ଖୋର୍ଦ୍ଧା,୧।୧୦(ପ୍ରଭାତ ପାଣିଗ୍ରାହୀ): ଖୋର୍ଦ୍ଧା ଜିଲାର ପ୍ରମୁଖ ଶକ୍ତିପୀଠ ମା’ଉଗ୍ରତାରା ପୀଠରେ ବିଜୟା ଦଶମୀ ଆଡମ୍ବରରେ ଉଦ୍ଯାପିତ ହୋଇଛି। ବିଜୟା ଦଶମୀରେ ରାଜରାଜେଶରୀ ବେଶରେ ଦର୍ଶନ ଦେଇଥିଲେ ମା’ଉଗ୍ରତାରା । ମା’ଙ୍କ ଦର୍ଶନ ଲାଗି।
ପ୍ରବଳ ଭକ୍ତଙ୍କ ସମାଗମ ହୋଇଥିଲା।
ପୂଜକ ଯୁଧୁଷ୍ଠୀର ସାମନ୍ତରାୟ କୁହନ୍ତି, ମୂଳାଷ୍ଟମୀଠାରୁ ସହସ୍ରକୁମ୍ଭ ବରଣ ହୋଇ ପୀଠରେ କଳସ ସ୍ଥାପନ ହୋଇ ଷୋଡ଼ଶ ପୂଜାରୁ ଶାରଦୀୟ ପୂଜାରମ୍ଭ ହୋଇଥିଲା। ସପ୍ତମୀ, ଅଷ୍ଟମୀ ଓ ମହମହାନବମୀରେ ରାତ୍ର ମହାପୂଜା କରାଯାଇଛି। ସପ୍ତମୀ ପୂଜା ରାତ୍ରରେ ହରିପୁରସ୍ଥିତ ମା’ ବଘେଇଙ୍କ କଳସ ଏବଂ କାଶୀପୁର ସ୍ଥିତ ମା’ଭୈରବୀଙ୍କ ଆଜ୍ଞାମାଳ ଆସି ପୀଠରେ ସ୍ଥାପନ ହେବା ପରେ ମା’ଙ୍କ ପୂଜାର୍ଚ୍ଚନା ଆରମ୍ଭ ହୋଇଥାଏ।
ମହାଷ୍ଟମୀରେ ମା’ଙ୍କ ସନ୍ଧିପୂଜା ସହିତ ସହିତ ପାଇକ ସେବାତୟମାନଙ୍କୁ ସମ୍ମାନିତ କରାଯାଏ। ମହାନବମୀରେ ଶାନ୍ତିପୂଜା ଏବଂ ବିଜୟା ଦଶମୀରେ ମା’ଙ୍କ ବର୍ଦ୍ଧନୀ କଳସ ପାଇକ ସେବାୟତମାନଙ୍କ ଦ୍ବାରା ନିକଟ ପାଇକପଦାକୁ ଶୋଭାଯାତ୍ରାକୁ ଯାଇଥାଏ। ପାଇକପଦାଠାରେ ମା’ଙ୍କ ହୋମ ପୂଜାପାଠ ସହ କଳସ ବିସର୍ଜନ କରାଯାଏ ।
ମା’ଙ୍କ ବିଜେସ୍ଥଳୀ ହେଉଛି ମୂଳିଝରଗଡ଼। ଯାହାକି ଖୋର୍ଦ୍ଧାର ବିଭିନ୍ନ ଗଡ଼ ମଧ୍ୟରୁ ଅନ୍ୟତମ। ପାଇକ ବିଦ୍ରୋହ ସମୟରେ ଗଡ଼ର ବିଶେଷ ବର୍ଣ୍ଣନା ରହିଛି। ଏହି ସ୍ମୃତିରେ ପରମ୍ପରାକୁ ବଜାୟ ରଖି ପାଇକ ଆଖଡ଼ା କଳା ପ୍ରଦର୍ଶନ କରାଯାଇଥାଏ। ୧୬ ଦିନରେ ମା’ଙ୍କ ୧୬ବେଶ କରାଯାଏ। ଗଜପତି କପିଳେନ୍ଦ୍ରଦେବ ମା’ଙ୍କ ପୂଜାର୍ଚ୍ଚନା ପାଇଁ କୁସମୀ ଶାସନରେ ୧୬ଜଣ ବ୍ରାହ୍ମଣଙ୍କୁ ଆଣି ଅବସ୍ଥାପିତ କରିଥିଲେ। ପରମ୍ପରା ଅନୁସାରେ ପୂର୍ବରୁ ପ୍ରତ୍ୟେକ ପରିବାର ମା’ଙ୍କ ପୀଠରେ ଚଣ୍ଡୀପାଠ କରିଥିଲେ।
