ମାଲକାନଗିରି,୧୩।୩ (ଡି.ଏନ୍.ଏ.): ଓଡ଼ିଶା ସୁରକ୍ଷା ସେନା ପକ୍ଷରୁ ଭାରତକୁ ହିନ୍ଦୁ ରାଷ୍ଟ୍ର ଘୋଷଣା କରିବାକୁ ଦାବି କରାଯାଇଛି। ସୋମବାର ଏକ ଖବରଦାତା ସମ୍ମିଳନୀରେ ସଂଗଠନର ରାଜ୍ୟ ସଭାପତି ଅଭିଷେକ ଯୋଷୀ ଏହି ଦାବି କରିଛନ୍ତି।
ସ୍ଥାନୀୟ ଏକ ହଟେଲରେ ଆୟୋଜିତ ଏକ ଖବରଦାତା ସମ୍ମିଳନୀରେ ସଭାପତି ଯୋଷୀ ପ୍ରକାଶ କରିଛନ୍ତି ଯେ, ଭାରତ ସନାତନ ଆର୍ଯ୍ୟଭୂମି ଭାବେ ଜଣାଶୁଣା। କାଳକ୍ରମେ ମୋଗଲ ଏବଂ ବ୍ରିଟିଶ୍ ଭାରତରେ ୫୦୦ ବର୍ଷ ଶାସନ କରି ହିନ୍ଦୁ ରାଷ୍ଟ୍ରକୁ ବିଭିନ୍ନ ଆଖ୍ୟା ଦେଇ ଅପଭ୍ରଷ୍ଟ କରିଛନ୍ତି। ଯାହାକି ଆଜି ସମ୍ବିଧାନରେ ଆମ ଦେଶ ଭାରତ, ହିନ୍ଦୁସ୍ଥାନ କିମ୍ବା ଇଣ୍ଡିଆ ତାହା ଦେଶବାସୀଙ୍କ ମନରେ ଦ୍ୱନ୍ଦ ସୃଷ୍ଟି କରୁଛି। ଭାରତ ସରକାର ନଥିପତ୍ରରେ ଇଂଲିଶରେ ଗର୍ଭନମେଣ୍ଟ ଅଫ୍ ଇଣ୍ଡିଆ ଲେଖୁଥିଲା ବେଳେ ହିନ୍ଦୀ ଓ ଅନ୍ୟାନ୍ୟ ଭାଷାରେ ଭାରତ ସରକାର ବୋଲି ଲେଖାଯାଉଛି। ଏହାଦ୍ୱାରା ଅଖଣ୍ଡ ଭାରତ ହିନ୍ଦୁ ରାଷ୍ଟ୍ର ସଂଜ୍ଞା ନିରୁପଣରେ ସନ୍ଦେହ ସୃଷ୍ଟି କରିଛି। ପୃଥିବୀ ଏବଂ ସୁଖ୍ମ ଜଗତରେ ଜୀବନର ଉଦ୍ଦେଶ୍ୟ ପୂରଣ କରିବାକୁ ରାଷ୍ଟ୍ର ଶବ୍ଦ ବ୍ୟବହାର ହୁଏ। ଭାରତରେ ହିନ୍ଦୁମାନେ ବସବାସ କରୁଥିବାରୁ ଭାରତକୁ ତୁରନ୍ତ ହିନ୍ଦୁ ରାଷ୍ଟ୍ର ଘୋଷଣା କରିବାକୁ ଯୋଷୀ ସମର୍ଥନ କରି ଦାବି କରୁଛନ୍ତି। ଅନ୍ୟମାନଙ୍କ ମଧ୍ୟରେ ଓଡ଼ିଶା ସୁରକ୍ଷା ସେନା ରାଜ୍ୟ ସାଧାରଣ ସମ୍ପାଦକ ସବ୍ୟସାଚୀ ଦାସ, ସମାଜସେବୀ ସୁଶାନ୍ତ ସାମଲ, ସନୁ ଅନୁଗୁ ପ୍ରମୁଖ ଉପସ୍ଥିତ ଥିଲେ।
