ଜୁନାଗଡ଼, ୭।୧୦(ଡି.ଏନ.ଏ.)-କଳାହାଣ୍ଡି ଜିଲା ଜୁନାଗଡ଼ ପୋଲିସ ବୁଧବାର ଏକ ଲୁଟେରା ଗ୍ୟାଙ୍ଗର ପର୍ଦ୍ଦାଫାଶ କରିଛି। ଏହି ଘଟଣାରେ ସମ୍ପୃକ୍ତ ଥିବା ୫ ଜଣକୁ ଗିରଫ କରିଛି। ଗିରଫମାନେ ହେଲେ ଭବାନୀପାଟଣା ସଦର ଥାନା ନାସିଗାଁର କାଳିଆ ଓରଫ ହେମରାଜ ହରପାଲ(୨୭), ତେନ୍ତୁଳିଖୁଣ୍ଟି ଗ୍ରାମର ସୁବାସ ମଙ୍ଗରାଜ(୩୨), କେଗାଁ ଥାନା ବୋରମୁଣ୍ଡ ଗ୍ରାମର ଭୁବନେ ବାଗ(୨୮), ଗୋଳାମୁଣ୍ଡା ଥାନା ଶଙ୍କରିପାଲିର ବେଦ ବାଗ (୩୫) ଓ ବଲାଙ୍ଗୀର ଜିଲା ସନ୍ଦେକେଲା ଥାନା ମମିଆ ଗ୍ରାମର ମନୋଜ ଦୀପ(୨୨)। ଏମାନଙ୍କଠାରୁ ୩ଟି ମୋଟର ସାଇକେଲ, ୬ଟି ମୋବାଇଲ ଫୋନ୍ ଓ ନଗଦ ୧୧ ହଜାର ୨୦ଟଙ୍କା ଜବତ କରାଯାଇଛି। ତେବେ ଏହି ଘଟଣାରେ ଭବାନୀପାଟଣା ସଦର ଥାନା ତେନ୍ତୁଳିଖୁଣ୍ଟି ଗ୍ରାମର ରାଜ କିଶୋର ବାଗ(୨୯) ଓ ଜଗନ୍ନାଥ ନାଏକ ଫେରାର ଅଛନ୍ତି। ଏ ନେଇ ଜୁନାଗଡ଼ ଥାନାରେ ନଂ.୨୬୮/୨୦ରେ ଏକ ମାମଲା ରୁଜୁ ହୋଇଛି। ଫେରାର ଥିବା ଅନ୍ୟ ୨ ଅଭିଯୁକ୍ତଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ଜୁନାଗଡ଼ ଭାରପ୍ରାପ୍ତ ଥାନା ଅଧିକାରୀ ଉତ୍ତମ କୁମାର ସାହୁ ପ୍ରକାଶ କରିଛନ୍ତି। ପ୍ରକାଶ ଯେ, ସେପ୍ଟେମ୍ବର ୨୪ ତାରିଖ ଅପରାହ୍ନରେ ଆରୋହଣ ଫାଇନାନ୍ସ କମ୍ପାନୀରେ କାମ କରୁଥିବା ଶଙ୍କରିପାଲି ଗ୍ରାମର ରାହୁଲ ନାଗ ଟଙ୍କା ଆଦାୟକରି ଜୁନାଗଡ଼ରୁ ଫେରୁଥିଲେ। ପାଣିଗାଁ ଜଙ୍ଗଲ ନିକଟରେ ଏହି ୭ ଲୁଟେରା ତାଙ୍କୁ ଅଟକାଇ ୩୦ହଜାର ୪୫୦ ଟଙ୍କା, ଗୋଟିଏ ମୋବାଇଲ ଫୋନ, ମନି ରିସିଭ ବୁକ୍ ଓ ମୋଟର ସାଇକେଲର ଚାବି ନେଇଯାଇଥିଲେ। ଏ ନେଇ ଅଭିଯୋଗ ପରେ ପୋଲିସ ତଦନ୍ତ ଚଳାଇଥିଲା।
