ନୂଆଦିଲ୍ଲୀ, ୯।୭(ପି.ଟି.):ଜଳବାୟୁ ପରିବର୍ତ୍ତନ ଜନିତ ଅସ୍ବାଭାବିକ ଗ୍ରୀଷ୍ମ ଓ ଶୀତ ଯୋଗୁ ଭାରତରେ ପ୍ରତିବର୍ଷ ପ୍ରାୟ ୭,୪୦,୦୦୦ ଲୋକଙ୍କ ଜୀବନ ଯାଉଛି। ଏ ସମ୍ପର୍କିତ ଏକ ଅଧ୍ୟୟନ ଲାନ୍ସେଟ୍ ପ୍ଲାନେଟାରି ହେଲ୍ଥ ପତ୍ରିକାରେ ପ୍ରକାଶ ପାଇଛି। ଅଷ୍ଟ୍ରେଲିଆର ମୋନାଶ ୟୁନିଭର୍ସିଟି ଗବେଷକମାନଙ୍କ ନେତୃତ୍ୱରେ ଏକ ଅନ୍ତର୍ଜାତୀୟ ଟିମ୍ ଏହି ଅଧ୍ୟୟନ କରିଥିଲା। ସେମାନଙ୍କ ଆକଳନ ଅନୁଯାୟୀ ସାରା ବିଶ୍ୱରେ ଏହି କାରଣରୁ ୫୦ ଲକ୍ଷରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ହୋଇଥାଇପାରେ। ୨୦୦୦ରୁ ୨୦୧୯ ମଧ୍ୟରେ ସବୁ ଅଞ୍ଚଳରେ ଗ୍ରୀଷ୍ମପ୍ରବାହ ଜନିତ ମୃତ୍ୟୁସଂଖ୍ୟା ବଢ଼ିଥିଲା। ଜଳବାୟୁ ପରିବର୍ତ୍ତନ ଜନିତ ବିଶ୍ୱ ତାପନ ଯୋଗୁ ଭବିଷ୍ୟତରେ ମୃତ୍ୟୁସଂଖ୍ୟା ଆହୁରି ବଢ଼ିବ ବୋଲି କୁହାଯାଇଛି।
ଗବେଷକମାନଙ୍କ କହିବା ଅନୁଯାୟୀ ଭାରତରେ ଅସ୍ବାଭାବିକ ଶୀତ ପ୍ରତିବର୍ଷ ୬,୫୫,୪୦୦ ଲୋକଙ୍କ ଜୀବନ ନେଉଥିଲା ବେଳେ ଅତ୍ୟଧିକ ଗ୍ରୀଷ୍ମ ଯୋଗୁ ୮୩,୭୦୦ ଜଣଙ୍କ ମୃତ୍ୟୁ ଘଟୁଛି। ଗବେଷକ ଦଳ ୨୦୦୦ରୁ ୨୦୧୯ ମଧ୍ୟରେ ବିଭିନ୍ନ ଅଞ୍ଚଳର ତାପମାତ୍ରା ଏବଂ ମୃତ୍ୟୁହାରକୁ ଅନୁଧ୍ୟାନ କରି ଉପରୋକ୍ତ ରିପୋର୍ଟ ପ୍ରକାଶ କରିଛନ୍ତି। ଏହି ସମୟ ମଧ୍ୟରେ ବିଶ୍ୱ ତାପମାତ୍ରା ୧୦ ବର୍ଷରେ ୦.୨୬ ପ୍ରତିଶତ ହାରରେ ବୃଦ୍ଧି ପାଇଛି। ଅଧ୍ୟୟନ ଅନୁଯାୟୀ ବିଶ୍ୱର ମୋଟ ମୃତ୍ୟୁସଂଖ୍ୟାର ୯.୩୪ ପ୍ରତିଶତ ଅତ୍ୟଧିକ ଉତ୍ତାପ ଓ ଥଣ୍ଡା ଯୋଗ ବୃଦ୍ଧି ପାଇଛି। ଅର୍ଥାତ୍ ପ୍ରତି ଲକ୍ଷେ ମୃତ୍ୟୁରେ ୭୬ ଅଧିକ ମୃତ୍ୟୁ ତାପମାତ୍ରା ପରିବର୍ତ୍ତନ ଯୋଗୁ ହେଉଛି। ତେବେ ବିଶ୍ୱ ତାପନ ବଢ଼ୁଥିବାରୁ ଅତ୍ୟଧିକ ଶୀତ ଜନିତ ମୃତ୍ୟୁସଂଖ୍ୟା ସାମାନ୍ୟ କମିଥାଇପାରେ ବୋଲି ମୋନାଶ ୟୁନିଭର୍ସିଟିର ପ୍ରଫେସର ୟୁମିଙ୍ଗ ଗୁଓ କହିଛନ୍ତି। ଅନ୍ୟପକ୍ଷରେ ଉତ୍ତାପଜନିତ ମୃତ୍ୟୁସଂଖ୍ୟା କ୍ରମାଗତ ବଢ଼ିଚାଲିଥିବାରୁ ଏହା ଆଗାମୀ ଦିନରେ ଆହୁରି ବଢ଼ିବା ଆଶଙ୍କା କରାଯାଉଛି। ଗବେଷକମାନେ ୫ ମହାଦେଶ ଅନ୍ତର୍ଗତ ୪୩ ଦେଶରୁ ତଥ୍ୟ ସଂଗ୍ରହ କରିଥିଲେ। ଭିନ୍ନ ଭିନ୍ନ ଜଳବାୟୁ, ସାମାଜିକ-ଅର୍ଥନୈତିକ ସ୍ଥିତି, ଜନସଂଖ୍ୟା ସ୍ଥିତି, ଭିତ୍ତିଭୂମି ଓ ଜନସ୍ବାସ୍ଥ୍ୟ ସେବା ଆଦି ବିଭିନ୍ନ ଦିଗକୁ ବିଚାରକୁ ନିଆଯାଇ ଅନୁଧ୍ୟାନ କରାଯାଇଥିଲା।
