ନୂଆଦିଲ୍ଲୀ,୧୨।୧୨: ବର୍ତ୍ତମାନ ସାରା ଦେଶରେ ନକଲି ଡାକ୍ତରଙ୍କ ସଂଖ୍ୟା ବଢିବାରେ ଲାଗିଛି । ପାଠ ନପଢି ଡାକ୍ତର ହେବା ସହିତ ହସ୍ପିଟାଲରେ ରୋଗୀ ଚିକିତ୍ସା କରୁଛନ୍ତି । ବର୍ତ୍ତମାନ ଉତ୍ତରପ୍ରଦେଶରୁ ଏଭଳି ଏକ ଘଟଣା ସାମ୍ନାକୁ ଆସିଛି । ଉତ୍ତରପ୍ରଦେଶ ଲଲିତପୁର ଜିଲ୍ଲାର ମେଡିକାଲ କଲେଜରେ ଏକ ଡାକ୍ତର ୩ ବର୍ଷ ଧରି କାର୍ଯ୍ୟ କରୁଥିଲା । ନିଜେ ପାଠ ନପଢି ଭିଣୋଇର ଡିଗ୍ରୀ ନେଇ ରୋଗୀ ଚିକିତ୍ସା କରୁଥିବା ନେଇ ଅଭିଯୋଗ ହୋଇଛି । ମାମଲା ସାମ୍ନାକୁ ଆସିବା ପରେ ହସ୍ପିଟାଲରେ ହଙ୍ଗାମା ଦେଖାଯାଇଛି ।
ଅଭିଯୁକ୍ତ ନକଲି ଡାକ୍ତର ମାର ମୃତ୍ୟୁ ବାହାନା ନେଇ ଫେରାର ହୋଇଯାଇଥିବା ଜଣାପଡିଛି । ଅଭିଯୋଗ ପରେ ଜିଲ୍ଲା ପ୍ରଶାସନ ତଦନ୍ତ ଆରମ୍ଭ କରିଛି । ଭାଇ-ଭଉଣୀ ମଧ୍ୟରେ ବିବାଦ ପରେ ଫର୍ଜୀ ଡାକ୍ତରର ସତ୍ୟ ସାମ୍ନାକୁ ଆସିଥିଲା । ନକଲି ଡାକ୍ତରଙ୍କ ନାମ ଅଭିନବ ସିଂ ବୋଲି ଜଣାପଡିଛି । ଅଭିନବ ଏବଂ ଡାକ୍ତର ସୋନାଲି ସିଂଙ୍କ ମଧ୍ୟରେ ସମ୍ପତ୍ତି ବିବାଦ ହେବା ପରେ ଘଟଣା ସାମ୍ନାକୁ ଆସିଛି । ଭଉଣୀ ଲଳିତପୁର ମେଡିକାଲ କଲେଜର ପ୍ରିନ୍ସିପାଲଙ୍କୁ ଏକ ଚିଠି ଲେଖି ଏ ସମ୍ପର୍କରେ ସୂଚନା ଦେଇଛନ୍ତି ।
ନକଲି ଡାକ୍ତର ଇସ୍ତଫା ଦେଇ ଫେରାର୍- ଭଉଣୀ ତାଙ୍କ ଚିଠିରେ ଲେଖିଛନ୍ତି ଯେ ତାଙ୍କ ଭାଇ ଅଭିନବ ସିଂହ, ଲଲିତପୁରର ତାଲାବପୁରାର ବାସିନ୍ଦା, ତାଙ୍କ ସ୍ୱାମୀ ରାଜୀବ ଗୁପ୍ତାଙ୍କ ନକଲି ନାମ ବ୍ୟବହାର କରି ହୃଦରୋଗ ବିଶେଷଜ୍ଞ ଭାବରେ କାର୍ଯ୍ୟ କରୁଥିଲେ। ଏହି କଥା ପ୍ରକାଶ ପାଇବା ପରେ, ନକଲି ଡାକ୍ତର ଦୁଇ ଧାଡ଼ିର ଇସ୍ତଫା ପତ୍ର ଦାଖଲ କରି ହସ୍ପିଟାଲରୁ ପଳାଇଗଲେ। ଇସ୍ତଫା ପତ୍ରରେ ଅଭିନବ ଲେଖିଛନ୍ତି, “ମୋ ମାଆଙ୍କ ମୃତ୍ୟୁ ହୋଇଛି, ତେଣୁ ମୁଁ ଇସ୍ତଫା ଦେଉଛି।” ମେଡିକାଲ କଲେଜର ଅଧ୍ୟକ୍ଷ ଡାକ୍ତର ମୟଙ୍କ ଶୁକ୍ଲା କହିଛନ୍ତି ଯେ ୨୦୧୩ ମସିହାରେ ଅଭିନବ ସିଂହ ଆଧାର କାର୍ଡରେ ତାଙ୍କ ଫଟୋ ବ୍ୟବହାର କରି ଠକେଇ କରିଥିଲେ।
ଦରମା ଆଦାୟ ହେବ- ଆଇଆଇଟି ରୁରକିରୁ ବି.ଟେକ୍ ପାସ୍ କରିବା ପରେ, ଅଭିନବଙ୍କୁ ଆଇଆରଏସ ପାଇଁ ଚୟନ କରାଯାଇଥିଲା। କୌଣସି କାରଣରୁ ଅଭିନବ ପଳାଇ ଲଳିତପୁର ଆସିଥିଲେ। ଶୁକ୍ଲା କହିଛନ୍ତି ଯେ ସ୍ଥାନୀୟ ପୋଲିସ ଷ୍ଟେସନରେ ନକଲି ଡାକ୍ତରଙ୍କ ବିରୁଦ୍ଧରେ ଏଫଆଇଆର ରୁଜୁ କରାଯିବ। ସେ ଆହୁରି ମଧ୍ୟ କହିଛନ୍ତି ଯେ ତାଙ୍କର ଆଜି ପର୍ଯ୍ୟନ୍ତ ସମସ୍ତ ଦରମା ଆଦାୟ କରାଯିବ। ଜିଲ୍ଲା ପ୍ରଶାସନ ଏବଂ ମୁଖ୍ୟ ଚିକିତ୍ସା ଅଧିକାରୀଙ୍କୁ ଏ ବିଷୟରେ ଅବଗତ କରାଯାଇଛି। ମୁଖ୍ୟ ଚିକିତ୍ସା ଅଧିକାରୀ ଇମତିଆଜ ଅହମ୍ମଦ କହିଛନ୍ତି ଯେ ବୁଧବାର ନକଲି ଡାକ୍ତରଙ୍କ ବିଷୟରେ ଏକ ଅଭିଯୋଗ ମିଳିଛି।
