ବ୍ରହ୍ମପୁର, ୧୯।୯ (ସୁବାସ ଚନ୍ଦ୍ର ପାଢ଼ୀ): ପାର୍ବଣ ଋତୁ ପାଖେଇ ଆସୁଥିବା ବେଳେ ବ୍ରହ୍ମପୁର ଅଞ୍ଚଳରେ ଗଞ୍ଜେଇ ମାଫିଆଙ୍କ ପ୍ରାଦୁର୍ଭାବ ବୃଦ୍ଧି ପାଇବାରେ ଲାଗିଛି। ତେବେ ଅବକାରୀ ଗୋଇନ୍ଦା ବିଭାଗ ପକ୍ଷରୁ ସ୍ୱତନ୍ତ୍ର ଚଢ଼ାଉ କରାଯାଇ ୫୬ କେଜି ଗଞ୍ଜେଇ ଜବତ କରାଯିବା ସହ ୪ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଏହାସହ ଏକ କାର୍, ସ୍କୁଟି ଓ ୩ଟି ମୋବାଇଲ୍ ଫୋନ୍ ମଧ୍ୟ ଜବତ ହୋଇଛି।
ଅବକାରୀ ଗୋଇନ୍ଦା ଡିଏସପି ଶୃତିକାନ୍ତ ରାଉତଙ୍କ ନିର୍ଦ୍ଦେଶକ୍ରମେ ଅବକାରୀ ବିଭାଗର ଦୁଇଟି ଅଲଗା ଅଲଗା ଟିମ୍ ପୃଥକ ସ୍ଥାନରେ ଏହି ବିଶେଷ ଅପରେସନ୍ ଚଲାଇଥିଲେ। କନ୍ଧମାଳ ଜିଲାରୁ ଗଞ୍ଜେଇ ଆଣି କାର୍ ଯୋଗେ ୫୦ କେଜି ଗଞ୍ଜେଇ ପଶ୍ଚିମବଙ୍ଗ ଚାଲାଣ କରାଯାଉଥିବା ବେଳେ ସ୍କୁଟିରେ ୬ କେଜି ଗଞ୍ଜେଇ ବ୍ରହ୍ମପୁର ସହରକୁ ଅଣାଯାଉଥିବା ଜେରା ସମୟରେ ଜଣାପଡ଼ିଛି।
ପ୍ରଥମ ଘଟଣାରେ, ଶନିବାର ଭୋର ସମୟରେ ଅବକାରୀ ଟିମ୍ ସଦର ଥାନା ଅନ୍ତର୍ଗତ ଆଙ୍କୁଶପୁର ଛକ ନିକଟରେ ଏକ କାର୍ (OD-02K-5722) କୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ସମୟରେ ଗାଡ଼ିର ଡିକି ଭିତରେ କ୍ରସର ବେଲ୍ଟରେ ଗୋଡ଼ାଇ ରୋଲର କରାଯାଇ ରଖାଯାଇଥିବା ୫୦ କେଜି ଗଞ୍ଜେଇ ଜବତ ହୋଇଥିଲା। ଏହି ଘଟଣାରେ କନ୍ଧମାଳ ଜିଲ୍ଲା ଟିକାବାଲି ଥାନା ଦୁଗୁଡି ଗ୍ରାମର କାଳିଆ କହଁର (୨୫), ପଶ୍ଚିମବଙ୍ଗ ମୁର୍ସିଦାବାଦର ଦୀପକ ମଣ୍ଡଳ (୨୨) ଓ କୌଶିକ କରମାକର (୨୦)ଙ୍କୁ ଗିରଫ କରାଯାଇଛି। ସେମାନଙ୍କ ନାମରେ ମାମଲା ନଂ ୩୮୫/୨୬-୨୭ ରୁଜୁ କରାଯାଇ କୋର୍ଟ ଚାଲାଣ କରାଯାଇଛି।
ସେହିପରି ଦ୍ୱିତୀୟ ଘଟଣାରେ, ଅନ୍ୟ ଏକ ଅବକାରୀ ଟିମ୍ ନିମଖଣ୍ଡି ଥାନା ଅନ୍ତର୍ଗତ ଜଗଦଳପୁର ନିକଟରେ ଏକ ସ୍କୁଟି (OD-05AB-5039) କୁ ଅଟକାଇ ୬ କେଜି ଗଞ୍ଜେଇ ଜବତ କରିଥିଲେ। ସେଠାରୁ ଜଣେ ଅଭିଯୁକ୍ତ ଫେରାର ହୋଇଯାଇଥିବା ବେଳେ କନ୍ଧମାଳ ବାଲିଗୁଡ଼ା ଥାନା ଅଞ୍ଚଳର ଅଜିତ ମଲିକ (୨୫)ଙ୍କୁ ଗିରଫ କରାଯାଇଛି। ତାଙ୍କ ନାମରେ ମାମଲା ନଂ ୩୮୬/୨୬-୨୭ ରୁଜୁ କରାଯାଇ କୋର୍ଟ ଚାଲାଣ କରାଯାଇଛି।
ଆଗାମୀ ଦିନରେ ଏହିପରି ଚଢ଼ାଉ ଏବଂ କଡ଼ା ଯାଞ୍ଚ ପ୍ରକ୍ରିୟା ଜାରି ରହିବ ବୋଲି ଡିଏସପି ଶୃତିକାନ୍ତ ରାଉତ ସୂଚନା ଦେଇଛନ୍ତି। ଏହି ଚଢ଼ାଉରେ ଏସଆଇ ଗିରିଜା ନନ୍ଦନ ଜେନା, ଏଏସଆଇ ଅମରଜିତ ସାହୁ, କନେଷ୍ଟବଳ ପ୍ରବୀର ସାମଲ, ସନ୍ତୋଷ ନାୟକ, କୁମୁଦ ପ୍ରଧାନ ଓ ପରେଶ ବେହେରା ପ୍ରମୁଖ ସାମିଲ ଥିଲେ।
