ନୂଆଦିଲ୍ଲୀ, ୨୯।୯: କେନ୍ଦ୍ର ସରକାରଙ୍କ କୃଷି ଆଇନକୁ ନେଇ ଦେଶବ୍ୟାପି ବିରୋଧ ଜାରି ରହିଛି। କଂଗ୍ରେସ ପକ୍ଷରୁ ଏହାର ଜୋରଦାର ବିରୋଧ କରାଯିବା ସହିତ ସରକାରଙ୍କୁ ଘେରିବାର ଉଦ୍ୟମ କରାଯାଉଛି। ଏସମ୍ପର୍କରେ ରାହୁଲ ଗାନ୍ଧୀ ଦେଶର ବିଭିନ୍ନ ଅଞ୍ଚଳର କୃଷକଙ୍କ ସହିତ ଆଲୋଚନା କରିଛନ୍ତି। ମହାରାଷ୍ଟ୍ରର ଜଣେ ଅନ୍ନଦାତା ଏହି ଅବସରରେ ରାହୁଲଙ୍କୁ କହିଛନ୍ତି ଯେ, ଇଂରେଜଙ୍କ ବିରୋଧରେ ଜାତିର ପିତା ମହାତ୍ମା ଗାନ୍ଧୀ ଅହିଂସା ଲଢ଼େଇ କରିଥିଲେ। ଆଜି ଯଦି ମହାତ୍ମା ଜୀବିତ ରହିଥାନ୍ତେ ତେବେ ସେ ମଧ୍ୟ କୃଷି ଆଇନର ବିରୋଧ କରିଥାନ୍ତେ। ରାହୁଲ ଏହାକୁ ଇଂରେଜ ଆଇନ ବୋଲି କହିଛନ୍ତି। ସେ କହିଛନ୍ତି ଯେ, ବିମୁଦ୍ରିକରଣ, ଜିଏସ୍ଟି ଏବଂ କୃଷି ଆଇନ ଯୋଗୁ ଦେଶର ସାଧାରଣ ଜନତାଙ୍କ ଆର୍ଥିକ ମାନଦଣ୍ଡ ଭାଙ୍ଗିଯିବ। ପ୍ରଥମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଲୋକଙ୍କ ଗୋଡ଼ରେ କୁରାଢ଼ି ଚୋଟ ମାରିଥିବାବେଳେ ଏବେ ହୃଦୟରେ ଚୋଟ ମାରିଛନ୍ତି। ଇଂରେଜଙ୍କ ସହିତ ରହିଥିବା ଲୋକେ କେବେ ବି ଭାରତୀୟଙ୍କ ଦୁଃଖକଷ୍ଟ ବୁଝିପାରିବେ ନାହିଁ ବୋଲି ରାହୁଲ କହିଛନ୍ତି। ଏମ୍ଏସ୍ପି ନେଇ କୌଣସି ନିର୍ଭର ପ୍ରତିଶ୍ରୁତି ଏହି ଆଇନ ଦ୍ୱାରା ଦିଆଯାଇ ନାହିଁ। ଏହାଦ୍ୱାରା କେବଳ ଧନୀ ଏବଂ କମ୍ପାନୀଙ୍କ ପାଇଁ ନୂଆ ସୁଯୋଗ ସୃଷ୍ଟି ହେବ। ଗରିବ ସେହିପରି ଗରିବ ହିଁ ରହିବେ ବୋଲି ସେ କହିଛନ୍ତି।
