ବୁଗୁଡ଼ା,୨୪ା୧୦(ଡି.ଏନ୍.ଏ.): ଗଞ୍ଜାମ ଜିଲା ଅନ୍ତର୍ଗତ ବୁଗୁଡ଼ା ସହରର ମଦନମୋହନ ଛକରେ ଚଳିତ ବର୍ଷ କରୋନା କଟକଣା ମଧ୍ୟରେ ଦୁର୍ଗା ପୂଜା ଆରମ୍ଭ ହୋଇଯାଇଛି। ମଦନମୋହନ ଛକଠାରେ ନିରାଡମ୍ବର ଭାବେ ଶୁକ୍ରବାର ରାତିରୁ ମହା ସପ୍ତମୀ ପୂଜା ଆରମ୍ଭ ହୋଇଯାଇଥିବା ବେଳେ ଶନିବାର ମହା ଅଷ୍ଟମୀ ପୂଜା କାର୍ଯ୍ୟ ରୀତିନୀତି ପ୍ରକାରେ କମ୍ ସଂଖ୍ୟକ ପୁରୋହିତଙ୍କୁ ନେଇ ସମସ୍ତ କରୋନା କଟକଣାକୁ ପାଥେୟ କରି ସମ୍ପାଦନ ହୋଇଛି। ସମସ୍ତ ରୀତିନୀତି ଅନୁଯାୟୀ ମଙ୍ଗଳ ଆଳତି, ଅବକାଶ, ମହା ଆଳତି, ପୂଜା, ହୋମ, ଅଖଣ୍ଡ ଦୀପ ସାଙ୍ଗକୁ ଚଣ୍ଡୀପାଠ ଚାଲିଛି। ଭକ୍ତମାନେ କୋଭିଡ ନିୟମ ମାନି ମାସ୍କ ବାନ୍ଧି, ସାମାଜିକ ଦୂରତା ବଜାୟ ରଖି ମା’ ଦୁର୍ଗାଙ୍କ ଦର୍ଶନ କରୁଥିବା ଦେଖିବାକୁ ମିଳିଛି। ମହାମାରୀ କରୋନାରୁ ରକ୍ଷା ପାଇବା ପାଇଁ ଭକ୍ତଗଣ ମା’ଙ୍କ ନିକଟରେ ପ୍ରାର୍ଥନା କରୁଛନ୍ତି। ସମ୍ପୃକ୍ତ ଦୁର୍ଗାପୂଜା କମିଟିର ତତ୍ତ୍ୱାବଧାନରେ ଏହି ପୂଜା ଅନୁଷ୍ଠିତ ହେଉଥିଲେ ସୁଦ୍ଧା ତହସିଲ ଓ ପୋଲିସ ପ୍ରଶାସନ ଏଥିପ୍ରତି ନଜର ରଖିଥିବା ଜଣାଯାଇଛି।
