ଭୁବନେଶ୍ୱର/ଢେଙ୍କାନାଳ, ୧୬।୬(ଅନିଲ ଦାସ/ରତନ ନାୟାର): ଢେଙ୍କାନାଳ ଜିଲା ଗଁଦିଆ ବ୍ଲକ ଯୋରନ୍ଦାସ୍ଥିତ ବିଶ୍ୱପ୍ରସିଦ୍ଧ ମହିମା ଧର୍ମପୀଠର କାୟାକଳ୍ପ ସମ୍ପୂର୍ଣ୍ଣ ବଦଳିବ। ଏହାର ଉନ୍ନତୀକରଣ ସମ୍ପର୍କିତ ୧୧୨ କୋଟି ଟଙ୍କାର ପ୍ରକଳ୍ପ ପ୍ରସ୍ତାବକୁ ଗୁରୁବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି। ଗତ ମେ’ ୨୯ରେ ୫-ଟି ସଚିବ ଭି.କେ. ପାଣ୍ଡିଆନ ଯୋରନ୍ଦା ପରିଦର୍ଶନ କରି ପୀଠର ସର୍ବାଙ୍ଗୀନ ଉନ୍ନତି ନିମନ୍ତେ ସାଧୁସନ୍ଥ, ଶ୍ରଦ୍ଧାଳୁଙ୍କ ସହ ଆଲୋଚନା କରିଥିଲେ। ୧୫ଦିନ ମଧ୍ୟରେ ପ୍ରକଳ୍ପ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦେଇଥିଲେ। ଜିଲାପାଳ ସରୋଜ କୁମାର ସେଠୀ ଏ ସଂକ୍ରାନ୍ତ ସବିଶେଷ ପ୍ରସ୍ତାବ ଉପସ୍ଥାପନ କରିବା ପରେ ରାଜ୍ୟ ସରକାରଙ୍କ ପକ୍ଷରୁ ଏହାକୁ ତ୍ୱରିତ ଅନୁମୋଦନ ମିଳିଛି।
ଜିଲାପାଳଙ୍କ ପ୍ରସ୍ତାବରେ ସମାଧି ମନ୍ଦିର ପୁନଃନିର୍ମାଣ, କୌପୀନଧାରୀ ମହିମା ଧର୍ମ ଉପାସନାସ୍ଥଳୀ ପୁନଃନିର୍ମାଣ, ପ୍ରାର୍ଥନା ଗୃହ, ପାଚେରି, ପୁଷ୍କରିଣୀ ପୁନରୁଦ୍ଧାର, ବସ୍ଷ୍ଟାଣ୍ଡ, ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ଆଦି ତିଆରି କରାଯିବ। ଆଭ୍ୟନ୍ତରୀଣ ସଡ଼କ ତିଆରି ସହ ପୀଠ ପରିସର ସମ୍ପୂର୍ଣ୍ଣ ଆଲୋକୀକରଣ ହେବ। ଯୋରନ୍ଦା ଜଗନ୍ନାଥ ମନ୍ଦିରଠାରୁ ସ୍କୁଲ ପଡ଼ିଆ ପର୍ଯ୍ୟନ୍ତ ରାସ୍ତା ନିର୍ମାଣ କରାଯିବ। ସୌନ୍ଦର୍ଯ୍ୟକରଣ ପାଇଁ ପୂର୍ବପଟ ବଡ଼ ପୋଖରୀର ପୁନରୁଦ୍ଧାର ହେବ। ଚୟନ କରାଯାଇଥିବା ସ୍ଥାନରେ ୨୦୦ ତାଳଗଛ ଓ ୨୦୦ ବରଗଛ ଲଗାଯିବ। ସାମୂହିକ ପ୍ରାର୍ଥନାସ୍ଥଳୀ ସହ ସ୍ନାନ, ଶୌଚ କାର୍ଯ୍ୟ ପାଇଁ ୨୦୦ ପାଇଖାନା ବ୍ୟବସ୍ଥା ହେବ। ମହିମାଗାଦିକୁ ରାଜ୍ୟର ପ୍ରମୁଖ ତୀର୍ଥସ୍ଥଳୀ ଓ ପର୍ଯ୍ୟଟନ କେନ୍ଦ୍ରରେ ପରିଣତ କରିବା ପାଇଁ ସମସ୍ତ ପ୍ରକାର ପଦକ୍ଷେପ ନିଆଯିବ ବୋଲି ରାଜ୍ୟ ସରକାର ପକ୍ଷରୁ କୁହାଯାଇଛି।
କପିଳାସ ପୀଠ ରୂପାନ୍ତରଣ ନେଇ ଆଲୋଚନା
ରାଜ୍ୟର ଅନ୍ୟତମ ପ୍ରସିଦ୍ଧ ଶୈବପୀଠ ତଥା କପିଳାସ କ୍ଷେତ୍ରାଧିପତି ଶ୍ରୀଚନ୍ଦ୍ରଶେଖର ଜୀଉଙ୍କ ମନ୍ଦିରର ରୂପାନ୍ତରଣ ନିମନ୍ତେ ପଦକ୍ଷେପ ନେବାକୁ ସେବାୟତ, ପୂଜକମାନେ ଗୁରୁବାର ଭୁବନେଶ୍ୱରରେ ୫-ଟି ସଚିବଙ୍କୁ ସାକ୍ଷାତ୍ କରି ଆଲୋଚନା କରିଛନ୍ତି। ବିଧାୟକ ସୁଧୀର କୁମାର ସାମଲ, ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ସ୍ବତନ୍ତ୍ର ସଚିବ ରୂପା ରୋଶନ ସାହୁ, ଜିଲାପାଳ ସରୋଜ କୁମାର ସେଠୀ, ଦେଓଗଁା ସରପଞ୍ଚ ବିଜୟ କୁମାର ଦେହୁରୀ ପ୍ରମୁଖ ଉପସ୍ଥିତ ଥିଲେ। କପିଳାସ ପୀଠର ରୂପାନ୍ତର ପାଇଁ ତୁରନ୍ତ ଆଲୋଚନା କରି ପ୍ରସ୍ତାବ ଦେବା ଲାଗି ୫-ଟି ସଚିବ କହିଛନ୍ତି। ଖୁବ୍ଶୀଘ୍ର ଏ ସଂକ୍ରାନ୍ତ ପ୍ରସ୍ତାବ ଦିଆଯିବ ବୋଲି ଜିଲାପାଳ କହିଛନ୍ତି। ଏ ନେଇ ବିଧାୟକ ସାମଲ କୁହନ୍ତି ଯେ, କପିଳାସ ପୀଠର ସମ୍ପୂର୍ଣ୍ଣ ରୂପାନ୍ତର ପାଇଁ ଆଲୋଚନା ସରିଛି। ପ୍ରସ୍ତାବ ଦିଆଯିବା ପରେ ସରକାରଙ୍କ ପକ୍ଷରୁ ପଦକ୍ଷେପ ନିଆଯିବ। ଢେଙ୍କାନାଳ ସହରରେ ସ୍ବରେଜ ବ୍ୟବସ୍ଥା କରିବାକୁ ଯୋଜନା ରହିଥିବା ବିଧାୟକ କହିଛନ୍ତି।
