କାମାକ୍ଷାନଗର, ୧୨।୯(ଡି.ଏନ୍.ଏ.):ମଣ୍ଡପରେ ମା’ଙ୍କ ମୃଣ୍ମୟୀ ପ୍ରତିମା ନିର୍ମାଣରେ ନିମଗ୍ନ ଶିଳ୍ପୀ। ପ୍ରତିଯୋଗିତାମୂଳକ ପୂଜାରେ ସର୍ବାଗ୍ରେ ରହିବାକୁ ତିଆରି ଚାଲିଛି ସୃଦୃଶ୍ୟ ତୋରଣ। କେଉଁଠି ମୂର୍ତ୍ତିକୁ ତ ଆଉ କେଉଁଠି ସାଜସଜ୍ଜା ଓ ଉଜ୍ଜ୍ୱଳ ଆଲୋକମାଳାକୁ ଦିଆଯାଉଛି ଗୁରୁତ୍ୱ। କରୋନା ପ୍ରଭାବିତ ବିଶ୍ୱରେ ଦୁଇବର୍ଷ ପରେ ସାର୍ବଜନୀନ ଶାରଦୀୟ ଦୁର୍ଗାପୂଜାର ଆୟୋଜନ କରାଯାଉଥିବାବେଳେ ଏହାକୁ ନେଇ ଚଳଚଞ୍ଚଳ ହୋଇଉଠିଛି ଢେଙ୍କାନାଳ ଜିଲାର କାମାକ୍ଷାନଗର। ଚଳିତବର୍ଷ ୧୫ ମଣ୍ଡପରେ ପୂଜା ଆୟୋଜନ ହେଉଥିବାବେଳେ ସମସ୍ତଙ୍କ ମଧ୍ୟରେ ଦେଖିବାକୁ ମିଳିଛି ବିପୁଳ ଉତ୍ସାହ ଓ ଉଦ୍ଦୀପନା।
କରୋନା ମାଡ଼ରେ ସମଗ୍ର ବିଶ୍ୱ ସନ୍ତୁଳି ହେଉଥିବାବେଳେ ଦୁଇବର୍ଷ ଧରି ପ୍ରଭାବିତ ହୋଇଥିଲା ପର୍ବପର୍ବାଣି, ସାଂସ୍କୃତିକ କାର୍ଯ୍ୟକ୍ରମ। ଚଳିତବର୍ଷ ଭୂତାଣୁ ପ୍ରକୋପ ହ୍ରାସ ପାଇଥିବାବେଳେ ଚଳଚଞ୍ଚଳ ହୋଇଉଠିଛି ପରିବେଶ। କାମାକ୍ଷାନଗରର ମୁଣ୍ଡିଦେଉଳି, ଜଗନ୍ନାଥ ବଜାର, ତରୁଣ ବଜାର, ଲକ୍ଷ୍ମୀ ବଜାର, ଗୋପବନ୍ଧୁ ବଜାର, ହନୁମାନ ବଜାର, କଲେଜ ଛକ, ତ୍ରିନାଥ ବଜାର, ମେନ୍ ରୋଡ, ବାବା ବଜାର, ମହାବୀର ବଜାର, ଜିରିଡ଼ାମାଳି, ଗଣେଶ ବଜାର, ରାଧାକୃଷ୍ଣ ବଜାର, ତାରିଣୀ ବଜାରରେ ଚଳିତବର୍ଷ ଦୁର୍ଗାପୂଜାର ଆୟୋଜନ କରାଯାଉଛି। ଗଣପର୍ବକୁ ଆଡମ୍ବର ଓ ଶୃଙ୍ଖଳିତ ଭାବେ ପାଳନ କରିବାକୁ ଅଞ୍ଚଳର ମାନ୍ୟଗଣ୍ୟ ବ୍ୟକ୍ତି, ବଜାର କମିଟି କର୍ମକର୍ତ୍ତା, ପୋଲିସ ପ୍ରଶାସନର ମିଳିତ ବୈଠକ ଅନୁଷ୍ଠିତ ହୋଇଯାଇଛି। ପୂଜା ମହୋତ୍ସବକୁ ଶାନ୍ତିଶୃଙ୍ଖଳାର ସହ ସମାପନ କରିବା ଲାଗି ଏଥିରେ ସବିଶେଷ ଆଲୋଚନା ହୋଇଛି। ଅକ୍ଟୋବର ୨ ମହାସପ୍ତମୀରୁ ମା’ଙ୍କ ଆବାହନ ଆରମ୍ଭ ହେବ। ୬ରେ ଭସାଣି ସହ ପୂଜା ଉଦ୍ଯାପିତ ହେବ ବୋଲି କାର୍ଯ୍ୟକ୍ରମ ସ୍ଥିରୀକୃତ ହୋଇଛି। ସେହିପରି ରାବଣପୋଡ଼ି ଏବଂ ମେଳଣ ଯାତ୍ରା ସ୍ଥାନ ପରିବର୍ତ୍ତନ କରାଯାଇଛି। ସବୁବର୍ଷ ସାରଙ୍ଗଧର ଷ୍ଟାଡିୟମରେ ଏହି କାର୍ଯ୍ୟକ୍ରମ ଅନୁଷ୍ଠିତ ହେଉଥିଲା। କିନ୍ତୁ ଚଳିତବର୍ଷ ଷ୍ଟାଡିୟମ ଉନ୍ନତୀକରଣ କାମ ଜାରି ରହିଥିବାରୁ ରେଙ୍ଗାଳି ପଡ଼ିଆରେ ଏହାର ଆୟୋଜନ କରିବାକୁ ସର୍ବସମ୍ମତିକ୍ରମେ ସହମତି ପ୍ରକାଶ ପାଇଛି। କାମାକ୍ଷାନଗର ଦୁର୍ଗାପୂଜା ଦେଖିବା ଲାଗି ଢେଙ୍କାନାଳ, ଯାଜପୁର, କେନ୍ଦୁଝର, ଅନୁଗୋଳ ଜିଲାରୁ ଶ୍ରଦ୍ଧାଳୁଙ୍କ ସମାଗମ ହୋଇଥାଏ। ଆଇନଶୃଙ୍ଖଳା ରକ୍ଷା, ପାନୀୟ ଜଳଯୋଗାଣ, ରାସ୍ତାଘାଟ ମରାମତି, ପାର୍କିଂ ଆଦି ବ୍ୟବସ୍ଥିତ କରିବା ପ୍ରାକ୍ ପ୍ରସ୍ତୁତି ଆରମ୍ଭ ହୋଇଛି। ସେହିପରି ପୂଜା ମଣ୍ଡପରେ ଶୃଙ୍ଖଳିତ ଦର୍ଶନ ଲାଗି କମିଟି କର୍ମକର୍ତ୍ତାମାନେ ଜୋର୍ ଦେଇଥିବାବେଳେ ତଦନୁଯାୟୀ ଜୋର୍ଦାର ପ୍ରସ୍ତୁତି ଚାଲିଛି।
ଚଳିତବର୍ଷ ନୂଆ ଜାଗାରେ ମେଳଣ
ଶାରଦୀୟ ଦୁର୍ଗାପୂଜାର ସମସ୍ତ କାର୍ଯ୍ୟକ୍ରମକୁ ଦାୟିତ୍ୱର ସହ ତୁଲାଇବା ଚାଲେଞ୍ଜ। ଚଳିତବର୍ଷ ନୂଆ ସ୍ଥାନରେ ମେଳଣ ହେଉଥିବାରୁ ପଡ଼ିଆ ସଫେଇ, ପର୍ଯ୍ୟାପ୍ତ ଆଲୋକ ବ୍ୟବସ୍ଥା କରାଯାଉଛି। ସମସ୍ତଙ୍କ ସହଯୋଗରେ ଶୃଙ୍ଖଳାର ସହ ପର୍ବ ସମ୍ପନ୍ନ ହେବ।
-ଧର୍ମାନନ୍ଦ ପରିଡ଼ା, ନଗରପାଳ
ପୋଲିସ ପ୍ରଶାସନ ସଜାଗ
ଗଣପର୍ବ ଦଶହରାକୁ ଶୃଙ୍ଖଳିତ ଭାବେ ସମାପନ କରିବା ଲାଗି ପୋଲିସ ପ୍ରଶାସନ ସମ୍ପୂର୍ଣ୍ଣ ସଜାଗ ରହିଛି। ଏହା ଜନସାଧାରଣଙ୍କ ପର୍ବ। ତେଣୁ ସମସ୍ତେ ସହଯୋଗ କରିବା ଜରୁରୀ। ପୋଲିସ ନିଜ ଦାୟିତ୍ୱ ସୁଚାରୁ ରୂପେ ତୁଲାଇବ।
-ରଞ୍ଜନ କୁମାର ଦେଓ, ଏସ୍ଡିପିଓ
ସମସ୍ତଙ୍କ ସହଯୋଗ ଲୋଡ଼ା
କାମାକ୍ଷାନଗର ଦଶହରା ଉତ୍ସବ ଭାଇଚାରାର ପର୍ବ। ସବୁ ସମ୍ପ୍ରଦାୟର ଲୋକେ ଏକାଠି ହୋଇ ମା’ଙ୍କ ପୂଜା କରିଥାଆନ୍ତି। ସମସ୍ତଙ୍କ ସହଯୋଗ ରହିଲେ ଶାନ୍ତିଶୃଙ୍ଖଳାର ସହ ମହୋତ୍ସବ ସମ୍ପନ୍ନ ହେବ।
-ଜ୍ୟୋତିଶଙ୍କର ସାହୁ, ଉପଜିଲାପାଳ
ପ୍ରଚାର ପ୍ରସାର ଲୋଡ଼ା
କାମାକ୍ଷାନଗରର ଦଶହରା ପର୍ବ ସବୁଠୁ ନିଆରା। ଛୋଟ ସହରରେ ପାଖାପାଖି ମେଢ଼ ହେଉଥିବାରୁ ପୂଜାବଜାର ବୁଲିବାରେ ମଜା ଥାଏ। ସାମାଜିକ ଗଣମାଧ୍ୟମରେ ଅଧିକ ପ୍ରଚାର ପ୍ରସାର କରାଗଲେ ଏହି ପର୍ବ ସୁଦୂର ପ୍ରସାରୀ ହୋଇପାରିବ।
-ହିମାଦ୍ରୀ ଦାଶ, ସାମାଜିକ କର୍ମୀ
