ଚେନ୍ନାଇ,୯।୧: ଅଭିନେତା ବିଜୟଙ୍କୁ ହାଇକୋର୍ଟରୁ ମିଳିଲା ଆଶ୍ବସ୍ତି। ବିଜୟଙ୍କ ବହୁ ପ୍ରତୀକ୍ଷିତ ଏବଂ ତାଙ୍କ ରାଜନୈତିକ ପ୍ରବେଶ ପୂର୍ବରୁ ଶେଷ ଚଳଚ୍ଚିତ୍ର ‘ଜନ ନାୟକନ୍’ର ସେନ୍ସର ସାର୍ଟିଫିକେଟ୍କୁ ନେଇ ଉପୁଜିଥିବା ବିବାଦର ଅନ୍ତ ଘଟିଛି। ମାଡ୍ରାସ୍ ହାଇକୋର୍ଟ ଶୁକ୍ରବାର ଦିନ ସେନ୍ସର ବୋର୍ଡକୁ ଏହି ଚଳଚ୍ଚିତ୍ରକୁ ‘UA’ ସାର୍ଟିଫିକେଟ୍ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି।
‘ଜନ ନାୟକନ୍’ ଜାନୁଆରୀ ୯ ରେ, ମୁକ୍ତିଲାଭ କରିବାର ଥିଲା। କିନ୍ତୁ ସେନ୍ସର ପ୍ରମାଣପତ୍ର ବିଳମ୍ବ ଯୋଗୁଁ ନିର୍ମାତାମାନେ ବୁଧବାର ବିଳମ୍ବିତ ରାତିରେ ଏହାର ମୁକ୍ତିକୁ ବାଧ୍ୟତାମୂଳକ ପରିସ୍ଥିତି ଯୋଗୁଁ ସ୍ଥଗିତ ରଖିଥିବା ଘୋଷଣା କରିଥିଲେ।
କୋର୍ଟ ଫିଲ୍ମରେ କିଛି ପରିବର୍ତ୍ତନ କରାଯିବା ପରେ ତୁରନ୍ତ ‘UA’ ସାର୍ଟିଫିକେଟ୍ ଜାରି କରିବାକୁ ନିର୍ଦ୍ଦେଶ ଦେଇଛନ୍ତି। ଫିଲ୍ମକୁ ଆଉ ସେନ୍ସର ବୋର୍ଡର ରିଭ୍ୟୁ ପ୍ୟାନେଲକୁ ପଠାଯିବ ନାହିଁ।
କୋର୍ଟ କେନ୍ଦ୍ରୀୟ ଫିଲ୍ମ ପ୍ରମାଣପତ୍ର ବୋର୍ଡ (CBFC) ଉପରେ ତୀବ୍ର ଅସନ୍ତୋଷ ପ୍ରକାଶ କରି କହିଛନ୍ତି ଯେ ଏପରି ଅଭିଯୋଗକୁ ବିଚାରକୁ ନେବା ଏକ “ବିପଜ୍ଜନକ ପ୍ରବୃତ୍ତି”। କୋର୍ଟ ଏହା ମଧ୍ୟ କହିଛନ୍ତି ଯେ ଫିଲ୍ମ ବିରୋଧରେ ଆସିଥିବା ଅଭିଯୋଗ ‘ଆଫ୍ଟରଥଟ୍’ (ପରବର୍ତ୍ତୀ ଚିନ୍ତା) ପରି ଲାଗୁଛି।
ପ୍ରଥମେ ଫିଲ୍ମର ଅତ୍ୟଧିକ ହିଂସା ପାଇଁ ସେନ୍ସର ବୋର୍ଡ କିଛି କଟ୍ କରିବାକୁ କହିଥିଲେ, ଯାହା ନିର୍ମାତାମାନେ ପାଳନ କରିଥିଲେ। ତେବେ ଜଣେ ସଦସ୍ୟ ଶେଷ ମୁହୂର୍ତ୍ତରେ ଏକ ପ୍ରତିରକ୍ଷା ପ୍ରତୀକର ବ୍ୟବହାର ଏବଂ ସାମ୍ପ୍ରଦାୟିକ ସ୍ୱର ଥିବା କିଛି ଦୃଶ୍ୟକୁ ନେଇ ଆପତ୍ତି ଉଠାଇବାରୁ ସାର୍ଟିଫିକେଟ୍ ଦେବାରେ ବିଳମ୍ବ ହୋଇଥିଲା।
ନିର୍ମାତା KVN ପ୍ରଡକ୍ସନ୍ସ ତରଫରୁ ଏହି ବିବାଦ ପରେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ବିଳମ୍ବ ଯୋଗୁଁ ବୁକ୍ ହୋଇଥିବା ଟିକେଟ୍ ପାଇଁ ରିଫଣ୍ଡ ପ୍ରକ୍ରିୟା ଆରମ୍ଭ ହୋଇଛି। ଚଳଚ୍ଚିତ୍ରର ନିର୍ଦ୍ଦେଶକ ହେଉଛନ୍ତି ଏଚ୍. ବିନୋଥ୍।
