରମ ଆରମ୍ଭ କରିବା ଲାଗି ଆଇନଜୀବୀ ଧ୍ରୁତି କାପାଡିଆ ଏବଂ କୁନାଲ ତିଓ୍ବାରି ହାଇକୋର୍ଟରେ ଜନସ୍ବାର୍ଥ ମାମଲା ଦାଏର କରିଥିଲେ।
ସକ୍ରିୟ ମାମଲା ୪.୨୩%କୁ ହ୍ରାସ
ଦେଶରେ କ୍ରମାଗତ ଦୁଇ ଦିନ ଧରି ଦୈନିକ କରୋନା ସଂକ୍ରମଣ ଲକ୍ଷେ ତଳେ ରହିଛି। ଗତ ୨୪ ଘଣ୍ଟାରେ ୯୨,୫୯୬ ଜଣ ସଂକ୍ରମିତ ହୋଇଥିବାବେଳେ ମୋଟ ସଂକ୍ରମିତଙ୍କ ସଂଖ୍ୟା ୨,୯୦,୮୯,୦୬୯ରେ ପହଞ୍ଚିଛି। ସମୁଦାୟ ସକ୍ରିୟ ମାମଲା ୧୨,୩୧,୪୧୫କୁ ହ୍ରାସ ପାଇଛି ଯାହା କି ମୋଟ ଆକ୍ରାନ୍ତଙ୍କ ୪.୨୩ ପ୍ରତିଶତ। ସେହିପରି ଦିନକରେ ୨,୨୧୯ ଜଣଙ୍କ ମୃତ୍ୟୁ ଘଟିଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ବୁଧବାର ସୂଚନା ଦିଆଯାଇଛି। ସେହିପରି ଆରୋଗ୍ୟ ହାର ୯୪.୫୫ ପ୍ରତିଶତକୁ ବୃଦ୍ଧି ପାଇଛି। ମଙ୍ଗଳବାର ମୋଟ ୧୯,୮୫,୯୬୭ ନମୁନା ପରୀକ୍ଷା ହୋଇଥିଲା। ଦୈନିକ ପଜିଟିଭ୍ ହାର ୪.୬୬% ରହିଥିବାବେଳେ କ୍ରମାଗତ ୧୬ ଦିନ ପାଇଁ ଏହା ୧୦ ପ୍ରତିଶତ ତଳେ ରହିଛି।
