ବ୍ରହ୍ମବରଦା,୧୮ା୧୨(ଯଯାତି କେଶରୀ ବେହେରା): ରସୁଲୁପୁର ବ୍ଲକ ଅନ୍ତର୍ଗତ ବ୍ରହ୍ମବରଦା ପଞ୍ଚାୟତ ସାପ୍ତାହିକ ହାଟର ଉନ୍ନତୀକରଣ ନିମନ୍ତେ ମୁଖ୍ୟମନ୍ତ୍ରୀ, ରାଜସ୍ବ ବିଭାଗ, ଜିଲାପାଳ, ତହସିଲଦାର ଓ ସ୍ଥାନୀୟ ସରପଞ୍ଚଙ୍କୁ ଚିଠି ଲିଖିଛନ୍ତି ବରିଷ୍ଠ ନାଗରିକ ଚିନ୍ତାମଣି ରାଉତ।
ବ୍ରାହ୍ମଣୀ ନଦୀବନ୍ଧ ପାର୍ଶ୍ୱରେ ୩ ଏକରରୁ ଊର୍ଦ୍ଧ୍ୱ ସରକାରୀ ଜମିରେ ଏହି ହାଟ ଅବସ୍ଥିତ। ବ୍ରହ୍ମବରଦା ଏକ ବ୍ୟବସାୟୀୟିକ ପେଷ୍ଠସ୍ଥଳ ହୋଇଥିବାରୁ ଏହାର ଚର୍ତୁପାଶ୍ୱରେ ଥିବା ୧୦ରୁ ଊର୍ଦ୍ଧ୍ୱ ପଞ୍ଚାୟତବାସୀ ବୁଧବାର ଓ ଶନିବାର ବସୁଥିବା ଏହି ହାଟରେ ପନିପରିବା କ୍ରୟ ଓ ବିକୟ ନିମନ୍ତେ ନିର୍ଭର କରିଥାନ୍ତି। ହାଟରେ ୫ ହଜାରରୁ ଊର୍ଦ୍ଧ୍ୱ ଲୋକଙ୍କ ଜନସମାଗମ ହୋଇଥାଏ। ଗ୍ରାମାଞ୍ଚଳର ପରିବା ଚାଷୀ, କୁମ୍ଭାର ସମ୍ପ୍ରଦାୟ, ହସ୍ତତନ୍ତ ବସ୍ତ୍ର ବ୍ୟବସାୟୀ, ମାଛ, ମାଂସ ବେପାରୀ, ବିଭିନ୍ନ ପ୍ରକାରର କଂସାବାସନ, ତେଜରାତି ଦୋକାନୀ ଓ କମାର ସମ୍ପ୍ରଦାୟ ବ୍ୟବସାୟୀ କରିବା ପାଇଁ ଏଠାକୁ ଆସିଥାନ୍ତି। ହେଲେ ହାଟରେ ଖରା, ବର୍ଷା, ଝଡ଼ ଓ ତୋଫାନ ସମୟରେ ଉଭୟ ବ୍ୟବସାୟୀ ଓ ଗ୍ରାହକ ନାହିଁ ନ ଥିବାର ସମସ୍ୟାର ସମ୍ମୁଖୀନ ହେଉଛନ୍ତି।
ବର୍ଷାଦିନରେ ଜଳ ନିଷ୍କାସନ ପାଇଁ କୌଣସି ଡ୍ରେନେଜ ସୁବିଧା ନ ଥିବାରୁ ହାଟରେ କାଦୁଅ ପଚପଚରେ ଜରିପାଲ ତଳେ ବସି ବ୍ୟବସାୟୀ ବେପାର କରିଥାନ୍ତି। ଜମିଦାରି ପ୍ରଥା ପ୍ରଚଳିତ ସମୟରୁ ଏହି ହାଟ ହୋଇଆସୁଛି। ହାଟ ସରକାରୀ ଜମିରେ ଥିଲେ ମଧ୍ୟ ଜଣେ ବ୍ୟକ୍ତିଙ୍କ ମାଲିକାନାରେ ଚାଲିଛି। ସମ୍ପୃକ୍ତ ବ୍ୟକ୍ତି ଜଣକ ବ୍ୟବସାୟୀଙ୍କଠାରୁ ଜୋର ଜବରଦସ୍ତ ହାଟ ମାହାସୁଲ ଆଦାୟ କରୁଛନ୍ତି। କ୍ଷୁଦ୍ର ଚାଷୀଙ୍କଠାରୁ ମଧ୍ୟ ପରିବା ଆଦାୟ କରାଯାଉଛି। ଫଳରେ ସରକାରଙ୍କ ରାଜସ୍ବ ହାନି ହେଉଛି। ତେଣୁ ଏହି ହାଟରେ ପିଣ୍ଡି ନିର୍ମାଣ ସହ ନାଳ, ଶୌଚାଳୟ, ପାନୀୟ ଜଳ ସୁବିଧା ଓ ସରକାରୀ ଜମିକୁ ଚିହ୍ନଟ କରି ଲୋକଙ୍କୁ ସୁବିଧା ସୁଯୋଗଯୋଗାଇ ଦେବାକୁ ବରିଷ୍ଠ ନାଗରିକ ରାଉତ ଚିଠିରେ ଉଲ୍ଲେଖ କରିଛନ୍ତି। ଏହାହେଲେ ବ୍ୟବସାୟୀଙ୍କ ସହ ଆଖପାଖ ୧୦ରୁ ଅଧିକ ଗ୍ରାମବାସୀ ଉପକୃତ ହେବେ ବୋଲି ସେ ଦର୍ଶାଇଛନ୍ତି।
