ଭୁବନେଶ୍ୱର,୧୩।୭ (ବ୍ୟୁରୋ): ଗ୍ରାହକଙ୍କୁ ଆପ୍ ଦ୍ୱାରା ଲୋନ୍ ଦେଇ ପରବର୍ତ୍ତୀ ସମୟରେ ମାନସିକ ନିର୍ଯାତନା ଦେବା ସହ ଅଧିକ ଟଙ୍କା ଆଦାୟ ମାମଲାରେ ମାଷ୍ଟରମାଇଣ୍ଡ୍ ହେଉଛନ୍ତି ଜଣେ ଚାଇନା ନାଗରିକ। ସେ ହେଲେ ଲିୟୁ ଇ। କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଅଭିଯୁକ୍ତ ଲିୟୁଙ୍କୁ ଧରିବାକୁ କେନ୍ଦ୍ର ସରକାରଙ୍କ ବ୍ୟୁରୋ ଅଫ୍ ଇମିଗ୍ରେଶନ୍ (ବିଓଆଇ)ର ସହାୟତା ଲୋଡ଼ିଛି। ଇଓଡବ୍ଲ୍ୟୁର ଅନୁରୋଧକ୍ରମେ ବିଓଆଇ ପକ୍ଷରୁ ତାଙ୍କ ବିରୋଧରେ ଲୁକ୍ ଆଉଟ୍ ସର୍କୁଲାର ଜାରି କରାଯାଇଛି। ଲିୟୁ ଏବେ ଭାରତରେ ଅଛନ୍ତି ନା ବିଦେଶରେ, ତାହା ଜଣାପଡ଼ି ନ ଥିଲେ ମଧ୍ୟ ଦେଶର ସମସ୍ତ ଏୟାରପୋର୍ଟ ଓ ସି ବିଚ୍ ସମେତ ଅନ୍ୟାନ୍ୟ ଚେକ୍ ପୋଷ୍ଟରେ ଆଲର୍ଟ କରିଦିଆଯାଇଛି। ଏଥିସହ ତାଙ୍କ ଉପରେ ନଜର ରଖିବାକୁ ଲ’ ଏନ୍ଫୋର୍ସମେଣ୍ଟ ଏଜେନ୍ସି ଓ ପୋଲିସକୁ ମଧ୍ୟ କୁହାଯାଇଛି। ଏହି ମାମଲାରେ ପୂର୍ବରୁ ଲିୟୁଙ୍କ ୫ ସହଯୋଗୀ ଇଓଡବ୍ଲ୍ୟୁ ଦ୍ୱାରା ଗିରଫ ହୋଇ ଜେଲରେ ଅଛନ୍ତି। ତେବେ ଲିୟୁଙ୍କ ସମେତ ଏକାଧିକ ଚାଇନା ନାଗରିକଙ୍କ ସମ୍ପୃକ୍ତି ରହିଛି। ଭାରତ ସମେତ ଥାଇଲାଣ୍ଡ ଓ ଅନ୍ୟ ଦେଶରେ ଏମାନେ ଲୋନ୍ ଆପ୍ ଦ୍ୱାରା ଠକେଇ ର଼୍ୟାକେଟ ଚଳାଇଥିବା ସନ୍ଦେହ କରି ଅଧିକ ତଦନ୍ତ ଚାଲିଥିବା ଇଓଡବ୍ଲ୍ୟୁ ସୂଚନା ଦେଇଛି। ମାଷ୍ଟରମାଇଣ୍ଡ ଲିୟୁ ଭାରତରେ କୋକୋ ଲୋନ୍, ଜୋଜୋ ଲୋନ୍, ଗୋଲ୍ଡେନ ଲାଇଟ୍ନିଂ ଲୋନ୍, ସିଲ୍ଭର କ୍ରେଡିଟ୍ ଲୋନ୍, ଗୋଲ୍ଡ କ୍ୟାଶ୍ ଲୋନ୍, ଲିଟିଲ୍ ବରୋ ଲୋନ୍, ଟ୍ୟାପ୍ କ୍ରେଡିଟ୍ ଲୋନ୍, କ୍ରେଡିଟ୍ ବିୟର ଲୋନ୍, ସ୍ପିଡି ରୁପି ଲୋନ୍, ଏକ୍ସପ୍ରେସ୍ କ୍ରେଡିଟ୍ ଲୋନ୍, କ୍ରେଡିଟ୍ ପ୍ଲାନ୍ ଲୋନ୍ ଭଳି ବହୁ ଆପ୍ ଦ୍ୱାରା ଠକେଇ କରିଛନ୍ତି। ତାଙ୍କ ମୂଳ କମ୍ପାନୀ ହେଉଛି ଚାଇନା ହାଙ୍ଗ୍ଜୋହୁଠାରେ ଥିବା ‘ଜିଆନ୍ବିଙ୍ଗ୍ ଟେକ୍ନୋଲୋଜି’। ଏଥିସହ ସେ ‘ଉମ୍ଲେଟ୍ ଟେକ୍ନୋଲୋଜି ପ୍ରାଇଭେଟ୍ ଲିଃ’ କମ୍ପାନୀର ନିର୍ଦ୍ଦେଶକ ଅଛନ୍ତି। ସେହିଭଳି ୱେଲୋ ଟିଉନ୍ ଟେକ୍ନୋଲୋଜିସ୍ ପ୍ରାଇଭେଟ୍ ଲିଃ, ମୁଡ୍ମେଟ୍ ଟେକ୍ନୋଲୋଜିସ୍ ପ୍ରାଇଭେଟ୍ ଲିଃ, ପିଙ୍କ୍ଲିଫ୍ ଆରିୟାନ୍ କମ୍ୟୁନିକେଶନ୍ସ ପ୍ରାଇଭେଟ ଲିଃ, ଟେକ୍ଲାଇଟ୍ ଡେଭଲପ୍ମେଣ୍ଟ ପ୍ରାଇଭେଟ୍ ଲିଃ, ଉରେଲା ଟେକ୍ନୋଲୋଜିସ୍ ପ୍ରାଇଭେଟ ଲିଃ, ଆଇଡବ୍ଲ୍ୟୁଟି ଇଣ୍ଡିଆ ଓ ଓସିଏନ୍ ଟ୍ରେଡିଙ୍ଗ୍ ସମେତ ୮ଟି କମ୍ପାନୀକୁ ପରିଚାଳନା କରନ୍ତି। ସେ ୨୦୧୯ରେ ଭାରତରେ ବେଆଇନ୍ ଲୋନ ଆପ୍ କାରବାର ଆରମ୍ଭ କରିଥିଲେ। ସହଯୋଗୀଙ୍କ ଦ୍ୱାରା ଲିୟୁ ସାଧାରଣ ଲୋକଙ୍କୁ ପ୍ରବର୍ତ୍ତାଇ ସେମାନଙ୍କ ନାମରେ ସିମ୍ କାର୍ଡ ସହ ବ୍ୟାଙ୍କ ଆକାଉଣ୍ଟ ଖୋଲୁଥିଲେ। ଏଥିସହ ଉକ୍ତ ଲୋକଙ୍କୁ କମ୍ପାନୀର ନିର୍ଦ୍ଦେଶକ ଓ କର୍ମଚାରୀ ଦାୟିତ୍ୱ ଦେଉଥିଲେ। ପରବର୍ତ୍ତୀ ସମୟରେ ସେମାନଙ୍କ ବ୍ୟାଙ୍କ ଆକାଉଣ୍ଟ ଓ କମ୍ପାନୀକୁ ଲିୟୁ ହିଁ ପରିଚାଳନା କରୁଥିଲେ। କେବଳ ସେତିକି ନୁହେଁ, ସେ ଗାଳି ସହ ଧମକ ଦେବାକୁ କଲସେଣ୍ଟର ମଧ୍ୟ ଖୋଲିଥିଲେ। କୋକୋ ଓ ଜୋଜୋ ଆପ୍ ସମେତ ଏକାଧିକ ଲୋନ୍ ଆପ୍ ମାଧ୍ୟମରେ ଠକେଇ ପାଇଁ ଜାଲ ବିଛାଉଥିଲେ। ଯେଉଁ ଗ୍ରାହକଙ୍କ ଆକାଉଣ୍ଟରେ ଠକେଇ ଟଙ୍କା କାରବାର ହେଉଥିଲା, ସେମାନଙ୍କୁ ୩ରୁ ୧୦ ହଜାର ଟଙ୍କା ଦେଇ ବହୁଗୁଣା ଟଙ୍କା ନିଜ ନେଉଥିଲେ। ଟଙ୍କା ନ ଦେଲେ କର୍ମଚାରୀଙ୍କ ଦ୍ୱାରା ଗାଳି, ଧମକ ଓ ନିର୍ଯାତନା ଦିଆଯାଉଥିଲା। ତଦନ୍ତ ବାଟବଣା କରିବାକୁ ଗ୍ରାହକଙ୍କଠାରୁ ମାଷ୍ଟରମାଇଣ୍ଡ୍ ଲିୟୁ ବିଭିନ୍ନ ମାଧ୍ୟମ ଦେଇ ଟଙ୍କା ନେଇଥାନ୍ତି। ୧୦୦ରୁ ଊର୍ଦ୍ଧ୍ୱ ଅଭିଯୋଗ ହେବା ପରେ ଇଓଡବ୍ଲ୍ୟୁ ଏପ୍ରିଲ୍ ୨୧ରେ ଏକ ମାମଲା ( ନଂ.୯/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।
