ମାଲକାନଗିରି,୨୫।୧୨(ଡି.ଏନ.ଏ.): ଅନର୍ଗଳ ମୁହଁରୁ ତାଙ୍କର ବାହାରି ପଡୁଛି ଗୀତା ଶ୍ଲୋକ। ଜିଲା ସ୍ତରରେ ଗୀତା ଶ୍ଲୋକ ଆବୃତ୍ତି କରି ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିବା ପରେ ଏବେ ସେ ରାଜ୍ୟସ୍ତରରେ ନିଜ ପ୍ରତିଭାର ପରିଚୟ ଦେବେ। ସେ ହେଉଛନ୍ତି ବଡଡୁରାଲ ଗ୍ରାମର ମହେଶ ହନ୍ତାଳ। ମହେଶ ଜଣେ ଅନାଥ ପିଲା ମାଲକାନଗିରି ଆଓମା ଗୁରୁକୁଳରେ ରହି କୁମୁଟିଗୁଡା ପ୍ରାଥମିକ ବିଦ୍ୟାଳୟରେ ୫ମ ଶ୍ରେଣୀରେ ପାଠ ପଢୁଛନ୍ତି। ଗୀତାର ସଂସ୍କୃତ ଶ୍ଲୋକଗୁଡିକକୁ ସେ ନିର୍ଭୁଲ ଭାବେ ସ୍ପଷ୍ଟ ଉଚ୍ଚାରଣ କରି ଆବୃତ୍ତି କରିପାରୁଛନ୍ତି। ଛୋଟ ବେଳ ଗୀତା ଶ୍ଲୋକଗୁଡିକ ପଢି ମନେ ରଖିବା ଆରମ୍ଭ କରିଥିଲେ ମହେଶ। ତାଙ୍କର ଏହି ଗୁଣକୁ ଗୁରୁ ସରୋଜ ଦାସ ଜାଣିବା ପରେ ତାଙ୍କୁ ବିଶେଷ ଗୁରୁତ୍ୱ ଦେଇଥିଲେ। ପ୍ରଜ୍ଞା ମିଶନର ଗୀତା ଶ୍ଲୋକ ଆବୃତ୍ତି ପ୍ରତିଯୋଗିତାରେ ମହେଶ ଭାଗ ନେଇ ପ୍ରଥମ ସ୍ଥାନ ଅଧିକାର କରି ସମସ୍ତଙ୍କୁ ଚକିତ କରିଥିଲେ। ଆଗାମୀ ଦିନରେ ପୁରୀରେ ହେଉଥିବା ରାଜ୍ୟସ୍ତରର ଗୀତା ଶ୍ଲୋକ ଆବୃତ୍ତି ପ୍ରତିଯୋଗିତାରେ ସେ ଭାଗ ନେବେ ବୋଲି ଜଣାପଡିଛି। ସେହିିପରି ସମାନ ରୂପେ ମାଲକାନଗିରି ଜିଲାର ପରଜାଗୁଡା କଲୋନୀର ଜଣେ ଦୃଷ୍ଟିଶକ୍ତିହୀନ ଛାତ୍ରୀ ଧନେଶ୍ୱରୀ ଜାନି ମଧ୍ୟ ନିଖୁଣ ରୂପେ ଗୀତା ଆବୃତ୍ତି କରି ଚର୍ଚ୍ଚାର ପରିସରକୁ ଆସିଛନ୍ତି। ସେ ଜିଲା ସଦର ମହକୁମାସ୍ଥିତ କୁମୁଟିଗୁଡା ବିଦ୍ୟାଳୟରେ ଷଷ୍ଠ ଶ୍ରେଣୀରେ ପଢଛନ୍ତି। ତାଙ୍କୁ ଏଥିରେ ଶିକ୍ଷୟିତ୍ରୀ ରଶିବାଳା ପରିଡା ସହଯୋଗ କରୁଛନ୍ତି । ସେ ମଧ୍ୟ ଜିଲାସ୍ତରୀୟ ପ୍ରତିଯୋଗିତାରେ ଉତ୍ତୀର୍ଣ୍ଣ ହୋଇ ରାଜ୍ୟସ୍ତରୀୟ ପ୍ରତିଯୋଗିତାକୁ ମନୋନୀତ ହୋଇଛନ୍ତି।
