ଦିଗପହଣ୍ଡି,୨୮।୧୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ସିଙ୍ଗପୁର ପଞ୍ଚାୟତ ବିଜୟ ଆଦିକନ୍ଦପୁର – ତେଲିଆପଲ୍ଲୀ ଗ୍ରାମ ନିକଟ ରାସ୍ତାକଡରେ ପଡ଼ିଥିବା ବହୁସଂଖ୍ୟକ ମୂଲ୍ୟବାନ ଔଷଧ ପଡ଼ିଥିବା ଦେଖି ଲୋକଙ୍କୁ ଆଶ୍ଚର୍ଯ୍ୟ କରିଛି। ସ୍ବାସ୍ଥ୍ୟ ବିଭାଗର ସତନ୍ତ୍ର ଟିମ ଶନିବାର ଘଟଣାସ୍ଥଳରେ ପହଞ୍ଚି ସେ ସବୁକୁ ଜବତ କରିବା ସହ ତଦନ୍ତ ଜାରି ରଖିଛନ୍ତି। ଘଟଣା ପ୍ରଘଟ ହେବା ପରେ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସିଙ୍ଗପୁର ପଞ୍ଚାୟତ ସରପଞ୍ଚ ପ୍ରତିମା ମହାପାତ୍ର ଘଟଣାକୁ ତୀବ୍ର ନିନ୍ଦା କରିବାସହ ଘଟଣାର ଉଚ୍ଚସ୍ତରୀୟ ତଦନ୍ତ ସହ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି। ଔଷଧ ପ୍ୟାକେଟ ଓ ଶିଶି ପଡ଼ିଥିବା ନିକଟରେ ଡେଙ୍ଗାଓସ୍ତା ଗ୍ରାମର ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଥିବାରୁ ଏସବୁ ଔଷଧ ଉକ୍ତ ସ୍ବାସ୍ଥ୍ୟକେନ୍ଦ୍ରର ବୋଲି ସନ୍ଦେହ କରାଯାଉଛି।
ରାଜ୍ୟ ଓ କେନ୍ଦ୍ର ସରକାର ଜାତୀୟ ସ୍ବାସ୍ଥ୍ୟ ମିଶନ ଜରିଆରେ ସ୍ବାସ୍ଥ୍ୟକେନ୍ଦ୍ର ଗୁଡ଼ିକୁ ଚିକିତ୍ସା ପାଇଁ ଆସୁଥିବା ରୋଗୀଙ୍କୁ ମାଗଣାରେ ଔଷଧ ବଣ୍ଟନ କରୁଥିବା ବେଳେ ତାହା ରୋଗୀଙ୍କୁ ଦିଆନଯାଇ ସେଗୁଡିକୁ କିଛି ସ୍ବାସ୍ଥ୍ୟ କର୍ମଚାରୀ ବାହାରେ ଫୋପାଡି ଦେଉଥିବା ନେଇ ସମ୍ପୃକ୍ତ ଅଞ୍ଚଳରେ ଚର୍ଚ୍ଚା ଚାଲିଛି। ଏନେଇ ଆଡ଼ାପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଅଧିକ୍ଷକ ଡ଼. ବାହାନ ଦାସଙ୍କୁ ପଚାରିବାରେ ସେ ଖବରପାଇ ଘଟଣାସ୍ଥଳରେ ପହଞ୍ଚି ତଦନ୍ତ କରିବାସହ ରାସ୍ତାକଡ଼ରେ ପଡ଼ିଥିବା ଔଷଧ ଗୁଡ଼ିକୁ ସଂଗ୍ରହ କରିଛନ୍ତି। ସେଥିରେ ବହୁ ପରିମାଣର କ୍ୟାଲସିୟମ ଏବଂ ଆଇରନ ଔଷଧ ରହିଛି। କିଛି ଔଷଧର ଏକ୍ସପାଏରୀ ତାରିଖ ଗତ ଡିସେମ୍ବର ୧ ତାରିଖ ଯାଏ ବ୍ୟବହାର ଉପଯୋଗୀ ଥିବା ବେଳେ ଅନ୍ୟକିଛି ଔଷଧ ର ସମୟ ଅବଧି ଆସନ୍ତା ୨୦୨୫ ମାର୍ଚ୍ଚ ଯାଏ ଉଲ୍ଲେଖ ରହିଛି।ଏସବୁ ଔଷଧର ବ୍ୟାଚ ନଂ ଗୁଡ଼ିକୁ ତନଖି କରାଯାଉଛି। ସେସବୁ ଔଷଧ କେଉଁ ସ୍ବାସ୍ଥ୍ୟକେନ୍ଦ୍ରକୁ ଆସିଥିଲା। ସଂଗୃହିତ ଔଷଧ ଗୁଡ଼ିକ ଡେଙ୍ଗାଓସ୍ତା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ନାଁ ଅନ୍ୟ କେଉଁ ବାହାର ସ୍ବାସ୍ଥ୍ୟକେନ୍ଦ୍ରର ସେ ନେଇ ଔଷଧ ଷ୍ଟକ ରେଜିଷ୍ଟ୍ରାରର ତନଖି କରାଯିବା ପରେ ସ୍ପଷ୍ଟ ସୂଚନା ମିଳିପାରିବ ବୋଲି କହିଛନ୍ତି। ଡେଙ୍ଗାଓସ୍ତା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ଡ଼.ଅବିନାଶ ମହାନ୍ତିଙ୍କୁ ପଚାରିବାରୁ ଜିଲା ସ୍ବାସ୍ଥ୍ୟ ଅଧିକାରୀଙ୍କ ନିର୍ଦ୍ଦେଶକ୍ରମେ ଅବସ୍ଥାପିତ ସ୍ବାସ୍ଥ୍ୟ କର୍ମଚାରୀଙ୍କୁ ଏନେଇ ପଚରାଉଚୁରା କରାଯାଉଛି ବୋଲି କହିଛନ୍ତି। ସବିଶେଷ ତଦନ୍ତ ପରେ ଘଟଣାର ରହସ୍ୟ ଉନ୍ମୋଚନ ହେବ ବୋଲି ତାଙ୍କ ପ୍ରତିକ୍ରିୟାରେ କହିଛନ୍ତି।
