ହାଇଦ୍ରାବାଦ, ୧୫ା୯ (ପି.ଟି.)-ନୂଆ ସିଜନ ଆରମ୍ଭ ପୂର୍ବରୁ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ) ଦଳ ହାଇଦ୍ରାବାଦ ଏଫ୍ସି ସୋମବାର ଦୁଇ ଯୁବ ଆକ୍ରମଣାତ୍ମକ ଖେଳାଳି ଲାଲମପୁଇଆ ଏବଂ ସ୍ପିଡେନ ଫର୍ନାଣ୍ଡିଜଙ୍କ ସହ ଦୀର୍ଘ ମିଆଦୀ ଚୁକ୍ତି କରିଛି। ୨୦ବର୍ଷୀୟ ଏହି ଖେଳାଳି ଦ୍ୱୟ ୩ବର୍ଷ ପାଇଁ ଆଇଏସ୍ଏଲ ଦଳ ଏଫ୍ସି ଗୋଆ ତରଫରୁ ଖେଳିଆସୁଥିଲେ। ହାଇଦ୍ରାବାଦ ଦଳ ସହିତ ସେମାନେ ୨୦୨୨-୨୩ ସିଜନ ପର୍ଯ୍ୟନ୍ତ ଚୁକ୍ତି କରିଛନ୍ତି। ଲାଲମପୁଇଆ ଓପି ନାମରେ ପରିଚିତ। ସିନିୟର ଦଳକୁ ପଦୋନ୍ନତି ପାଇବା ପୂର୍ବରୁ ସେ ପୁଣେ ଏଫ୍ସି ଓ ଡିଏସ୍କେ ଶିବାଜିଆନ୍ସ ଜୁନିୟର ଦଳ ତରଫରୁ ଖେଳୁଥିଲେ। ମିଜୋରାମ୍ର ଏହି ଷ୍ଟ୍ରାଇକର ୨୦୧୭ରେ ଏଫ୍ସି ଗୋଆ ଡେଭଲପମେଣ୍ଟାଲ ଟିମ୍ ସହିତ ଚୁକ୍ତି କରିଥିଲେ। ଏହାପରଠାରୁ ସେ ନିୟମିତ ସ୍ଥାନୀୟ ଓ ଜାତୀୟ ପ୍ରତିଯୋଗିତାଗୁଡ଼ିକରେ ଗୌର୍ସ ଦଳ ତରଫରୁ ପ୍ରତିନିଧିତ୍ୱ କରି ଆସୁଥିଲେ। ତନ୍ମଧ୍ୟରେ ଗୋଆ ପ୍ରୋ-ଲିଗ୍, ଡୁରାଣ୍ଡ କପ୍ ଏବଂ ଦ୍ୱିତୀୟ ଡିଭିଜନ ଲିଗ୍ ଅନ୍ତର୍ଭୁକ୍ତ। ୨୦୧୯-୨୦ ଆଇଏସ୍ଏଲ ସିଜନରେ ସେ ପ୍ରଥମ ଦଳକୁ ପଦୋନ୍ନତି ପାଇଥିଲେ। ଅନ୍ୟପକ୍ଷରେ ଫର୍ନାଣ୍ଡିଜ ବହୁ ସିଜନ ଧରି ଗୋଆ ୟୁଥ୍ ଫୁଟବଲ ସହିତ ସମ୍ପୃକ୍ତ ଥିଲେ। ୨୦୧୭ରେ ଏଫ୍ସି ଗୋଆରେ ଯୋଗଦାନ ପୂର୍ବରୁ ସେ ସ୍ପୋର୍ଟିଂ କ୍ଲବ ଦି ଗୋଆ ଏବଂ ଡେମ୍ପୋ ଏସ୍ସି ୟୁଥ୍ ଟିମ୍ ତରଫରୁ ଖେଳୁଥିଲେ। ଗୋଆର କ୍ୱିପେମ୍ ସହରରେ ଜନ୍ମଲାଭ କରିଥିବା ଏହି ଓ୍ବିଙ୍ଗର ନିୟମିତ ଭାବେ ଗୌର୍ସ ଟିମ୍ର ଗୋଆ ପ୍ରୋ ଲିଗ୍ ଏବଂ ଜାତୀୟ ସ୍ତରରେ ଦ୍ୱିତୀୟ ଡିଭିଜନ ଲିଗ୍ ଖେଳି ଆସୁଛନ୍ତି।
