ପାରଳାଖେମୁଣ୍ଡି,୧୩ା୪(ଗିରିଧାରୀ ପରିଛା): ସରକାର ବିଭିନ୍ନ ଯୋଜନା ଲୋକଙ୍କ ଉନ୍ନତି ପାଇଁ କାର୍ଯ୍ୟକାରୀ କରୁଥିବା ବେଳେ ଏହା ଲୋକଙ୍କ ପାଖରେ ପହଞ୍ଚତ୍ ପାରୁନି। ଗଜପତି ଜିଲା ଆଦିବାସୀ ଅଧ୍ୟୁଷିତ ଗୁମ୍ମା ବ୍ଲକର ଦୁର୍ଗମ ଅଞ୍ଚଳରେ ଫେଲ୍ ମାରିଛି ସରକାରୀ ବ୍ୟବସ୍ଥା। ଲୋକେ ଏବେ ମଧ୍ୟ ମୌଳିକ ସୁବିଧା ବଞ୍ଚତ୍ତ ହୋଇ ରହିଛନ୍ତି। ଏପରି ଏକ ଗ୍ରାମ ହେଲା ବ୍ଲକର ନାମନଗଡ ପଞ୍ଚାୟତର ଲୁରୁ ଗ୍ରାମ।
ଲୁରୁ ଗ୍ରାମରେ ପାଖାପାଖି ୨୦୦ରୁ ଅଧିକ ଲୋକ ବସବାସ କରନ୍ତି। ଗ୍ରାମରେ ପିଇବା ପାଣି ନାହିଁ। ଜଙ୍ଗଲରେ ଥିବା ଚୁଆରୁ ପାଣି ଆଣି ବ୍ୟବହାର କରୁଛନ୍ତି ଗ୍ରାମବାସୀ। ଏହି ପାଣି ସେମାନେ ରାତିରେ ଜଙ୍ଗଲକୁ ଯାଇ ସଂଗ୍ରହ କରି ଆଣନ୍ତି। ସରକାରୀ ଯୋଜନା ନାଁ ଏଠାକାର ଲୋକଙ୍କୁ ମିଳିଛି କେବଳ ପ୍ରତାରଣା। ଗ୍ରାମରେ ଦୀର୍ଘଦିନ ହେଲା ବିଦ୍ୟୁତ୍ ମଧ୍ୟ ନାହିଁ। ଅନ୍ଧାର ରାତି କାଟୁଥିବା ଗ୍ରାମବାସୀଙ୍କ ପିଲାମାନେ ଡିବିରି ଆଲୁଅରେ ପାଠ ପଢୁଛନ୍ତି। ଗ୍ରାମବାସୀ ଦୀପ ଜାଳି ରୋଷେଇ କରନ୍ତି। ସ୍ଥାନୀୟ ମହିଳାମାନେ କହନ୍ତି, ଜୀବନକୁ ପାଣି ଛଡେଇ ପିଇବା ପାଣି ପାଇଁ ଜଙ୍ଗଲକୁ ରାତିରେ ଯାଉଛୁ। ଏହି ସମୟରେ ବନ୍ୟଜନ୍ତୁଙ୍କ ଭୟ ମଧ୍ୟ ରହିଛି। ବ୍ଲକ ପ୍ରଶାସନଠାରୁ ଆରମ୍ଭ କରି ଜିଲା ପ୍ରଶାସନ, ରାଜନେତା ସମସ୍ତଙ୍କୁ ଏ ସମ୍ପର୍କରେ କହି ନିରାଶ ହୋଇଛୁ। ଏହିପାଣି ବ୍ୟବହାର କରି ଆମେ ବିଭିନ୍ନ ରୋଗରେ ପୀଡିତ ହେଉଛୁ ବୋଲି କହିଛନ୍ତି ଏହି ମହିଳାମାନେ। ଗ୍ରାମରେ ଭଲ ରାସ୍ତାଟିଏ ନାହିଁ। କାହାର ହଠାତ୍ ଦେହ ଖରାପ ହେଲେ ଭଗବାନ ଭରସା ବୋଲି କହିଛନ୍ତି ଗ୍ରାମର ଜନିତ ଭୂୟାଁ ଓ ଜିର୍ମିୟ ଗମାଙ୍ଗ।
ଲୁରୁ ଗ୍ରାମର ଲୋକଙ୍କ ମୁଣ୍ଡ ଉପରକୁ ପହଞ୍ଚତ୍ପାରିନି ସରକାରଙ୍କ ଆବାସ ଯୋଜନା। ଏବେ ବି ଲୋକେ ମାଟି କାନ୍ଥ ସାଙ୍ଗକୁ ଟିଣ ଛପର ଘରେ ରହୁଛନ୍ତି। ସରକାରଙ୍କ ଆବାସ ଯୋଜନାରେ ସାମିଲ କରିବାକୁ ବାରମ୍ବାର ଦାୟିତ୍ୱରେ ଥିବା ଅଧିକାରୀଙ୍କୁ ଜଣାଇ କିଛି ସୁଫଳ ମିଳିନି। ଏପରି କି କେବେ ମଧ୍ୟ ଗ୍ରାମବାସୀଙ୍କ ଅବସ୍ଥା ଅନୁଧ୍ୟାନ କରିବାକୁ କୌଣସି ଅଧିକାରୀ ଆସି ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଶିକ୍ଷାଲାଭ ପାଇଁ ଗ୍ରାମରେ ବିଦ୍ୟାଳୟଟିଏ ନାହିଁ। ଗ୍ରାମର ପିଲାମାନେ ପଢ଼ିବା ପାଇଁ ଅନ୍ୟ ଗ୍ରାମକୁ ଯାଇଥାନ୍ତି। ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
ଏ ସମ୍ପର୍କରେ ବିଡିଓ ଦୁଲେରାମ ମାର୍ଣ୍ଡିଙ୍କୁ ପଚାରିବାରୁ ସେ କହିଲେ, ମୁଁ ୨ମାସ ହେଲା ଏହି ବ୍ଲକକୁ ଆସିଛି। ମୋ ପାଖକୁ କେହି ସମ୍ପୃକ୍ତ ଗ୍ରାମର ସମସ୍ୟା ନେଇ ଅଭିଯୋଗ କରିବାକୁ ଆସିନାହାନ୍ତି। ପୂର୍ବତନ ବିଡିଓଙ୍କୁ ସେମାନେ ଜଣାଇଥିବେ। ତେବେ ଏ ଦିଗରେ ମୁଁ ଦେଖିବି। ଗ୍ରାମର ସମସ୍ୟା ଦୂର ପାଇଁ ପଦକ୍ଷେପ ନେବି ବୋଲି ସେ କହିଥିଲେ।
