ଯାଜପୁର,୨୨ା୧୦(ହର୍ଷବର୍ଦ୍ଧନ ବେହେରା)ଗ୍ରାମାଞ୍ଚଳରେ ଲୋକଙ୍କୁ କାମଧନ୍ଦା ଯୋଗାଇବା ଏବଂ ସେମାନଙ୍କ କ୍ରୟଶକ୍ତି ବୃଦ୍ଧି ଉଦ୍ଦେଶ୍ୟରେ ସଂସଦରେ ଗୃହୀତ ଆଇନ ବଳରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍) କାର୍ଯ୍ୟକାରୀ ହେଉଛି। ଦେଶର କେତେକ ରାଜ୍ୟରେ ଏହି ଯୋଜନାକୁ ଉତ୍ସାହଜନକ ସଫଳତା ମିଳିଛି। କିନ୍ତୁ ଯାଜପୁର ଜିଲାରେ ଏହି ଯୋଜନାକୁ ଲକ୍ଷ୍ୟଭ୍ରଷ୍ଟ କରାଯାଇ ଶ୍ରମିକ ବଦଳରେ ମେଶିନରେ କାମ କରାଯାଉଥିବା ଅଭିଯୋଗ ହେଉଛି। ଜିଲାର ଦଶରଥପୁର ବ୍ଲକ ମଲ୍ଲିକାପୁର ପଞ୍ଚାୟତ ଅନ୍ତର୍ଗତ ମହାନ୍ତିପାଟଣା ଗ୍ରାମର ପୋଖରୀ ପୁନରୁଦ୍ଧାର କାର୍ଯ୍ୟରେ ମେଶିନରେ କାମ ହୋଇଥିବା ଅଭିଯୋଗ ହେଉଛି। ଏହିକ୍ରମରେ ଜବ୍କାର୍ଡରେ କାର୍ଯ୍ୟଦିବସ ଦର୍ଶାଯାଇ ଅର୍ଥ ଲୁଟ୍ କରିବାକୁ ଯୋଜନା ହେଉଥିବାବେଳେ ଶ୍ରମିକମାନେ ଅନ୍ୟ ରାଜ୍ୟକୁ ଦାଦନ ଖଟି ଯାଉଥିବା ଦେଖିବାକୁ ମିଳିଛି। ଅନ୍ୟ ସାଧାରଣ ଯୋଜନା ଭଳି ଏମ୍ଜିଏନ୍ଆର୍ଇଜିଏସ୍ ଅମଲାତନ୍ତ୍ର ଏବଂ ଠିକାଦାରଙ୍କ ଜାଲରେ ଛନ୍ଦି ହୋଇ ଦିଗହରା ହୋଇଥିବା ପରିଲକ୍ଷିତ ହେଉଛି। ଗାଇଡ୍ଲାଇନ୍ ଅନୁସାରେ ଏହି ଯୋଜନା ପାଇଁ ଆବଣ୍ଟିତ ପାଣ୍ଠିରୁ ଲୋକଙ୍କୁ ମଜୁରି ଦେବାରେ ୬୦ପ୍ରତିଶତରୁ କମ୍ ଖର୍ଚ୍ଚ ହେବ ନାହିଁ ବୋଲି ସ୍ପଷ୍ଟ ଉଲ୍ଲେଖ ରହିଛି। ୨୦୨୩-୨୪ ବର୍ଷରେ ଶନିବାର ସୁଦ୍ଧା ୧୪୨୬ ପରିବାର ୧୦୦ଦିନର କାମ ପାଇଥିବା ପ୍ରଶାସନ ପକ୍ଷରୁ ଦାବି କରାଯାଉଛି। ମାତ୍ର ବାସ୍ତବପକ୍ଷେ ଏଥିରୁ ୫୦ ପ୍ରତିଶତ ମେଶିନ ଦ୍ୱାରା ଖର୍ଚ୍ଚ କରାଯାଇ ମିଥ୍ୟା ମଷ୍ଟରରୋଲ ତିଆରି କରାଯାଇ ଶ୍ରମିକଙ୍କ ନାମରେ ଏମ୍ଜିଏନ୍ଆର୍ଇଜିଏସ୍ ଟଙ୍କା ହରିଲୁଟ୍ ହେଉଥିବା ଅଭିଯୋଗ ହେଉଛି।
