ମହାକାଳପଡା,୪ା୧୨(ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାର ଗ୍ରାମାଞ୍ଚଳରେ ଅନୁସୂଚିତ ଜାତି ଓ ଜନଜାତି ଭୂମିହୀନ ପରିବାରକୁ ବସୁନ୍ଧରା ଯୋଜନାରେ ସରକାରୀ ଜମି, ବାସଗୃହ ଯୋଗାଇ ଦେବାକୁ ସ୍ବତନ୍ତ୍ର ଯୋଜନା କାର୍ଯ୍ୟକାରୀ କରିଛନ୍ତି। ହେଲେ କେନ୍ଦ୍ରାପଡା ଜିଲା ମହାକାଳପଡା ତହସିଲ ଅଞ୍ଚଳରେ ପ୍ରଭାବଶାଳୀ ବ୍ୟକ୍ତି ଭୂମିହୀନଙ୍କ ପାଇଁ ଉଦ୍ଦିଷ୍ଟ ପଟ୍ଟାକୁ ହାତେଇ ନେଇଛନ୍ତି। ତହସିଲର ଉପାନ୍ତ ଅଞ୍ଚଳ ପେଟଛେଲା ପଞ୍ଚାୟତର ଆଦିବାସୀ ଶବରପଡା (ଜଙ୍ଗଲଘେରି)ର ୩୦ରୁ ଅଧିକ ପରିବାର ଭୂମିହୀନ ପଟ୍ଟାରୁ ବଞ୍ଚତ୍ତ ହୋଇଛନ୍ତି। ସେମାନେ ସରକାରୀ ଜମିରେ ଦୀର୍ଘବର୍ଷ ହେଲା ବସବାସ କରି ଆସୁଥିଲେ ମଧ୍ୟ ଭୂମିହୀନ ପଟ୍ଟା ପାଇ ନାହାନ୍ତି। ଏ ନେଇ ତହସିଲଦାର ସୌଭାଗ୍ୟ ରଞ୍ଜନ ପଣ୍ଡାଙ୍କୁ ଭେଟି ନିଜର ହକ୍ ପାଇଁ ଅଭିଯୋଗପତ୍ର ବୁଧବାର ପ୍ରଦାନ କରିଛନ୍ତି। ତହସିଲଦାର ପଣ୍ଡା ଏହି ପରିବାରମାନେ ଭୂମିହୀନ ପଟ୍ଟାରୁ ବଞ୍ଚତ୍ତ ନେଇ ବିସ୍ମୟ ପ୍ରକାଶ କରିଥିଲେ। କିପରି ଏହି ପରିବାର ବସୁନ୍ଧରା ଯୋଜନାରେ ସାମିଲ ହୋଇପାରିବେ ସରକାରୀ ନିୟମ ଅନୁସାରେ ନିଶ୍ଚିତ କାର୍ଯ୍ୟକାରୀ କରାଯିବ ବୋଲି ସେମାନଙ୍କୁ ପ୍ରତିଶ୍ରୁତି ଦେଇଥିଲେ। ସେହିପରି ତହସିଲ ଅଧୀନ ରାମଚଣ୍ଡୀ ରାଜସ୍ବ ସର୍କଲର ରାମନଗର ମୌଜାର କେତେଜଣ ପ୍ରଭାବଶାଳୀ ପରିବାର ଭୂମିହୀନ ପଟ୍ଟା ହାତେଇଥିବା ତହସିଲଦାରଙ୍କୁ ଅଭିଯୋଗ ହୋଇଛି। ପେଟଛେଲା ପଞ୍ଚାୟତର ଆଦିବାସୀ ଅଧ୍ୟୁଷିତ ଲୁଣିମାଟିଆର ଜଙ୍ଗଲ ଘେରି ଗ୍ରାମର ପଇଡ, ଛଚିଆଙ୍କ ଅଭିଯୋଗ ହେଲା ଆମେ ଆଦିବାସୀ ଜନଜାତି ଦୀର୍ଘବର୍ଷ ଧରି ସରକାରୀ ଜମିରେ ବସବାସ କରୁଛୁ। ହେଲେ ଆମର ଭୂମିହୀନ ପଟ୍ଟା ନ ଥିବାରୁ ଆବାସ ଯୋଜନାରେ ସାମିଲ ହୋଇପାରୁନାହଁି କି ପିଲାମାନଙ୍କୁ ପାଠ ପଢେଇବା ପାଇଁ ସ୍ଥାୟୀ ଠିକଣା, ଜାତିଗତ ପ୍ରମାଣପତ୍ର ପାଇବାରେ ଅସୁବିଧାର ସମ୍ମୁଖୀନ ହେବାକୁ ପଡୁଛି। କିନ୍ତୁ ଘର ପାଖରେ ଅଳ୍ପଦିନ ଧରି ରହୁଥିବା ବାଙ୍ଗୀୟ ଭାଷାଭାଷୀ ଲୋକ କିପରି ଯୋଜନାକୁ ହଡପ କରୁଛନ୍ତି ତାହା ଆମକୁ ଚକିତ କରିଛି। ଏହାର ବିଧିବଦ୍ଧ ତଦନ୍ତ କରି ପଟ୍ଟା ରଦ୍ଦ ପାଇଁ ଦାବି ଜଣାଇଛନ୍ତି। ଏ ସର୍ମ୍ପକରେ ତହସିଲଦାର ପଣ୍ଡାଙ୍କୁ ପଚାରିବାରେ ଖୁବ୍ଶୀଘ୍ର ତଦନ୍ତ କରାଯାଇ ପଦକ୍ଷେପ ନିଆଯିବ। ପ୍ରକୃତ ଜନଜାତିମାନଙ୍କୁ ଭୂମିହୀନ ପଟ୍ଟା ଯୋଗାଇ ଦିଆଯିବ ବୋଲି ସେ କହିଛନ୍ତି।
