ମହାକାଳପଡ଼ା,୨୯ା୮(ଡି.ଏନ.ଏ.): ଶିଳ୍ପ ବିହୀନ କେନ୍ଦ୍ରାପଡ଼ା ଜିଲାର ମହାକାଳପଡ଼ା ବ୍ଲକ ନଦୀନାଳ ଘେରା ଉପକୂଳ ଅଞ୍ଚଳରେ ଭେଡ଼ି ଚାଷ ପ୍ରତି ଚାଷୀଙ୍କ ଆଗ୍ରହ ବଢ଼ିଛି। ସମୁଦ୍ର ଉପକୂଳବର୍ତ୍ତୀ ଗାଁରେ ଲୋକମାନେ ସାଧାରଣତଃ ମେଣ୍ଢା ଚାଷ କରି ପରିବାର ପ୍ରତିପୋଷଣ କରିଥାନ୍ତି। ବର୍ଷକୁ ଗୋଟିଏ ମେଣ୍ଢି ୨ ଥର ଶାବକ ଜନ୍ମ ଦେଇଥାଏ। ଥରକେ ୨ରୁ ୩ଟି ଛୁଆ ଜନ୍ମ କରିଥାଏ। ଅତି ବେଶୀରେ ଗୋଟିଏ ମେଣ୍ଢାର ଓଜନ ୧୦ରୁ ୧୫ କେଜି ହୋଇଥାଏ। ବଜାର ଦର ଅନୁସାରେ ଗୋଟେ ମେଣ୍ଢା ୩ରୁ ୪ ହଜାର ଟଙ୍କାରେ ବିକ୍ରି ହୋଇଥାଏ। ଅନ୍ୟ ଗୃହପାଳିତ ପ୍ରାଣୀ ଅପେକ୍ଷା ମେଣ୍ଢାର ରୋଗ ପ୍ରତିରୋଧକ ଶକ୍ତି ଅଧିକ ଥାଏ। ବର୍ଷକରେ ଥରେ ଟିକା ଦେଲେ ସହଜରେ ଅନ୍ୟ କୌଣସି ରୋଗ ହୋଇ ନ ଥାଏ। ହେଲେ ଗ୍ରାମାଞ୍ଚଳରେ ମେଣ୍ଢା ମାଂସ ପ୍ରତି ଉଚିତ୍ ମୂଲ୍ୟ ନ ମିଳିବାରୁ ଚାଷୀଙ୍କୁ କ୍ଷତି ସହିବାକୁ ପଡ଼ିଥାଏ। ତେଣୁ ଚାଷୀମାନେ ଦେଶୀ ମେଣ୍ଢା ଚାଷ ଛାଡ଼ି ମେଣ୍ଢା ପ୍ରଜାତିର ଭେଡି ଚାଷ ପ୍ରତି ଆଗ୍ରହ ପ୍ରକାଶ କରିଛନ୍ତି। ଭେଡି ଶିଙ୍ଗ ଭାରି ଶକ୍ତ ଓ ୧୦ଇଞ୍ଚ ଲମ୍ବ ହୋଇଥାଏ। ଏମାନେ ବାହ୍ୟ ଶତ୍ରୁକୁ ଦେଖିବା ମାତ୍ରେ ଶିଙ୍ଗ ଦ୍ବାରା ଆକ୍ରମଣ କରିଥାଆନ୍ତି। ଦେଶି ମେଣ୍ଢା ଓଜନଠାରୁ ଭେଡି ଓଜନ ୨ ଗୁଣ ଅଧିକ ହୋଇଥାଏ। ଏହା ଶରୀର ଅଧିକ ଲୋମ୍ ଯୁକ୍ତ ଥିବାରୁ ଖରା, ଝଡ଼ ବର୍ଷା , ଶୀତ ଆଦିକୁ ସହ୍ୟ କରିବାର କ୍ଷମତା ଥାଏ। ଭେଡ଼ି ତୃଣଭୋଜି ପ୍ରାଣୀ ହୋଇ ଥିବାରୁ ରାସ୍ତାପାର୍ଶ୍ୱ, ନଦୀ କୂଳ , ଚାରଣ ଭୂମି , ଜଙ୍ଗଲି ଗଛ ପତ୍ର ଲଟା ଆଦି ଖାଇବାକୁ ପସନ୍ଦ କରିଥାନ୍ତି। ଭେଡ଼ି ଚରାବୁଲା କରି ସାରେ ଘରକୁ ଫେରିଲେ ଚାଷୀମାନେ ଅଧିକାଂଶ ସମୟରେ ମୁଡ଼ି , ଚାଉଳ, ଗହମ ଆଦି ଆଦି ଖାଇବାକୁ ଦେଇଥାଆନ୍ତି। ଏପରି ଖାଦ୍ୟ ଖାଇବା ଦ୍ବାରା ଭେଡ଼ି ଶରୀର ଚିକ୍କଣ ଓ ହୃଷ୍ଟପୃଷ୍ଟ ହୋଇ ଥାଏ ବୋଲି ଭେଡି ଚାଷୀ ପଦନ ପ୍ରଧାନ କହିଛନ୍ତି। ଏହି ପ୍ରଜାତିର ଭେଡି ଚାଷ ବରଫାବୃତ୍ତ ଅଞ୍ଚଳ ତଥା ଜାମ୍ମୁ କାଶ୍ମୀର, ହିମାଚଳ ପ୍ରଦେଶ, ଉତ୍ତରାଖଣ୍ଡ , କାଠମାଣ୍ଡୁ ଆଦି ଅଞ୍ଚଳରେ ବହୁଳ ଭାବେ ହୋଇଥାଏ। ସମୁଦ୍ର ଉପକୂଳବର୍ତ୍ତୀ ଅଞ୍ଚଳରେ ବରଫାବୃତ୍ତ ଅଞ୍ଚଳରେ ଦେଖାଯାଉଥିବା ଭେଡ଼ି ପରିବେଶସହ ଖାପ୍ ଖୁଆଇ ପାରୁଛନ୍ତି। ବିଶେଷ କରି ମହାକାଳପଡ଼ା ବ୍ଲକର ଜଆଁରା, ତେନ୍ତୁଲିକନ୍ଧା, ଘୋଡାବନ୍ଧକୂଳ , ବେଲାର ନୂଆଗାଁ , କେନ୍ତିଆ ଆଦି ଗ୍ରାମରେ ବହୁଳ ଭାବେ ଭେଡି ଚାଷ ହେଉଛି। ସରକାର ଭେଡି ଚାଷୀଙ୍କୁ ତାଲିମ୍, ରିହାତି ସୁଧରେ ଋଣ ଆଦି ଯୋଗାଇ ଦେଲେ ଚାଷୀମାନେ ଉପକୃତ ହୋଇ ପାରିବେ ବୋଲି ସାମାଜିକ କର୍ମୀ ସୁବାସ ଚନ୍ଦ୍ର ସ୍ବାଇଁ କହିଛନ୍ତି।
