ଲକ୍ଷ୍ନୌ,୨୪ ।୧୦: ଲଖିମପୁର ଖେରି ହିଂସାର ମୁଖ୍ୟ ଅଭିଯୁକ୍ତ ଆଶିଷ ମିଶ୍ର ପୋଲିସ ରିମାଣ୍ଡରରେ ଥିବା ବେଳେ ଏବେ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡି ଯାଇଥିବା ସୂଚନା ମିଳିଛି । ଫଳରେ ତାଙ୍କୁ ଜେଲ ହସ୍ପିଟାଲକୁ ସିପ୍ଟ କରିବାକୁ ପଡିଛି । ପୋଲିସ କଷ୍ଟଡି ରିମାଣ୍ଡ ଶେଷ ହେବା ପୂର୍ବରୁ ଆଶିଷଙ୍କୁ ଜେଲ ପଠାଇ ଦିଆଯାଇଛି । ଅଭିଯୁକ୍ତ ଆଶିଷ ଡେଙ୍ଗୁରେ ପୀଡ଼ିତ ହୋଇଥିବା ସୂଚନା ମିଳିଛି । ସେଥିପାଇଁ ତାଙ୍କୁ ଜେଲ ହସ୍ପିଟାଲରେ ଭର୍ତ୍ତି କରାଯାଇଛି । ଜେଲର ଜଣେ ବରିଷ୍ଠ ଅଧିକାରୀ ଶନିବାର ସୂଚନା ଦେଇଛନ୍ତି ଯେ ଆଶିଷଙ୍କୁ ଡେଙ୍ଗୁ ହୋଇଛି କି ନା ସେଥିପାଇଁ ତାଙ୍କ ସାମ୍ପଲ ପରୀକ୍ଷା ପାଇଁ ପଠାଯାଇଛି । ରିପୋର୍ଟ ଆସିବା ପରେ ଏହା ସ୍ପଷ୍ଟ ହେବ । ସୂଚନାଯୋଗ୍ୟ, ଲଖିମପୁର ଖେରିରେ ବିରୋଧ ପ୍ରଦର୍ଶନ କରୁଥିବା କୃଷକଙ୍କ ଉପରେ ଗାଡି ମଡାଇ ଦେବା ଅଭିଯୋଗରେ ଶୁକ୍ରବାର ଆଶିଷଙ୍କ ସମେତ ୪ ଅଭିଯୁକ୍ତଙ୍କୁ କୋର୍ଟ ୨ ଦିନିଆ ପୋଲିସ କଷ୍ଟଡି ରିମାଣ୍ଡରେ ପଠାଇ ଦେଇଥିଲେ ।
