ରସୁଲପୁର,୨୧।୬(ଡି.ଏନ.ଏ.): ଯାଜପୁର ଜିଲା ରସୁଲପୁର ବ୍ଲକ ଅଧୀନ ବୁଣାକାର ଗାଁ ଭାବେ ପରିଚିତ ଗୋପାଳପୁରର ୧୦ ବୁଣାକାର ସୋମବାର ଗାଁ ଛାଡ଼ି ସୁରଟ ମୁହାଁ ହୋଇଛନ୍ତି। କୌଳିକ ବୃତ୍ତି ସଙ୍କଟରେ ଥିବାରୁ ସେମାନେ ଏଭଳି ନିଷ୍ପତ୍ତି ନେଇଛନ୍ତି। ପରିବାର ପୋଷିବାକୁ ଅନ୍ୟ ବାଟ ନ ପାଇ ସେମାନେ ରାଜ୍ୟ ବାହାରକୁ ଯାଇଛନ୍ତି। ଗାଁ ଛାଡ଼ିଥିବା ବୁଣାକାରମାନେ ସୁରଟର ଲୁଗା ପ୍ରସ୍ତୁତକାରୀ କମ୍ପାନୀରେ କାମ କରିବାକୁ ଆଶା ରଖିଛନ୍ତି ବୋଲି ଗାଁ ଛାଡିଥିବା ବୁଣାକାର ଭରତ ଦାସ, ବାଙ୍କବିହାରୀ ଦାସ, ହରିହର ଗୁଇଁ, ଭ୍ରମରବର ଦାସ, ମାୟାଧର ଗୁଇଁ, ଜଗବନ୍ଧୁ ଦାସ, ରାକେଶ ଦାସ, ବଟକୃଷ୍ଣ ଦାସ, ରମେଶ ଗୁଇଁଙ୍କ ପରିବାର ସଦସ୍ୟମାନେ କହିଛନ୍ତି।
ଗୋପାଳପୁର ଗାଁ ଟସର ବସ୍ତ୍ରର ହବ୍ ଭାବେ ପରିଚିତ। ଏହି ଗ୍ରାମରେ ପ୍ରାୟତଃ ୧୦୦୦ରୁ ଊର୍ଦ୍ଧ୍ୱ ପରିବାର ସଦସ୍ୟଙ୍କ କୌଳିକ ବୃତ୍ତି ଲୁଗା ବୁଣିବା। ସକାଳୁ ସଞ୍ଜ ଯାଏ ସେମାନେ ତନ୍ତରେ ବସି ଲୁଗା ବୁଣିଲେ ପରିବାର ଚଳେ। ବାତ୍ୟା ଫନୀ, ୨୦୨୦ ଅଗଷ୍ଟରେ ବ୍ରାହ୍ମଣୀ ନଦୀରେ ଆସିଥିବା ବନ୍ୟା ଓ ପରେ କରୋନା କଟକଣା ବୁଣାକାର ପରିବାର ପାଇଁ ବିପର୍ଯ୍ୟୟ ଆଣିଛି । ବନ୍ୟା ଓ ବାତ୍ୟାରେ ନଷ୍ଟ ହୋଇଯାଇଥିବା ତନ୍ତଶାଳା ଓ କଞ୍ଚାମାଲର କ୍ଷତିକୁ ଭରଣା କରିବାକୁ ବୁଣାକାରମାନେ ବିଫଳ ହୋଇଥିଲେ। ଯାହାବି ପୁଞ୍ଜି ଥିଲା ତାକୁ ଉପଯୋଗ କରି ଲୁଗା ବୁଣିଥିଲେ ମଧ୍ୟ କରୋନା କଟକଣା କାରଣରୁ ସେହି ଲୁଗା ବିକ୍ରି ହୋଇ ନ ପାରି ଘରେ ପଡ଼ି ରହିଛି। ରୋଜଗାର ଶୂନ୍ୟ ହୋଇଯାଇଛନ୍ତି ବୁଣାକାର ପରିବାର। ଗାଁର ଯେଉଁମାନଙ୍କ ସ୍ଥିତି ଅତି ଦୟନୀୟ ସେମାନେ ଘର ଛାଡିବାକୁ ବାଧ୍ୟ ହୋଇଛନ୍ତି। ଆଗକୁ ଆହୁରି ଅଧିକ ସଂଖ୍ୟକ ବୁଣାକାର ଗାଁ ଛାଡିବେ ବୋଲି ଆକଳନ କରାଯାଉଛି। ଏଭଳି ସ୍ଥିତିରେ ବୁଣାକାରମାନଙ୍କୁ ସରକାରୀ ସହାୟତା ମିଳିପାରି ନାହିଁ। ଗତ ୨ ମାସ ତଳେ ବୁଣାକାରମାନଙ୍କ ଆର୍ଥିକ ସ୍ଥିତିକୁ ନେଇ ମୁଖ୍ୟମନ୍ତ୍ରୀଙ୍କୁ ଏକ ପତ୍ର ଜରିଆରେ ଅବଗତ କରାଯାଇଥିଲା। ସରକାର ବୁଣାକାରମାନଙ୍କୁ ସହାୟତା ଦିଅନ୍ତୁ ବୋଲି ଦାବି କରାଯାଇଥିଲା। ହେଲେ ସେଥିପ୍ରତି ସରକାର ଗୁରୁତ୍ୱ ଦେଇ ନ ଥିଲେ। ଫଳରେ ବୁଣାକାରମାନେ ଗାଁ ଛାଡ଼ିବା ଆରମ୍ଭ କରିଛନ୍ତି ବୋଲି ଗୋପାଳପୁର ଗ୍ରାମର ବୁଣାକାରମାନେ କହିଛନ୍ତି।
