ବଲାଙ୍ଗୀର,୧୩।୭(ବୀରେନ୍ଦ୍ର କୁମାର ଝାଙ୍କର)ବଲାଙ୍ଗୀର ସଦର ଥାନା ଅନ୍ତର୍ଗତ ଅଇଁଲାଚୁଅଁା ଗଁାର ରଜତ ପ୍ରଧାନ(୨୩)ଙ୍କ ମୃତଦେହ ବଲାଙ୍ଗୀର-ଦେଓଗଁା ରେଳଲାଇନ୍ କଡରୁ ଗତ ଜୁନ୍ ୨୫ତାରିଖରେ ରେଲୱେ ପୋଲିସ ଜବତ କରିଥିଲା। ଏହା ଏକ ହତ୍ୟାକାଣ୍ଡ ବୋଲି ମୃତକଙ୍କ ପରିବାର ଓ ଗଁା ଲୋକେ ଅଭିଯୋଗ କରିଆସୁଥିଲେ। ରଜତଙ୍କୁ ଅପହରଣ ପରେ ହତ୍ୟାକରି ରେଳଲାଇନ୍ କଡରେ ଫିଙ୍ଗିଦେଇଥିବା ଅଭିଯୋଗ ହୋଇଥିଲା। ଏହି ଘଟଣାକୁ ନେଇ ସଦର ଥାନା ପୋଲିସ ଓ ରେଲୱେ ପୋଲିସ ମିଳିତ ତଦନ୍ତ କରିବା ପରେ ଏହା ଏକ ପ୍ରେମଜନିତ ହତ୍ୟାକାଣ୍ଡ ବୋଲି ସ୍ପଷ୍ଟ ହୋଇଛି। ଏହି ଘଟଣାରେ ସମ୍ପୃକ୍ତ ଜଣେ ନାବାଳକଙ୍କ ସମେତ ୬ ଜଣଙ୍କୁ ଅଟକ ରଖି ପଚରାଉଚରା କରାଯାଉଛି।
ବୁଧବାର ଅଟକ ଅଭିଯୁକ୍ତମାନଙ୍କୁ ନେଇ ପୋଲିସ ଓ ଓଡ୍ରାଫ୍ ଟିମ୍ ସଦର ଥାନା ଅନ୍ତର୍ଗତ ସିଲେଟ୍ପଡା ଗ୍ରାମକୁ ଯାଇଥିଲା। ସେଠାରେ ଥିବା ଏକ କୂଅରୁ ମୃତକଙ୍କ ମୋବାଇଲ ଫୋନ୍ ଏବଂ ଏହର ଅଳ୍ପ କିଛି ଦୂରରୁ ଏକ ମାରଣାସ୍ତ୍ର ଜବତ କରାଯାଇଛି। ତଦନ୍ତକାରୀ ପୋଲିସ ଘଟଣା ସମ୍ପର୍କରେ ମୁହଁ ଖୋଲି ନ ଥିବାବେଳେ ଗୁରୁବାର ଖବରଦାତା ସମ୍ମିଳନୀ କରି ସବିଶେଷ ସୂଚନା ଦେବ ବୋଲି ଜଣାପଡିଛି। ହତ୍ୟାର କାରଣ ପ୍ରେମ ସମ୍ପର୍କ ବୋଲି ଚର୍ଚ୍ଚା ହେଉଛି। ରଜତ ଯେଉଁ ଯୁବତୀଙ୍କୁ ଭଲ ପାଉଥିଲେ ତାଙ୍କୁ ସିଲେଟପଡାର ଅନ୍ୟ ଜଣେ ଯୁବକ କୁଆଡେ ଭଲ ପାଉଥିଲେ। ସିଲେଟପଡାର କେତେଜଣ ଯୁବକ ଗୋଷ୍ଠୀ ହୋଇ ରଜତଙ୍କୁ ହତ୍ୟା କରିଥିଲେ ଏବଂ ପରେ ମୃତଦେହକୁ ଖୁଜେନପାଲି ରେଳଧାରଣା ନିକଟରେ ଫିଙ୍ଗିଦେଇ ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରିଥିଲେ ବୋଲି ଅନୁମାନ କରାଯାଉଛି।
