ପଟାଙ୍ଗି,୨୨ା୪(ଶରତ ଧଳ): ଦୀର୍ଘବର୍ଷ ଧରି ଗ୍ରାମବାସୀଙ୍କ ଶ୍ରମଦାନ ଓ ଜଣେ ବ୍ୟକ୍ତିଙ୍କ ସ୍ବେଚ୍ଛାକୃତ ଅର୍ଥଦାନରେ ଗଢ଼ି ଉଠିଥିବା ମନ୍ଦିର ପ୍ରତିଷ୍ଠା କରି ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଥିବା ଦୃଶ୍ୟକୁ ନେଇ ବର୍ତ୍ତମାନ ସାରା ଅଞ୍ଚଳରେ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ଏହିପରି ଦୃଶ୍ୟ ଦେଖିବାକୁ ମିଳିଛି। କୋରାପୁଟ ଜିଲା ପଟାଙ୍ଗି ବ୍ଲକ ଅଧୀନରେ ରହିଥିବା ମାଳିପୁଟ ପଞ୍ଚାୟତ ସଦରମହକୁମାର ଜାତୀୟ ରାଜପଥ କଡ଼ରେ ଗଢ଼ି ଉଠିଥିବା ରଘୁନାଥଜୀଉଙ୍କ ମନ୍ଦିରକୁ ନେଇ।
ସୂଚନାନୁଯାୟୀ, ଉକ୍ତ ପଞ୍ଚାୟତ ସଦର ଗ୍ରାମରେ ବସବାସ କରୁଥିବା ମାଳି ସମ୍ପ୍ରଦାୟ ପରିବାର କ୍ଷେତ୍ରରେ ରଘୁନାଥଜୀଉଙ୍କ ମନ୍ଦିର ପ୍ରତିଷ୍ଠା କରିବା ନେଇ ସ୍ବପ୍ନ ଦେଖିଥିଲେ। ସେହି ସ୍ବପ୍ନକୁ କିପରି ସାକାର କରିବା ନେଇ ଗ୍ରାମବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା। ଏହିପରି ସ୍ଥିତିରେ ଗ୍ରାମବାସୀ ଏକତ୍ରିତ ହୋଇ ଜାତୀୟ ରାଜପଥ କଡ଼ରେ ରହିଥିବା ଏକ ଖୋଲା ସ୍ଥାନରେ ରଘୁନାଥଜୀଉଙ୍କ ମନ୍ଦିର ସ୍ଥାପନ କରିବାକୁ ମନସ୍ଥ କରି ପ୍ରଥମେ ନିଜ ନିଜ ମଧ୍ୟରେ ଶ୍ରମଦାନ କରି ଉକ୍ତ ମନ୍ଦିର ସ୍ଥାପନ ପାଇଁ ଆରମ୍ଭ କରିଥିଲେ ନିର୍ମାଣ କାର୍ଯ୍ୟ। ଠିକ୍ ଏହି ସମୟରେ ଦାମନଯୋଡ଼ି ଅଞ୍ଚଳରେ ବସବାସ କରୁଥିବା ସୁରେନ୍ଦ୍ରନାଥ ସାହୁ ନାମକ ଜଣେ ବ୍ୟକ୍ତି ଗ୍ରାମବାସୀଙ୍କ ନିକଟରେ ପହଞ୍ଚି ନିଜ ଖୋଲା ହସ୍ତ ବଢ଼ାଇ ମନ୍ଦିର ନିର୍ମାଣ କରିବା ପାଇଁ ଏକ କୋଟିରୁ ଊର୍ଦ୍ଧ୍ୱ ଟଙ୍କା ସହାୟତା ଯୋଗାଇ ଦେଇ ମନ୍ଦିର ନିର୍ମାଣ କରିବାରେ ସମ୍ପୂର୍ଣ୍ଣ ସହଯୋଗ କରିଥିଲେ। ଯାହାକି ନିର୍ମାଣ କାର୍ଯ୍ୟ ସରିବାକୁ ଦୀର୍ଘ୩ ବର୍ଷ ଲାଗିଥିଲା। ବର୍ତ୍ତମାନ ରଘୁନାଥଜୀଉ ମନ୍ଦିର ମଙ୍ଗଳବାର ବିଧିବଦ୍ଧ ଭାବେ ପ୍ରତିଷ୍ଠା ହେବ। ଏହି ପ୍ରତିଷ୍ଠା କାର୍ଯ୍ୟକ୍ରମ ଆସନ୍ତା ଶୁକ୍ରବାର ପର୍ଯ୍ୟନ୍ତ ଚାଲିବ। ପ୍ରଥମ ଦିନରେ ପ୍ରଥମେ ଗ୍ରାମର ମହିଳାମାନଙ୍କ ଦ୍ୱାରା କଳସ ଯାତ୍ରା ହେବାକୁ ଥିବା ସହ ଉକ୍ତ ଯାତ୍ରାରେ ୪୦୦ରୁ ଊର୍ଦ୍ଧ୍ୱ ମହିଳା ଅଂଶଗ୍ରହଣ କରିବା କାର୍ଯ୍ୟକ୍ରମ ରହିଥିବା ମନ୍ଦିର ପରିଚାଳନା କମିଟି ସଭାପତି ସୁରେନ୍ଦ୍ରନାଥ ସାହୁ, ଉପସଭାପତି ବିଦ୍ୟାବନ୍ତ ନାୟକ, ସମ୍ପାଦକ ଅମୂଲ୍ୟ କୁମାର ତ୍ରିପାଠୀ, କୋଷାଧ୍ୟକ୍ଷ ଜଗଦୀଶ ମଣ୍ଡଳ, ସହ ସମ୍ପାଦକ ସରତ କୁମାର ଖିଲ ପ୍ରମୁଖ ପ୍ରକାଶ କରିଥିବା ସହ ଉକ୍ତ ପ୍ରତିଷ୍ଠା କାର୍ଯ୍ୟକ୍ରମରେ ପ୍ରତିଦିନ ୨ ହଜାରରୁ ଊର୍ଦ୍ଧ୍ୱ ଭକ୍ତଙ୍କ ପାଇଁ ଅନ୍ନପ୍ରସାଦ ସେବନ ବ୍ୟବସ୍ଥା ଗ୍ରହଣ କରାଯାଇଛି। ଏହି ସମୟରେ ଭୀମ ଖିଲ, ମାଧବ ହନ୍ତାଳ, ମହେଶ୍ବର ମଣ୍ଡଳ ଗୋକୁଳ ଖିନିବୁଢ଼ୀ, ରତନ ଖିଲ, ଲକି ଖିଲ ଓ ବାବୁଲା ସ୍ବାଇଁ ପ୍ରମୁଖ ସଦସ୍ୟଙ୍କ ସମେତ ଗ୍ରାମର ଯୁବଗୋଷ୍ଠୀ ପରିଚାଳନାରେ ସହଯୋଗ କରିବା ବ୍ୟବସ୍ଥା ରହିଛି ବୋଲି ପ୍ରକାଶ କରିଛନ୍ତି।
