ଖଣ୍ଡପଡ଼ା,୩ା୪(ସ୍ବ.ପ୍ର.): ଅଦିନିଆ ବର୍ଷାରେ ଖଣ୍ଡପଡ଼ା ମଧୁବନ ମିନିଷ୍ଟାଡିୟମ ପରିସରରେ ବର୍ଷା ପାଣି ଜମି ରହି ସମସ୍ୟା ସୃଷ୍ଟି କରୁଛି। ଅଦିନିଆ ଲଗାଣ ବର୍ଷା ପ୍ରଭାବରେ ଖେଳପଡ଼ିଆ ପରିସର ଜଳାର୍ଣ୍ଣବ ହୋଇ ଉଠୁଥିବାରୁ ଏ ନେଇ କ୍ରୀଡାବିତ୍ ଓ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ବର୍ଷତମାମ ମଧୁବନ ମିନି ଷ୍ଟାଡିୟମ ପରିସରରେ କ୍ରୀଡ଼ା ପ୍ରତିଯୋଗୀତାଠାରୁ ଆରମ୍ଭକରି ମେଳା,ମହୋତ୍ସବ, ସାଧାରଣତନ୍ତ୍ର ଓ ସ୍ବାଧୀନତା ଦିବସ ପାଳନ କରାଯାଇଥାଏ। ରାଜରାଜୁଡା ଅମଳରୁ ପ୍ରତିଷ୍ଠିତ ଏହି ଖେଳପଡ଼ିଆ ମିନିଷ୍ଟାଡିୟମର ମାନ୍ୟତା ପାଇବା ପରେ ଖଣ୍ଡପଡ଼ା ତହସିଲ ପ୍ରଶାସନ ଓ ଏନଏସି କତ୍ତୃପକ୍ଷଙ୍କ ଦ୍ୱାରା ସେଠାରେ ବିଭିନ୍ନ ବିକାଶ ମୂଳକ କାମ କରାଯାଇଛି। ଏପରି କି ଏନ୍ଏସି ପକ୍ଷରୁ ମୁକ୍ତା ଯୋଜନାରେ ଲକ୍ଷାଧିକ ଟଙ୍କା ବ୍ୟୟ କରାଯାଇ ମଧୁବନ ମିନିଷ୍ଟାଡିୟମ ପାରିପାଶର୍ବିକ ଉନ୍ନତିକରଣ କାମ ଚାଲୁ ରହିଛି। ମାତ୍ର ଖେଳପଡ଼ିଆ ଭିତରେ ଓ ପାର୍ଶ୍ୱବର୍ତ୍ତୀ ଅଞ୍ଚଳରେ ବର୍ଷାଜଳ ଜମି ରହୁଥିବାରୁ ଜଳାଶୟ ପରି ପ୍ରତୀୟମାନ ହେଉଛି। ତେଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି। ନଚେତ୍ ଆଗାମୀ ବର୍ଷା ଋତୁରେ ଏହି ମିନିଷ୍ଟାଡିୟମ ପରିସର ଏକ ଜଳାଶୟରେ ପରିଣତ ହେବାର ଆଶଙ୍କା ପ୍ରକାଶ ପାଇଛି।
