ବାଲେଶ୍ୱର ଅଫିସ, ୫।୮-ବାଲେଶ୍ୱର ଜିଲାରେ ଲଘୁଚାପଜନିତ ବର୍ଷା ଯୋଗୁ ଚାଷୀକୁଳ ଆଶ୍ୱସ୍ତ ହୋଇଛନ୍ତି। ଗତ ସୋମବାରଠାରୁ ଜିଲାରେ ମୋଟ୍ ୩୩୮ମି.ମି. ବର୍ଷା ହୋଇଥିବା ବେଳେ ହାରାହାରି ୨୮.୧୭ମି.ମି. ବର୍ଷା ରେକର୍ଡ଼ କରାଯାଇଛି। ବାହାନଗା ବ୍ଲକରେ ସର୍ବାଧିକ ୮୫ମି.ମି. ବର୍ଷା ହୋଇଛି। ସୋରରେ ୫୬ମି.ମି., ଖଇରାରେ ୨୪, ଔପଦାରେ ୩୯, ରେମୁଣାରେ ୩୩ମି.ମି., ସଦରରେ ୩୫ମି.ମି., ଜଳେଶ୍ୱରରେ ୩୧ମି.ମି., ନୀଳଗିରିରେ ୧୯ମି.ମି., ବାଲିଆପାଳରେ ୯ମି.ମି., ଭୋଗରାଇରେ ୫ମି.ମି. ଓ ବସ୍ତାରେ ୦ ମି.ମି. ବର୍ଷା ହୋଇଥିବା ଜଣାପଡ଼ିଛି।
ଚଳିତବର୍ଷ ଠିକ୍ ସମୟରେ ମୌସୁମୀ ବର୍ଷା ପହଞ୍ଚିଥିବା ବେଳେ ଜିଲାରେ ଅଳ୍ପ ବର୍ଷା କାରଣରୁ ଚାଷ କାର୍ଯ୍ୟ ପାଇଁ ଯଥେଷ୍ଟ ଆଗେଇ ପାରି ନ ଥିଲା। ଜିଲାର ରେମୁଣା, ସଦର, ନୀଳଗିରି, ବାଲିଆପାଳ, ଜଳେଶ୍ୱର, ବସ୍ତା, ଭୋଗରାଇ ଆଦି ବ୍ଲକରେ ବର୍ଷା ଅଭାବ କାରଣରୁ ଚାଷ କାର୍ଯ୍ୟ ପଛରେ ପଡ଼ିଛି। ଜିଲାରେ ୨ଲକ୍ଷ ୧୯ହଜାର ୩୭୮ ହେକ୍ଟର ଜମିରେ ଧାନଚାଷ ହୋଇଥାଏ। ସେଥିମଧ୍ୟରୁ ପ୍ରାୟ ୧ଲକ୍ଷ ହେକ୍ଟର ଜମିକୁ ଜଳସେଚନ ସୁବିଧା ଅଛି। ଅବଶିଷ୍ଟ ଜମିରେ ଚାଷ ବର୍ଷା ଜଳ ଉପରେ ନିର୍ଭର କରିଥାଏ। ବର୍ତ୍ତମାନ ସୁଦ୍ଧା ୪୬ହଜାର ହେକ୍ଟର ଜମିରେ ରୁଆ ସରିଥିବା ବେଳେ ୧୮୨୫ ହେକ୍ଟର ଜମିରେ ବୁଣା ହୋଇଛି। ବର୍ଷା ଅଭାବରୁ ପ୍ରାୟ ୧ଲକ୍ଷ ୪୮ହଜାର ହେକ୍ଟର ଜମି ପଡ଼ିଆ ପଡ଼ିଥିବା ବିଭାଗୀୟ ସୂତ୍ରରୁ ଜଣାପଡ଼ିଛି। ଚଳିତବର୍ଷ ମେ’ରେ ୨୧୮.୮ ମି.ମି. ବର୍ଷା ହୋଇଥିବା ବେଳେ ଜୁନ୍ରେ ୧୪୮.୪ ମି.ମି. ଓ ଜୁଲାଇରେ ୧୩୧.୧ ମି.ମି. ବର୍ଷା ହୋଇଛି। ଗତ ୨୦୧୯ ଜୁନ୍ରେ ୧୩୪.୧ ମି.ମି., ଜୁଲାଇରେ ୧୯୪.୬ ମି.ମି., ଅଗଷ୍ଟରେ ୨୩୩.୧ମି.ମି. ଓ ସେପ୍ଟେମ୍ବରରେ ୩୪୭.୮ ମି.ମି. ବର୍ଷା ହୋଇଥିବା ବେଳେ ଚାଷ ପାଇଁ ବର୍ଷା ଜଳ ମଧ୍ୟ କମ୍ ପଡ଼ିଥିଲା। ଚାଷ ପାଇଁ ଲଗାଣ ବର୍ଷା ଏପର୍ଯ୍ୟନ୍ତ ଦେଖିବାକୁ ମିଳି ନାହଁି। ଅନ୍ୟପକ୍ଷରେ ବର୍ଷା ବି ସବୁ ସ୍ଥାନରେ ସମାନ ପରିମାଣରେ ହେଉ ନାହଁି। ବର୍ଷାକୁ ଚାହଁି ଚାହଁି ଚାଷୀ ବିଳମ୍ବରେ ଚାଷ କାର୍ଯ୍ୟ ଆରମ୍ଭ କରିଥିଲେ ବି ଠିକଣା ସମୟରେ ବର୍ଷୁନି। ମୌସୁମୀର ଏଭଳି ବ୍ୟତିକ୍ରମକୁ ଦେଖି ଚଳିତବର୍ଷ ଚାଷକାମ ସୁରୁଖୁରୁରେ ହୋଇପାରିବ କି ନାହଁି ତାକୁ ନେଇ ଚିନ୍ତାରେ ପଡ଼ିଛନ୍ତି ଚାଷୀ।
ଏ ସମ୍ପର୍କରେ ଜିଲା ପାଣିପାଗ ବିଭାଗ ଅଧିକାରୀ ସୀତାକାନ୍ତ ଭୋଇ କହନ୍ତି, ଚାଷ ପାଇଁ ଯେତିକି ବର୍ଷାର ଆବଶ୍ୟକତା ରହିଛି ଚଳିତବର୍ଷ ତାହା ହୋଇନାହଁି। ୧ହଜାର ମି.ମି. ବର୍ଷା ହେଲେ ଏହାକୁ ସ୍ବାଭାବିକ ବର୍ଷା ଧରାଯାଇଥାଏ ବୋଲି ପ୍ରକାଶ କରିଛନ୍ତି।
