ଭୁବନେଶ୍ୱର,୨୫।୩(ବ୍ୟୁରୋ): ୧୦ ଦଫା ଦାବି ନେଇ ଶୁକ୍ରବାର ରାଜ୍ୟର କୁଷ୍ଠ ରୋଗୀ ସଂଗଠନ ସମୂହ ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ଲୋୟର ପିଏମ୍ଜିରେ ବିକ୍ଷୋଭ ପ୍ରଦର୍ଶନ କରାଯାଇଛି। ମାଗଣା ଘର, ପାନୀୟ ଜଳ ଓ ବିଜୁଳି ଯୋଗାଣ ପାଇଁ କୁଷ୍ଠ ପୀଡିତ ଆନ୍ଦୋଳନକାରୀମାନେ ଅଡ଼ିବସିଛନ୍ତି। ରାଜ୍ୟରେ ଖାଲିଥିତ୍ବା ୩୫୯ ଏବଂ କେନ୍ଦ୍ର ସରକାରଙ୍କ ଦ୍ୱାରା ମଞ୍ଜୁରପ୍ରାପ୍ତ ୧୮୪ କୁଷ୍ଠ କର୍ମୀ ପଦବୀ ପୂରଣ ନିମନ୍ତେ ୨୦୧୪ରେ ତତ୍କାଳୀନ ସ୍ବାସ୍ଥ୍ୟମନ୍ତ୍ରୀଙ୍କ ନିଷ୍ପତ୍ତି କାର୍ଯ୍ୟକାରୀ କରିବା ପ୍ରମୁଖ ଦାବି ରହିଛି। ପ୍ରତ୍ୟେକ କୁଷ୍ଠ ପୀଡ଼ିତଙ୍କୁ ୪୦ ପ୍ରତିଶତ ବିକଳାଙ୍ଗ ପ୍ରମାଣପତ୍ର, ଆର୍ଏଫ୍ଟି ଏବଂ କୁଷ୍ଠମୁକ୍ତ ପ୍ରମାଣପତ୍ର ପ୍ରଦାନ ଅନ୍ୟ ଏକ ଦାବି ରହିଛି। ରାଜ୍ୟରେ ଥିବା ମୋଟ୍ ୮୬ଟି କଲୋନିରେ କେବେ ଘର ତିଆରି ହେବ ବୋଲି କମିଟି ପକ୍ଷରୁ ପ୍ରଶ୍ନ କରାଯାଇଛି। ୮୪ଟି କୁଷ୍ଠ କଲୋନି, ୧୪ଟି କୁଷ୍ଠ ଚିକିତ୍ସାଳୟ, ୪ଟି କୁଷ୍ଠାଶ୍ରମ ଏବଂ ଜାତୀୟସ୍ତରାୟ ହିନ୍ଦ କୁଷ୍ଠ ନିବାରଣ ସଂଘକୁ ଭାଙ୍ଗିଦେବା ପାଇଁ ଚକ୍ରାନ୍ତ ଚାଲିଥିତ୍ବା କମିଟିର ସାଧାରଣ ସମ୍ପାଦକ ଦୁର୍ଯ୍ୟୋଧନ ସାହୁ କହିଛନ୍ତି। ସେହିପରି ମାଗଣା ଶିକ୍ଷା, ନିଯୁକ୍ତି, ଆମତ୍ନିଯୁକ୍ତି, ତାଲିମ୍ ସହ ପ୍ରତ୍ୟେକ ପରିବାରକୁ ୫ ଲକ୍ଷ ଟଙ୍କା ଋଣ ବ୍ୟବସ୍ଥା ପାଇଁ ଆନ୍ଦୋଳନକାରୀମାନେ କହିଛନ୍ତି। ଅପରାହ୍ନରେ ଆନ୍ଦୋଳନକାରୀମାନେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡାଙ୍କୁ ଭେଟି ଦାବି ଉପସ୍ଥାପନ କରିଥିଲେ। ତେବେ ମନ୍ତ୍ରୀ ପ୍ରତ୍ୟେକ କୁଷ୍ଠ କଲୋନି ଅନ୍ତେବାସୀଙ୍କୁ ଜାଗା ମିଶନ ଜରିଆରେ ଜମି ଅଧିକାର ପ୍ରଦାନ କରିବା ସହ ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ପ୍ରତ୍ୟେକ ପରିବାରକୁ ୩୫ କେଜି ଚାଉଳ ପ୍ରଦାନ ଆଦି ନେଇ ଆଶ୍ୱାସନା ଦେଇଛନ୍ତି। କୁଷ୍ଠ ପୀଡ଼ିତଙ୍କୁ ମାସିକ ୫ହଜାର ଟଙ୍କା ଭତ୍ତା ପ୍ରଦାନ ପାଇଁ ହୋଇଥିବା ଦାବି ପୂରଣ ଲାଗି ସରକାରଙ୍କୁ ପ୍ରସ୍ତାବ ଦିଆଯିବ ବୋଲି ମନ୍ତ୍ରୀ କହିଛନ୍ତି। ଝିଅ ବାହାଘର ପାଇଁ ସହାୟତା ରାଶି ୫୦ ହଜାର ଟଙ୍କାକୁ ବୃଦ୍ଧି କରାଯିବା ସହ ଦିବ୍ୟାଙ୍ଗଙ୍କୁ ବିବାହ କରୁଥିବା କନ୍ୟାଙ୍କୁ ଅଢ଼େଇ ଲକ୍ଷ ଟଙ୍କା ପର୍ଯ୍ୟନ୍ତ ପ୍ରୋସତ୍ାହନ ରାଶି ପ୍ରଦାନ ନିମନ୍ତେ ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି। ତେବେ ଏଥିରେ ଆନ୍ଦୋଳନକାରୀମାନେ ସନ୍ତୁଷ୍ଟ ନ ଥିବା କହିଛନ୍ତି। ଅନ୍ୟ ଦାବିଗୁଡ଼ିକ ପୂରଣ ନିମନ୍ତେ କମିଟି ପକ୍ଷରୁ ବୈଠକ କରାଯାଇ ପରବର୍ତ୍ତୀ ନିଷ୍ପତ୍ତି ନିଆଯିବା ସହ ମୁଖ୍ୟମନ୍ତ୍ରୀଙ୍କୁ ଭେଟିବାକୁ ପ୍ରୟାସ କରାଯିବ ବୋଲି ଆନ୍ଦୋଳନରେ ଯୋଗଦେଇଥିବା ବିପିନ ପ୍ରଧାନ, ଆରତୀ ମହଲା, ପ୍ରଭାକର ସାହୁ ପ୍ରମୁଖ କହିଛନ୍ତି।