ମିଳିଥିବା ତଥ୍ୟ ଅନୁସାରେ ୨୦୨୩-୨୪ ଆର୍ଥିକ ବର୍ଷରେ ଜିଲାରେ ୨,୧୦,୫୩୩ ପରିବାରଙ୍କ ନାମରେ ଜବ୍କାର୍ଡ ଆବଣ୍ଟିତ ହୋଇଥିବାବେଳେ ୮୫,୫୪୭ ପରିବାର କାମ ପାଇଁ ଦାବି କରିଥିଲେ ା ସେଥିରୁ ୮୫,୩୫୭ ପରିବାରଙ୍କୁ କାମ ଯୋଗାଇ ଦିଆଯାଇଛି। ଅକ୍ଟୋବର ସୁଦ୍ଧା ୧୪୨୬ ପରିବାର ୧୦୦ ଦିନର କାମ ସମ୍ପୂର୍ଣ୍ଣ କରି ପାରିଛନ୍ତି। ଜିଲାର ୩୫ଟି ପଞ୍ଚାୟତକୁ ନେଇ ଗଠିତ ଦଶରଥପୁର ବିପୁଳ ସଂଖ୍ୟାରେ ଶ୍ରମିକ ଦାଦନ ଖଟିବାକୁ ରାଜ୍ୟ ବାହାରକୁ ଯାଇଥାନ୍ତି। କିନ୍ତୁ ଏଠାରେ ଶ୍ରମିକଙ୍କୁ କାମ ଦିଆ ନ ଯାଇ ଠିକାଦାରଙ୍କ ସ୍ବାର୍ଥରେ ମେଶିନ ଲଗାଯାଉଛି ବୋଲି ମତପ୍ରକାଶ ପାଇଛି। ମହାନ୍ତିପାଟଣା ପୋଖରୀ ପୁନରୁଦ୍ଧାର ପାଇଁ ଏମ୍ଜିଏନ୍ଆର୍ଇଜିଏସ୍ରେ ପ୍ରାୟ ୩ ଲକ୍ଷ ଆବଣ୍ଟିତ ହୋଇଥିଲା। ଏଥିରେ ଶ୍ରମିକମାନଙ୍କୁ ନିୟୋଜନ କରି କାର୍ଯ୍ୟଦିବସ ସୃଷ୍ଟି କରିବାକୁ ସ୍ପଷ୍ଟ ଭାବେ ଦର୍ଶାଯାଇଥିଲା। କିନ୍ତୁ ଏହି ଯୋଜନାର କୌଣସି ଆଇନକୁ ନ ମାନି ମେଶିନରେ କାମ କରାଯାଇଥିବାରୁ ଶ୍ରମିକମାନେ ହାତବାନ୍ଧି ବସିଛନ୍ତି ବୋଲି ଅଭିଯୋଗ ହେଉଛି। କେବଳ ଦଶରଥପୁର ବ୍ଲକ ନୁହେଁ, ଜିଲାର ସମସ୍ତ ବ୍ଲକରେ ଏଭଳି କାର୍ଯ୍ୟ ହୋଇଥିବା ଅଭିଯୋଗ ହେଉଛି। ତେବେ ୧୦୦ଦିନର କାମ ସମ୍ପୂର୍ଣ୍ଣ ତାଲିକାରେ ଦାନଗଦି ବ୍ଲକରେ ସର୍ବନିମ୍ନ ୧୪ ପରିବାର ରହିଛନ୍ତି। ସେହିପରି ବଡ଼ଚଣା ବ୍ଲକରେ ୩୮, ରସୁଲପୁରରେ ୨୬ ଓ ସୁକିନ୍ଦାରେ ୭୩ ପରିବାର ୧୦୦ଦିନର କାମ ସମ୍ପୂର୍ଣ୍ଣ କରିଛନ୍ତି। ବରୀ ବ୍ଲକରେ ସର୍ବାଧିକ ୫୦୯ ପରିବାର ରହିଥିବାବେଳେ କୋରେଇରେ ୨୬୧ ଏବଂ ବିଞ୍ଝାରପୁର, ଦଶରଥପୁର, ଧର୍ମଶାଳା, ଯାଜପୁର ବ୍ଲକରେ ୧୦୦ରୁ ଊର୍ଦ୍ଧ୍ୱ ପରିବାର ୧୦୦ଦିନର କାମ ସମ୍ପୂର୍ଣ୍ଣ ତାଲିକାରେ ରହିଛନ୍ତି। ଶ୍ରମିକ ଅନୁଯାୟୀ ତଦନ୍ତ କରାଗଲେ ଏହିସବୁ ରିପୋର୍ଟରେ ସତ୍ୟତା ଜଣାପଡ଼ିବ ବୋଲି ଦାବି ହେଉଛି।