ଗତ ଜୁନ୍ ୨୪ ତାରିଖ ସନ୍ଧ୍ୟାରୁ ରଜତ କୁଆଡେ ନିଖୋଜ ହୋଇଯାଇଥିଲେ। ଖୋଜି ନ ପାଇବା ପରେ ପରିବାର ଲୋକେ ସଦର ଥାନାରେ ଲିଖିତଭାବେ ଜଣାଇଥିଲେ। ଏଭଳିକି ତାଙ୍କୁ ଏକ ଗାଡିରେ କେତେଜଣ ଯୁବକ ଅପହରଣ କରିନେଇଥିବା ସୂଚନା ଦେଇଥିଲେ। ୨୫ ତାରିଖ ସକାଳେ ରଜତଙ୍କ ମୃତଦେହ ଖୁଜେନପାଲି ରେଳଲାଇନ୍ କଡରୁ ରେଲୱେ ପୋଲିସ ଜବତ କରିଥିଲା। ରେଲୱେ ପୋଲିସ ତଦନ୍ତ ଆରମ୍ଭ କରିଥିଲେ ମଧ୍ୟ ଏଥିରେ ମୃତକଙ୍କ ପରିବାର ଲୋକେ ସନ୍ତୁଷ୍ଟ ହୋଇ ନ ଥିଲେ। କୌଣସି ପରିସ୍ଥିତିରେ ଏହା ଆତ୍ମହତ୍ୟା ନୁହେଁ ବରଂ ଯୋଜନାବଦ୍ଧ ହତ୍ୟାକାଣ୍ଡ ବୋଲି ଦାବିକରି ଏ ଦିଗରେ ତଦନ୍ତ କରିବାକୁ କହିଥିଲେ। ଘଟଣାର ପ୍ରାୟ ୧୫ଦିନ ପରେ ଗଁା ନିକଟସ୍ଥ ଏକ ଗଛରେ ମୃତ ରଜତଙ୍କ ଶାର୍ଟ ଝୁଲୁଥିବା ଦେଖି ଲୋକେ ପୋଲିସକୁ ଖବର ଦେଇଥିଲେ। ରେଲୱେ ପୋଲିସ ସିଲେଟପଡାର କେତେଜଣଙ୍କୁ ଡାକି ପଚରାଉଚରା କରିଥିଲା। ତେବେ ତଦନ୍ତ ତ୍ୱରାନ୍ବିତ ହେଉ ନ ଥିବାରୁ ଅସନ୍ତୋଷ ପ୍ରକାଶ କରି ରଜତଙ୍କ ପରିବାର ଏବଂ ଅଇଁଲାଚୁଅଁା ଗ୍ରାମବାସୀ ମଙ୍ଗଳବାର ଏସ୍ପି ଅଫିସ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ଘଟଣାର ତଦନ୍ତଭାର ସଦର ଥାନା ଗ୍ରହଣ କରୁ ବୋଲି ଦାବି କରିଥିଲେ। ଏହାପରେ ଏସ୍ପି ଋଷିକେଶ ଖିଲାରୀଙ୍କ ନିର୍ଦ୍ଦେଶରେ ମିଳିତ ଭାବେ ସଦର ଥାନା ପୋଲିସ ଏବଂ ରେଲୱ ଥାନା ପୋଲିସ ତଦନ୍ତ ଆରମ୍ଭ କରିଥିଲା। ବୁଧବାର ସକାଳେ ଏସଡିପିଓ ତୋଫାନ୍ ବାଗ, ସଦର ଥାନା ଆଇଆଇସି ଶ୍ରୀକାନ୍ତ ସାହୁ, ଓଡ୍ରାଫ୍ ଟିମ୍ ସିଲେଟପଡା ଯାଇଥିଲେ। ହତ୍ୟା ଘଟଣାରେ ଉପରୋକ୍ତ ୬ ଜଣଙ୍କ ସହ ଆଉ କାହାର ସମ୍ପୃକ୍ତି ଥିବା ସନ୍ଦେହକରି ପୋଲିସ ତଦନ୍ତ ଜାରି ରଖିଛି।
