ଗୋପବନ୍ଧୁନଗର,୨୯।୪ (ଡି.ଏନ.ଏ.): ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଏକ ଆଦିବାସୀ ଅଧ୍ୟୁଷିତ ଅଞ୍ଚଳ। ଚାଷ ଏହି ଅଞ୍ଚଳ ଲୋକଙ୍କ ପ୍ରଧାନ ଜୀବିକା ହୋଇଥିଲେ ମଧ୍ୟ ଜଙ୍ଗଲଜାତ ଦ୍ରବ୍ୟ ବିକ୍ରି କରି ସେମାନେ ନିଜର ଗୁଜୁରାଣ ମେଣ୍ଟାଇଥାନ୍ତି। ମହୁଲ, ଝୁଣା, ଲାଖ, ମହୁ, ଶାଳମଞ୍ଜି ପ୍ରଭୃତି ବନଜାତ ଦ୍ରବ୍ୟ ବର୍ଷ ସାରା ସ୍ଥାନୀୟ ଜଙ୍ଗଲରୁ ସଂଗ୍ରହ କରିଥାନ୍ତି। ମାତ୍ର ପରିତାପର ବିଷୟ ସେମାନେ ଏହାର ଉଚିତ ମୂଲ୍ୟ ପାଇ ନ ପାରି ଦଲାଲମାନଙ୍କ ଦ୍ୱାରା ଶୋଷଣର ଶିକାର ହେଉଛନ୍ତି। ଏବେ ଜଙ୍ଗଲରେ ମହୁଲ ଫୁଲ ଝଡ଼ିବା ସମୟ। ବଣ ଭିତରକୁ ପଶି ଗଲେ ମହ ମହ ହୋଇ ବାସୁଛି ମହୁଲ ଫୁଲ। ଚୈତ୍ର ମାସରେ ବିଶେଷ କରି ମହୁଲ ଭଳି ବନ୍ୟଜାତ ଦ୍ରବ୍ୟକୁ ସଂଗ୍ରହ କରିଥାନ୍ତି ଆଦିବାସୀମାନେ। ଜଙ୍ଗଲଗୁଡ଼ିକ ଗଁାକୁ ଲାଗିଥିବାରୁ ପ୍ରତି ପରିବାରର ଛୁଆପିଲାଙ୍କଠାରୁ ମହିଳାଙ୍କ ପର୍ଯ୍ୟନ୍ତ ଚାଲିଯାଆନ୍ତି ମହୁଲ ସାଉଁଟିବାକୁ। ପରିବାର ପିଛା ୫ରୁ ୧୦ କେଜି ପର୍ଯ୍ୟନ୍ତ ଦୈନିକ ସଂଗ୍ରହ କରିଥାନ୍ତି। ପରେ ଏହାକୁ ବିକ୍ରି କରି ପ୍ରତିବଦଳରେ ଖାଦ୍ୟ ସାମଗ୍ରୀ କିଣିଥାନ୍ତି। ଏହି ବ୍ଲକର ବଣ ପାହାଡ଼ ଘେରା ଆରପଟା, କୁଶଳଦା, ଜୟପୁର, ବରଡିହି, କୁଆମରା, ଶୀଳଘାଟି, ରାଣୀବନ୍ଧ, ଭଣ୍ଡଗାଁ ପ୍ରଭୃତି ପଞ୍ଚାୟତର ଲୋକେ ଜଙ୍ଗଲଜାତ ଦ୍ରବ୍ୟ ପରେ ନିର୍ଭର କରନ୍ତି। ଉକ୍ତ ଅଞ୍ଚଳ ତଥା ଜିଲାର ବିଭିନ୍ନ ସ୍ଥାନରେ ସରକାରୀ ଓ ବେସରକାରୀ ଦେଶୀ ମଦ କାରଖାନା ଗଢ଼ି ଉଠିଥିବାରୁ ପ୍ରାୟତଃ ମହୁଲର ଚାହିଦା ଅଧିକ। ତେବେ ମହୁଲ ସଂଗ୍ରହ କରି ରଖିଥିବା ଆଦିବାସୀଙ୍କଠାରୁ ଦଲାଲମାନେ ଓଜନ ପରିବର୍ତ୍ତେ ଟୋକେଇ ପିଛା ୫/୧୦ ଟଙ୍କା ଦେଇ କିଣି ଆଣନ୍ତି। ଅନ୍ୟପକ୍ଷରେ ସରକାରଙ୍କ ପକ୍ଷରୁ ମହୁଲ ଫୁଲ ବିକ୍ରି ପାଇଁ ମଣ୍ଡି ବ୍ୟବସ୍ଥା ନ ଥିବାରୁ ଆଦିବାସୀମାନେ ଉଚିତ ମୂଲ୍ୟ ପାଇ ପାରୁ ନାହଁାନ୍ତି। ଯଦି ମଣ୍ଡି ଖୋଲିବା ବ୍ୟବସ୍ଥା ହୁଅନ୍ତା ତେବେ ପରିଶ୍ରମର ମୂଲ୍ୟ ମିଳିପାରନ୍ତା ବୋଲି କୁଶ ସିଂ, ହରିଶ ଚନ୍ଦ୍ର ସିଂ, ରାମରାଏ ମାଝି, ପ୍ରତାପ ନାଏକ ଓ ଦୀପକ ବାଘରାଏ ପ୍ରମୁଖ ଗ୍ରାମବାସୀ କହିଛନ୍ତି।
