କଟକ ଅଫିସ,୨୪ା୧୦: କଟକ ମହାନଗର ନିଗମ (ସିଏମ୍ସି)ର ୧୬ ନମ୍ବର ୱାର୍ଡ ଅଧୀନ ତୁଳସୀପୁର ସ୍ଥିତ ମଧୁକୁଞ୍ଜ ପାର୍କରେ ଅନେକ ଅବ୍ୟବସ୍ଥା ରହିଛି। ରକ୍ଷଣାବେକ୍ଷଣ ଅଭାବରୁ ପାର୍କ ପରିସରରେ ଥିବା ଲାଇଟ୍ ଅଧାରୁ ଅଧିକ ଅଚଳ ହୋଇପଡିଛି। ଏପରି କି ସେଠାରେ ବିଦ୍ୟୁତ୍ ବକ୍ସ ମୁକୁଳା ଅବସ୍ଥାରେ ରହିଛି। ଏଥିଯୋଗୁ କେତେବେଳେ ଜୀବନହାନି ଘଟିବ ତାହା କହିହେବ ନାହିଁ। ଏହି ପାର୍କ ଦାୟିତ୍ୱରେ ଥିବା ସିଏମ୍ସି କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।
୨୦୦୪ ସେପ୍ଟେମ୍ବର ୩୦ ତାରିଖରେ ସିଏମ୍ସି ପକ୍ଷରୁ ଏହି ପାର୍କ ନିର୍ମାଣ କରାଯାଇଥିଲା। ସ୍ଥାନୀୟ ଅଞ୍ଚଳର ଲୋକମାନେ ଏଠାରେ ପ୍ରାତଃ ଭ୍ରମଣ କରିବା ସହ କିଛି ସମୟ ନିରୋଳାରେ ସମୟ ଅତିବାହିତ କରୁଥିଲେ। ୨୦୧୮ ଏପ୍ରିଲ ୧୧ ତାରିଖରେ ଏହି ପାର୍କକୁ ଅମୃତ ଯୋଜନାରେ ସାମିଲ କରାଯାଇ ନବୀକରଣ କରାଯାଇଥିଲା। ପାର୍କ ପରିସରରେ ଜଗିଂ ଟ୍ରାକ୍, ଦୋଳି ଓ ବ୍ୟାୟାମ ପାଇଁ ମେଶିନ ବ୍ୟବସ୍ଥା କରାଯାଇଥିଲା। ଫଳରେ ପ୍ରତିଦିନ ପ୍ରାତଃ ଓ ସନ୍ଧ୍ୟା ଭ୍ରମଣ ସହ ବ୍ୟାୟାମ କରିବା ପାଇଁ ସ୍ଥାନୀୟ ଲୋକେ ଏଠାକୁ ଆସିଥାନ୍ତି। ସେହିପରି ପିଲାମାନେ ମଧ୍ୟ ଦୋଳିର ମଜ୍ଜା ନେଇଥାନ୍ତି। ହେଲେ ସିଏମ୍ସି କର୍ତ୍ତୃପକ୍ଷଙ୍କ ଅବହେଳା ଯୋଗୁ ଏବେ ପାର୍କ ପରିସରରେ ଅବ୍ୟବସ୍ଥା ରହିଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ପାର୍କର ବ୍ୟାୟାମ ବ୍ୟବସ୍ଥା ନିକଟରେ ଆଲୋକ ସୁବିଧା ନାହିଁ। ସେହିପରି ପାର୍କ ପରିସରରେ ପିଇବା ପାଣି ବ୍ୟବସ୍ଥା ନ ଥିବାବେଳେ ଶୌଚାଳୟ ଅର୍ଦ୍ଧଭଗ୍ନ ଅବସ୍ଥାରେ ରହିଛି। ପାର୍କ ପରିସର ରାସ୍ତାପାର୍ଶ୍ୱରେ ଘାସ ଉଠିଥିବାବେଳେ ପାଚେରି ଭାଙ୍ଗିପଡିଥିବା ଦେଖିବାକୁ ମିଳିଛି। ଏପରି କି ସୌନ୍ଦର୍ଯ୍ୟକରଣ ପାଇଁ ରହିଥିବା ଜଳଫୁଆରା ମଧ୍ୟ ଅଚଳ ହୋଇପଡିଛି।
