କେସିଙ୍ଗା,୧୯ା୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକରେ ସ୍ବଳ୍ପ ବର୍ଷା ଯୋଗୁ ଚାଷ କାମ ଆଗେଇ ପାରୁନାହିଁ। ସମଗ୍ର କେସିଙ୍ଗା ବ୍ଲକରେ ୨୯ ହଜାର ୭୩୦ ହେକ୍ଟର ଚାଷ ଜମି ରହିଛି। ଏଥି ମଧ୍ୟରୁ ଚଳିତ ଖରିଫ ଋତୁରେ ୫ ହଜାର ୮୮୯ହେକ୍ଟର ଜମିରେ ଧାନ ବୁଣାଯାଇଛି। ୨୨ ହଜାର ୭୭୫ ହେକ୍ଟରରେ କପା, ମକା, ହରଡ଼, ଛଣି, ପନିପରିବା, ଚାଷ କରାଯାଇଛି ଏବଂ ରୁଆ ମଧ୍ୟ କରାଯିବା ପାଇଁ ଆବଶ୍ୟକ ପାଣି ନ ହେବାରୁ ଧାନରୁଆ ହୋଇପାରୁନାହିଁ। ସ୍ବଳ୍ପବର୍ଷା ଯୋଗୁ ଚାଷୀମାନେ ଚାଷ କାମରେ ଆଗେଇ ପାରୁନାହାନ୍ତି। ଜୁନ୍ ଯାଇ ଜୁଲାଇ ଶେଷ ହେବାକୁ ବସିଲାଣି ତଥାପି ଆବଶ୍ୟକତା ଅନୁସାରେ ବର୍ଷା ହେଉନାହିଁ। ଫଳରେ ଗଜା ଧାନ ମରିବାକୁ ବସୁଛି। କେସିଙ୍ଗା ବହୁ ପଞ୍ଚାୟତରେ ଧାନ ଗଜା ହୋଇଛି। ଜଳସେଚନର ସୁବିଧା ନ ଥିବାରୁ ଚାଷୀମାନେ ଗଜାମରୁଡ଼ି ପାଇଁ କେସିଙ୍ଗା ତହସିଲଦାର, କୃଷି ବିଭାଗରେ ଲିଖିତ ଅଭିଯୋଗ କରିଛନ୍ତି। ରେଙ୍ଗାଲି ଗ୍ରାମର ଜଣେ ବଡ଼ଚାଷୀ ଦଶରଥ ସାହା ଗ୍ରାମ ନିକଟରେ ଥିବା ୨୪ହେକ୍ଟର ଓ କଛାରପଦର ଗ୍ରାମରେ ଥିବା ୩୦ହେକ୍ଟର ଜମିରେ ଜଳସେଚନର ସୁବିଧା ନ ଥିବାରୁ ନିଜେ ଏକ ବିରାଟ କ୍ଷେତ୍ର ପୋଖରୀ ଖୋଳାଇ ନିଜ ଜମିରେ ଚାଷ କାମ କରୁଛନ୍ତି। ନିଜର ଟ୍ରାକ୍ଟର ଯୋଗେ ପଳାରେ ପାଣି ମଡ଼ାଇ ଧାନ ରୋଇବା ପାଇଁ ପ୍ରସ୍ତୁତି ଚାଲିଛି। ରେଙ୍ଗାଲି ଗ୍ରାମର ଦଶରଥ ସାହା ବହୁବାର କୃଷି ବିଭାଗ ଓ ଜଳଛାୟା ପ୍ରକଳ୍ପ କାର୍ଯ୍ୟାଳୟକୁ ଯାଇ କ୍ଷେତ୍ର ପୋଖରୀ ଖୋଳିବା ପାଇଁ ଆବେଦନ କରିଥିଲେ। କିନ୍ତୁ ସୁଫଳ ନ ମିଳିବାରୁ ନିଜେ ଅଢ଼େଇ ଲକ୍ଷ ବ୍ୟୟ ଅଟକଳରେ ଏକ କ୍ଷେତ୍ର ପୋଖରୀ ଖୋଳି ନିଜେ ଚାଷ କାମ କରୁଛନ୍ତି।
ଏ ସଂକ୍ରାନ୍ତରେ କେସିଙ୍ଗା କୃଷି ବିଭାଗର ଗୋଷ୍ଠୀ ଅଧିକାରୀ ଘନଶ୍ୟାମ ଦେହୁରୀଙ୍କୁ ପଚାରିବାରୁ ସ୍ବଳ୍ପ ବର୍ଷା ଯୋଗୁ ଚାଷକାମ ଆଗେଇ ପାରୁନାହିଁ। ବର୍ଷା ହେଲେ ଭଲ ଚାଷ ହେବାର ସମ୍ଭାବନା ରହିଛି ବୋଲି ପ୍ରକାଶ କରିଥିଲେ। ରେଙ୍ଗାଲି ଗ୍ରାମର ଦଶରଥଙ୍କ ପୁଅ ହରି ସାହାଙ୍କୁ ପଚାରିବାରୁ ସ୍ବଳ୍ପ ବର୍ଷା ଯୋଗୁ ଆମେ ଚାଷ ଠିକ ଭାବେ କରି ପାରୁ ନାହୁଁ,ନିଜର କ୍ଷେତ୍ର ପୋଖରୀରୁ ଟ୍ରାକ୍ଟର ଯୋଗେ ପାଣି ଜଳସେଚନ କରି ଚାଷ କାମ ଆଜିଠୁ ଆରମ୍ଭ କରିଛୁ ବୋଲି ପ୍ରକାଶ କରିଛନ୍ତି
