ଦାରିଙ୍ଗବାଡି/ବ୍ରାହ୍ମଣୀଗାଁ,୨୦।୮(ଅରୁଣ ସାହୁ/ମନୋରଞ୍ଜନ ରଣା): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ରାହ୍ମଣୀଗାଁ ଥାନା ଗଦାପୁରରେ ରବିବାର ମହାକୁମ୍ଭ ମହାମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମରେ କୋରାପୁଟ ଜିଲା ସମେତ ରାୟଗଡ଼ା, ଗଜପତି, ଗଞ୍ଜାମ ଏବଂ କନ୍ଧମାଳ ଜିଲାର ବୋଲବମ୍ ସଙ୍ଘର ହଜାର ହଜାର ଶ୍ରଦ୍ଧାଳୁ ଯୋଗ ଦେଇଥିଲେ।
ସମସ୍ତ ବୋଲବମ୍ ଶ୍ରଦ୍ଧାଳୁଙ୍କୁ ଗଦାପୁର ଗ୍ରାମର ଶତାଧିକ ମହିଳା, ପୁରୁଷ ଗାଁ ମୁଣ୍ଡରେ କୀର୍ତ୍ତନ କରି ଗୋଡ଼ ଧୋଇ ସିନ୍ଦୂର, ଚନ୍ଦନ, ଫୁଲ ଦେଇ ଶିବମନ୍ଦିର ପ୍ରାଙ୍ଗଣରେ ସ୍ବାଗତ କରିଥିଲେ। ଏହି ଅବସରରେ ଚମ୍ପାନଦୀ ପଠାରେ ହୋମଯଜ୍ଞ, ପୂଜାର୍ଚ୍ଚନା କରାଯାଇଥିଲା। ନଦୀରୁ ବାଲି ଉଠାଇ ଶିବଲିଙ୍ଗ ସ୍ଥାପନ କରାଯାଇ ସ୍ବତନ୍ତ୍ର ପୂଜାର୍ଚ୍ଚନା କରାଯାଇଥିଲା। ସନ୍ଧ୍ୟାରେ ଚମ୍ପାନଦୀରୁ ଜଳ ଉଠାଇ ହଜାର ହଜାର ଶ୍ରଦ୍ଧାଳୁ ଧାଡ଼ିରେ ଜଳ ଢାଳିବା ପାଇଁ ଗଜପତି ଜିଲା ଅଡବା ବାହାରିଥିଲେ। ରାତ୍ରିରେ ଗଜପତି ଜିଲା ପାଣିଗଣ୍ଡା ପଞ୍ଚାୟତରେ ଶ୍ରଦ୍ଧାଳୁଙ୍କ ରାତ୍ରିଯାପନ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ରହିଛି। ସୋମବାର ଭୋରରୁ ବାହାରି ଅଡବା ଶ୍ରୀ କାଶୀ ବିଶ୍ୱନାଥଙ୍କ ଦକ୍ଷିଣକଣ୍ଠେ ଜଳାଭିଷେକ କରିବାର କାର୍ଯ୍ୟକ୍ରମ ରହିଥିବା ବୋଲବମ ମହାସଙ୍ଘର ସମ୍ପାଦକ କୁନା ପାତ୍ର, ସଭାପତି ଜନରଞ୍ଜନ ପଟ୍ଟନାୟକ ଏବଂ କୋଷଧ୍ୟକ୍ଷ ନାନା ଭାଇ କହିଛନ୍ତି।
କାର୍ଯ୍ୟକ୍ରମକୁ ଗଦାପୁର ନୀଳକଣ୍ଠେଶ୍ୱର ବୋଲବମ୍ ସଂଘ ଏବଂ ଗଜପତି ଜିଲା ଅଡବା ଶ୍ରୀ କାଶୀ ବିଶ୍ୱନାଥ ବୋଲବମ୍ ସଙ୍ଘ ପରିଚାଳନା କରୁଥିବା ବେଳେ ବୋଲବମ୍ ମହାକୁମ୍ଭ ମହାମିଳନ କମିଟି ତଦାରଖ କରୁଛି। ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ବ୍ରାହ୍ମଣୀଗାଁ ଥାନା ଅଧିକାରୀ ଚାପଧାରୀ ପ୍ରଧାନଙ୍କ ନେତୃତ୍ୱରେ ସବ୍ଇନ୍ସ୍ପେକ୍ଟର ଅମରେନ୍ଦ୍ର ସୁବୁଦ୍ଧି ଆଇନ ଶୃଙ୍ଖଳାର ତଦାରଖ କରିଛନ୍ତି।
