ଆଳି,୧୫।୬(ବନମାଳୀ ସେନାପତି ): କେନ୍ଦ୍ରାପଡ଼ା ଜିଲା ଆଳି ପୋଷ୍ଟଅଫିସ ଅଧୀନରେ ଥିବା ପୋଡାମରାଇ -ଆଳକଣା ଶାଖା ଡାକଘରେ ତାଲା ଝୁଲାଇ ଦେଇ ଫେରାର ହୋଇ ଯାଇଛନ୍ତି ପୋଷ୍ଟମାଷ୍ଟର । ପୋଷ୍ଟମାଷ୍ଟର ତାଲା ଝୁଲାଇ ଦେବା ପରେ ପୋଷ୍ଟାଲ ଇନ୍ସପେକ୍ଟର ପହଞ୍ଚି ଶାଖା ଡାକଘରେ ଆଉ ଗୋଟେ ତାଲା ମାରି ଦେଲେ । ଡାକଘରେ ଦୁଇ ଦୁଇଟି ତାଲା ଝୁଲୁଥିବା ବେଳେ ଚିନ୍ତାରେ ରହିଛନ୍ତି ଜମାକାରୀ ।
ସାତଦିନ ହେବ ତାଲା ଝୁଲୁଥିବାରୁ ଚିନ୍ତାରେ ପଡି ଯାଇଛନ୍ତି ଶହଶହ ଜମାକାରୀ । ସାଧାରଣ ଲୋକମାନେ ବିଭିନ୍ନ ସଂସ୍ଥାରେ ଅର୍ଥ ଜମାକରି ହରାଇବା ପରେ ପୋଷ୍ଟଅଫିସକୁ ଭରସା କରି ବିଭିନ୍ନ ଯୋଜନାରେ ଅର୍ଥ ଜମା ରଖୁଥିଲେ । କିନ୍ତୁ ପୋଷ୍ଟମାଷ୍ଟର ତାଲା ପକାଇ ଦେଇ ଫେରାର ହେବା ଘଟଣାକୁ ନେଇ ଜମାକାରୀ ଚିନ୍ତାରେ ପଡି ଯାଇଛନ୍ତି । ଜମାକାରୀଙ୍କ ପାସବୁକ ପୋଷ୍ଟମାଷ୍ଟରଙ୍କ ନିକଟରେ ଥିବାରୁ ସେମାନଙ୍କ ଜମାଅର୍ଥ ଅଛି ନା ହଡ଼ପ ହୋଇଯାଇଛି ତାହାକୁ ନେଇ ଚିନ୍ତାରେ ପଡି ଯାଇଛନ୍ତି । ପୋଷ୍ଟ ମାଷ୍ଟର ପଙ୍କଜ ସାହା ଘରୁ ନିଖୋଜ ଥିବା ନେଇ ପରିବାର ପକ୍ଷରୁ ଆଳି ଥାନାରେ ଅଭିଯୋଗ ହୋଇଥିବା ବେଳେ ଡାକଘର ଅର୍ଥ ହଡ଼ପ ନେଇ ପୋଷ୍ଟାଲ ଇନିସପେକ୍ଟର ଆଳି ଥାନାରେ ଲିଖିତ ଅଭିଯୋଗ କରିଛନ୍ତି ।
