ପୁରୀ ଅଫିସ/କାକଟପୁର, ୮।୫(ଡି.ଏନ୍.ଏ): କାକଟପୁରରେ ବେଆଇନ ଭାବେ କୋଭିଡ୍ ଟେଷ୍ଟ କରାଯାଇ ରିପୋର୍ଟ ଦେବା ଅଭିଯୋଗରେ ମା’ ପାଥୋଲାବକୁ ଶୁକ୍ରବାର ପୋଲିସ ସିଲ୍ କରିବା ସହ ମାଲିକଙ୍କୁ ଗିରଫ କରିଛି। ଦୁଇଟି ଟେଷ୍ଟିଂ କିଟ୍ ସମେତ ଜାଲ୍ କୋଭିଡ୍ ରିପୋର୍ଟ ଜବତ କରାଯାଇଛି।
ସୂଚନା ଅନୁଯାୟୀ, କାକଟପୁର ଅଞ୍ଚଳରେ ଥିବା ମା’ ପାଥୋଲାବ୍ରେ ବେଆଇନ ଭାବେ କୋଭିଡ୍ ଟେଷ୍ଟ କରାଯାଇ ରିପୋର୍ଟ ଦିଆଯାଉଥିବା ନେଇ ସ୍ଥାନୀୟ ଥାନାରେ କାକଟପୁର ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସାଧିକାରୀ ଆଶିଷ ମହାପାତ୍ର ଅଭିଯୋଗ କରିଥିଲେ। ତାଙ୍କ ନାମକୁ ବ୍ୟବହାର କରି ଓ ନକଲି ଦସ୍ତଖତ କରି କୋଭିଡ୍ ଟେଷ୍ଟ କରାଯାଉଥିବା ସେ ଅଭିଯୋଗପତ୍ରରେ ଦର୍ଶାଇଥିଲେ। ଏହାପରେ ଗୁରୁବାର କାକଟପୁର ଥାନା ଅଧିକାରୀ ଏବଂ ତହସିଲଦାର ମିଳିତ ଭାବେ ମା’ ପାଥୋଲାବ୍ରେ ଚଢ଼ାଉ କରିଥିଲେ। ମାଲିକ ପ୍ରକାଶ ଦାଶ ଓ ତାଙ୍କ ସହଯୋଗୀଙ୍କୁ ଥାନାକୁ ଆଣି ପଚରାଉଚରା କରିଥିଲେ। ଶୁକ୍ରବାର ଅତିରିକ୍ତ ଏସ୍ପି ପୂର୍ଣଚନ୍ଦ୍ର ପ୍ରଧାନ କାକଟପୁରରେ ପହଞ୍ଚି ଘଟଣାର ତଦନ୍ତ କରିବା ସହ ଲାବ୍ ମାଲିକଙ୍କୁ ଗିରଫ କରିବାକୁ ନିର୍ଦ୍ଦେଶ ଦେଇଥିଲେ। ପୋଲିସ ପ୍ରକାଶଙ୍କୁ ଗିରଫ କରିବା ସହ ଉକ୍ତ ଲାବ୍ ସମେତ ତାଙ୍କର ୩ ଲାବ୍କୁ ସିଲ୍ କରିଛି। ପ୍ରକାଶଙ୍କୁ କୋଭିଡ୍ ଟେଷ୍ଟ ପାଇଁ ଡାକ୍ତରଖାନା ନିଆଯିବା ପରେ ସେ କରୋନା ସଂକ୍ରମିତ ଥିବା ଜଣାପଡ଼ିଥିଲା। ଫଳରେ ତାଙ୍କୁ କୋର୍ଟଚାଲାଣ କରାଯିବା ପରିବର୍ତ୍ତେ କୋଭିଡ୍ କେୟାର ସେଣ୍ଟରକୁ ପଠାଯାଇଛି ବୋଲି ଥାନା ଆଇଆଇସି ସୁଶାନ୍ତ କୁମାର ସାହୁ କହିଛନ୍ତି। ସେହିପରି କାକଟପୁର ତହସିଲଦାର ବିରଞ୍ଚି ନାରାୟଣ ବେହେରା କହିଛନ୍ତି, ବର୍ତ୍ତମାନ ସୁଦ୍ଧା ତଦନ୍ତ ପ୍ରକ୍ରିୟା ସରିନାହିଁ। ସରକାରୀ ଡାକ୍ତରଖାନାରୁ କିଟ୍ ଆସି ଉକ୍ତ ପାଥୋଲାବ୍ରେ ଟେଷ୍ଟିଂ ହେଉଥିଲା। ସେହିଭଳି ଡାକ୍ତରଙ୍କ ନାମରେ ମଧ୍ୟ ଜାଲ୍ ଦସ୍ତଖତ କରାଯାଇ ଲୁଟ୍ ହୋଇଛି। ତେବେ କିଭଳି ଭାବେ ପାଥୋଲାବ୍କୁ କିଟ୍ ଆସିଲା ଓ କେଉଁ ଅଧିକାରୀମାନେ ଏଥିରେ ସଂଶ୍ଳିଷ୍ଟ ଅଛନ୍ତି ସେନେଇ ତଦନ୍ତ ଚାଲିଛି। ତଦନ୍ତ ପରେ ସବୁ କିଛି ସ୍ପଷ୍ଟ ହେବ। ଉଲ୍ଲେଖ ଥାଉ କି, କାକଟପୁର ଫୁରୁସିପଡ଼ାର ବିସ୍ମୟ ବିଶ୍ବାଳ ଟାଇଫଏଡ ଜ୍ବରରେ ଆକ୍ରାନ୍ତ ହୋଇ ପ୍ରକାଶଙ୍କ ନିକଟକୁ ଆସିଥିଲେ। ନକଲି ଡାକ୍ତର ପ୍ରକାଶ ତଙ୍କର କୋଭିଡ୍ ଟେଷ୍ଟ କରିଥିଲେ। ନେଗେଟିଭ ଥିବା ସତ୍ତ୍ୱେ ତାଙ୍କୁ ପଜିଟିଭ ରିପୋର୍ଟ ଦେଇଥିଲେ।
ଏହାପରେ ଘଟଣା ପଦାକୁ ଆସିଥିଲା। ପ୍ରକାଶ ମାତ୍ର ମାଟ୍ରିକ ପାଶ କରିଛନ୍ତି। ଏକ ନକଲି ମେଡିକାଲ ପାଶ୍ ସାର୍ଟିଫିକେଟ ଜେରକ୍ସ କପି ତାଙ୍କ ପାଖରେ ଅଛି। ଏସ୍ସିବି ମେଡିକାଲର ଜଣେ ଡାକ୍ତରଙ୍କ ନାମରେ ଫଲ୍ସ ପ୍ୟାଡ ବନାଇ ଲୋକଙ୍କୁ ଏଭଳି ଭାବେ ଠକି ଲୁଟୁଥିଲେ।
