ବାରିପଦା ଅଫିସ,୨୦ା୭-ମୟୂରଭଞ୍ଜ ଜିଲା ବାରିପଦା ଉଦ୍ୟାନ ବିଭାଗର ଅବହେଳା ଯୋଗୁ ଜିଲାର ବିଭିନ୍ନ ସ୍ଥାନରେ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା ମାଧ୍ୟମରେ ହୋଇଥିବା ଲେମନ୍ଗ୍ରାସ୍ ଚାଷ ଦିଗହରା ହୋଇ ପଡ଼ିଛି। ହିତାଧିକାରୀ ଚୟନରେ ଅନିୟମିତତା ଓ ଅନୁପଯୁକ୍ତ ସ୍ଥାନରେ ଏହି ଚାଷ କରାଯାଇଥିବାରୁ ଏଭଳି ସମସ୍ୟା ସୃଷ୍ଟି ହୋଇଛି।
ସୂଚନା ଅନୁଯାୟୀ, ବାରିପଦା ବ୍ଲକ ବୁଢ଼ାଖମାରୀ ଗ୍ରାମର ପ୍ରଦୀପ କୁମାର ମହାନ୍ତଙ୍କ ସମେତ ୨୨ଜଣଙ୍କ ନାମରେ ଥିବା ୨୫ ହେକ୍ଟର ଜମିରେ ଲେମନଗ୍ରାସ୍ ଚାଷ ପାଇଁ ୭୦ ଲକ୍ଷ ୮୫ ହଜାର ୬୧୩ ଟଙ୍କା ବ୍ୟୟ କରାଯାଇଥିଲା। ଜିଲା ଗ୍ରାମ୍ୟ ଉନ୍ନୟନ କାର୍ଯ୍ୟକାରୀ ସଂସ୍ଥା ଥିବା ବେଳେ ଉପ ଉଦ୍ୟାନ କୃଷି ନିର୍ଦ୍ଦେଶକ କାର୍ଯ୍ୟନିବାର୍ହୀ ସଂସ୍ଥା ଦାୟିତ୍ୱରେ ଥିଲା। ଆର୍ଥିକ ବର୍ଷ ୨୦୧୯-୨୦ ମାର୍ଚ୍ଚରେ ଏଠାରେ ଚାଷ କରାଯିବାକୁ ଥିଲା। ହେଲେ ବିଭାଗୀୟ କର୍ମଚାରୀଙ୍କ ଅବହେଳା ଯୋଗୁ ଗତ ଅକ୍ଟୋବରରେ କାର୍ଯ୍ୟ ଆରମ୍ଭ ହେଲା। ଇତି ମଧ୍ୟରେ ୯ ମାସ ବିତିଯାଇଥିଲେ ମଧ୍ୟ ରକ୍ଷଣାବେକ୍ଷଣ ଅଭାବରୁ ଗଛଗୁଡ଼ିକ ଠିକ୍ ଭାବରେ ବଢ଼ି ନାହିଁ। ସେହିଭଳି ଅଧିକାଂଶ ଗଛ ବର୍ତ୍ତମାନ ମରିଯାଇଥିବା ଦେଖିବାକୁ ମିଳୁଛି। ପ୍ରତିଦିନ ୧୮୮ ଟଙ୍କା ମଜୁରୀ ହିତାଧିକାରୀଙ୍କ ଆକାଉଣ୍ଟକୁ ଯାଉଥିବା ବେଳେ ସେମାନେ ଗଛର ରକ୍ଷଣାବେକ୍ଷଣ କରୁନାହାନ୍ତି। ଅନ୍ୟପକ୍ଷେ ଯେଉଁ ହିତାଧିକାରୀଙ୍କ ଆକାଉଣ୍ଟକୁ ଟଙ୍କା ଯାଉଛି ସେମାନେ କାମ କରୁ ନ ଥିବାରୁ ଅଧା ପଇସା ବିଭାଗର କେତେକ କର୍ମଚାରୀମାନଙ୍କ ପକେଟକୁ ଯାଉଥିବା ନେଇ ଚର୍ଚ୍ଚା ହେଉଛି। ସୂଚନାଫଳକରେ ୨୫ ହେକ୍ଟର ଜମିରେ ଲେମନଗ୍ରାସ୍ ଚାଷ କରାଯାଇଥିବା ନେଇ ଦର୍ଶାଯାଇଥିବା ବେଳେ ବାସ୍ତବରେ ମାତ୍ର କିଛି ହେକ୍ଟର ଜମିରେ ଚାଷ କରାଯାଇଥିବା ଦେଖିବାକୁ ମିଳିଛି। ସେହିଭଳି ପଡ଼ିଆ ଜମିରେ ଏହି ଚାଷ କରିବା ପାଇଁ ନିୟମ ଥିବା ବେଳେ ଏହାକୁ ବଡ଼ ବଡ଼ ଗଛ ମୂଳେ କରାଯାଇଛି। ଫଳରେ ଘାସ ଗଛ କିପରି ବଢ଼ିବ ବୋଲି ଚାଷୀମାନେ ଅଭିଯୋଗ କରିଛନ୍ତି।
ଉଲ୍ଲେଖଯୋଗ୍ୟ ଯେ, ରାଷ୍ଟ୍ରୀୟ କୃଷି ବିକାଶ ଯୋଜନାରେ ଚାଷୀଙ୍କ ସାମାଜିକ ଓ ଅର୍ଥନୈତିକ ଅଭିବୃଦ୍ଧି ପାଇଁ ଏହି ଲେମନ୍ଗ୍ରାସ ଚାଷ ଯୋଜନା କରାଯାଇଛି। ଫଳରେ ଚାଷୀଟିଏ ଅନ୍ୟ ରାଜ୍ୟକୁ କାମଧନ୍ଦା ପାଇଁ ନ ଯାଇ ଘରେ ଏହି ଚାଷ କରି ନିଜର ଜୀବନଜୀବିକା ଚଳାଇ ପାରିବ। ହେଲେ ମୂଳ ଲକ୍ଷ୍ୟଠାରୁ ଦୂରେଇ ଯାଇ ଉଦ୍ୟାନ ବିଭାଗର ଅଧିକାରୀମାନେ ମନଇଛା ଚାଷ କରାଉଥିବା ଦେଖିବାକୁ ମିଳିଛି। ଏନେଇ ବାରିପଦା ଉଦ୍ୟାନ ବିଭାଗ ଉପନିର୍ଦ୍ଦେଶକ ଶିଶିର ଆଚାର୍ଯ୍ୟଙ୍କୁ ପଚାରିବାରୁ ମାସେ କାଳ ଲକ୍ଡାଉନ ଯୋଗୁ ହିତାଧିକାରୀମାନେ ଆସି ରକ୍ଷଣାବେକ୍ଷଣା କରିପାରିଲେ ନାହିଁ। ଫଳରେ ଗଛଗୁଡ଼ିକ ମରିଗଲା। ଆଗାମୀ ଦିନରେ ଆଉ ଥରେ ଗଛ ଲଗାଇ ଏହାର ଯତ୍ନ ନିଆଯିବ ବୋଲି ସେ ପ୍ରକାଶ କରିଥିଲେ।
